“ტორპედოს” პირველი ახალწვეული მიშიკო სარდალიშვილია

2017 წლის ტრიუმფატორ ქუთაისის “ტორპედოს” მომავალ სეზონში დიდი გეგმები აქვს, ამიტომაც იმერლები, უპირველეს ყოვლისა, ბირთვის შენარჩუნებას ცდილობენ.

ამ კუთხით ქუთაისლებმა მართლაც დიდი სამუშაო გასწიეს, გუნდის ძირითადი ბირთვი შენარჩუნებულია, რაც შეეხება ახალწვეულებს, დღეს ოფიციალურად დადასტურდა, რომ საჩხერის “ჩიხურას” აწ უკვე ყოფილი ათიანი მიშიკო სარდალივილი იმერელთა რიგებში ჩაირიცხა. ამის შესახებ ინფორმაციას “ტორპედოელთა” პრესსამსახური ავრცელებს. სარდალიშვილი გუნდში პირველი ახალწვეულია, თუმცა ჩხეტიანის კლუბი ამაზე გაჩერებას არ აპირებს.

შეგახსენებთ, რომ სარდალიშვილი 2015 წლის შემდეგ “ჩიხურას” რიგებში გამოდის. უკანასკნელ სეზონში მან 35 მატჩი ჩაატარა და 8 გოლით გამოიჩინა თავი, ამავდროულათ ის ევროპა ლიგის საკვალიფიკაციო ეტაპზე “ალტახის” წინააღმდეგ გამართულ ორ მატჩიან დუელში ერთ-ერთი გამორჩეული ფეხბურთელი იყო.

მიშიკო სარდალიშვილი: “საჩხერეში გატარებულმა წლებმა დიდი გამოცდილება მომიტანა”

როგორც მოგეხსენებათ, გუშინ საჩხერის “ჩიხურამ” საქართველოს თასის ფინალში ქუთაისის “ტორპედო” დაამარცხა, რითაც პირველ ტიტულთან ერთად ევრო ტურნირების საგზურიც მოიპოვა. მატჩი საკმაოდ დაძაბული და საინტერესო გამოდგა და გამარჯვებული თერთმეტმეტრიანების სერიაში გამოვლინდა.

ჩვენი საიტი საჩხერელთა ერთ-ერთ ლიდერს, მიშიკო სარდალიშვილს დაუკავშირდა და სხვადასხვა თემაზე გაესაუბრა:

უკვე სამი წელია, რაც საჩხერელთა რიგებში ირიცხებით, რას იტყვით განვლილ პერიოდზე?

საჩხერეში გატარებულმა წლებმა დიდი გამოცდილება მომიტანა. ბევრი ისეთი შეხვედრა ჩავატარეთ, რომელიც დამეხმარა გავზრდილიყავი, როგორც ფეხბურთელი. ზოგადად , “ჩიხურა” ყოველთვის კარგი ფეხბურთელებით არის დაკონმლექტებული, რაც მუდმივად ტონუსში ყოფნის საშუალებას იძლევა.

როგორი საფეხბურთო ატმოსფეროა შექმნილი საჩხერეში ?

გუნდში მეგობრული გარემოა, რაც დადებით გავლენას ახდენს ჩვენზე. უნდა აღინიშნოს გულშემატკივრის მხურვალე მხარდაჭერა, რასაც ყოველთვის ვგრძნობდით და ეს ყოველივე გორშიც დამტკიცდა. ისინი მთელი შეხვედრის განმავლობაში აქტიურად გვიჭერდნენ მხარს, რაც მოტივაციას გვიზრდიდა. არ გვქონდა უფლება, ის რწმენა, რომელიც მათ ჩვენს მიმართ ჰქონდათ, არ გაგვემართლებინა.

ახლა კი დროა განვლილი სეზონი შევაფასოთ.

წინა წლის სეზონს თუ შევადარებთ, მიმდინარე გათამაშებაში უკეთესი შედეგი უნდა დაგვეფიქსირებინა, ვიდრე ეს მეხუთე ადგილი იყო. ფაქტია, გარკვეულ მომენტში ეროვნულ ლიგაში ყურადღება მოვადუნეთ, მაგრამ აქცენტი ყიფიანის თასზე გაკეთდა და შედეგიც სახეზეა.

