სუპერმატჩი შედგა! “ბარსელონამ” და “ვილიარეალმა” ბოლო წამამდე იბრძოლეს (ვიდეო)

ესპანეთის ჩემპიონატის 30-ე ტურის მატჩში “ვილიარეალმა” შინ გათამაშების უდავო ფავორიტი “ბარსელონა” მიიღო და ღირსეული წინააღმდეგობაც გაუწია. გუნდები ერთმანეთს არაფერს უთმობდნენ და ბრძოლაც ბოლო წამამდე გაგრძელდა.

მატჩი “ლურჯ-ბროწეულისფერთა” უპირატესობით დაიწყო. შეხვედრის მე-12 წუთზე ფილიპე კოუტინიომ მეტოქეთა კარი დალაშქრა, ოთხიოდე წუთში კი საგოლე პასის ავტორმა, მალკომმა, შეძლო ანგარიშში სხვაობის გაზრდა. ნეიტრალურ ქომაგთა საბედნიეროდ “ვილიარეალი” ბედს არ შეეგუა და 23-ე წუთზე ჩუკვუეზემ ერთი გოლის გაქვითვა შეძლო. ტაიმში მეტი გოლი არ გასულა.

მეორე ტაიმი მასპინძლებმა ადგილობრივ ქომაგთა აქტიურობის ფონზე უფრო მოტივირებულებმა დაიწყეს. 50-ე წუთისთვის ეკამბის გოლით ანგარიში გათანაბრებული გახლდათ, 62-ე წუთზე კი იბორამ “ყვითელი სუბმარინი” წინ გაიყვანა. კარლოს ბაკამ მე-80 წუთზე თითქოს ყველაფერი გადაწყვიტა, თუმცა მატჩის ბოლო სამ წუთში მესისა (90′) და ლუის სუარესის (93′) გოლებით ანგარიში გათანაბრდა.