გუშინ საქართველოს თასის მფობელი გახდით კლუბთან ერთად, რას იტყვით აღნიშნულ დაპირისპირებაზე?

ძალიან დაძაბული შეხვედრა გამოდგა. მიუხედავად იმისა, რომ “ტორპედო” უკვე ეროვნული ლიგის გამარჯვებულის სტატუსით თამაშობდა, ტოლი არაფერში დავუდეთ და თანაბარი მატჩი ჩავატარეთ. შეხვედრის განმავლობაში შანსები ერთნაირად გვქონდა, თუმცა ალბათ ბოლოს ჩვენ უფრო მოვინდომეთ და სასურველ შედეგს მივაღწიეთ.

სოსო ფრუიძისათვის ეს ტიტული 10 წლიანი მოღვაწეობის შემდეგ საჩხერეში პირველია, თუმცა ამ სპეციალისტმა ერთ-ერთი სტაბილური გუნდი ჩამოაყალიბა “ჩიხურას” სახით.

სწორედ იქიდან გამომდინარე, რომ ის კლუბს 10 წლის განმავლობაში ასე კარგად წვრთნიდა ნამდვილად იმსახურებდა ამ ტიტულს. ბატონი სოსო ფრუიძის დამსახურებაა, რომ “ჩიხურა” წლების მანხილზე თავის სათქმელს ყოველთვის ამბობდა გასაოცარ შეხვედრებში გამარჯვებით, მათ რიგს გუშინდელი მატჩიც შეემატება.

როგორც ჩვენთვის ცნობილია, კლუბთან ხელშეკრულების ვადა ამოგეწურათ, რას იტყვი თქვენს მომავალზე?

ჯერჯერობით, მსგავს თემებზე საუბრისგან თავს შევიკავებ, ამ მომენტში ჩემს მომავალზე საუბარი არ შემიძლია.

სარდალიშვილი: “სტატისტიკა არაფერს ნიშნავს, ფინალში თანაბარი შანსები გვაქვს”

“დავით ყიფიანის სახელობის თასის” ნახევარ ფინალში საჩხერის “ჩიხურა” ხონის “იმერეთს” დაუპირისპირდა და 5-0 გაანადგურა.

მატჩის დასრულების შემდეგ აღნიშნულ შეხვედრაში დუბლის ავტორმა, მიშიკო სარდალიშვილმა ჩვენს ჟურნალისტთან ისაუბრა: “ჩიხურა” საქართველოს თასზე კარგად გამოდის და ჩვენ ღირსეულად მოვიპოვეთ ფინალის საგზური, თუმცა ამ ტურნირზე ჩვენი თამაშის შეფასება ნაადრევად მიმაჩნია, რადგან ყველაზე მნიშვნელოვანი შეხვედრა ჯერ კიდევ წინ არის. “ტორპედოსთან” ურთიერთ შეხვედრების კარგი სტატისტიკა გვაქვს, მაგრამ ეს არაფერს ნიშნავს და ვფიქრობ, ორივე გუნდს თანაბარი შანსი გვაქვს. ვაპირებთ, მინდორზე გამოვიდეთ და ყველაფერი გავიღოთ, რათა წარმატებას მივაღწიოთ. ჩემი აზრით, მაყურებელს საინტერესო და დაძაბული შეხვედრა ელის წინ”, – აცხადებს მიშიკო სარდალიშვილი.

საჩხერის “ჩიხურას” მეტოქე თასის ფინალში ქუთაისის “ტორპედო” იქნება.

სარდალიშვილი: “ჩიხურა” პროგრესირებს, მოტივიაცია დიდია, პირველობისთვის ვიბრძოლებთ!”

დღეს ეროვნული ლიგის მე-19 ტურის შეხვედრაში საჩხერის “ჩიხურამ” გორის “დილა” მიიღო და ანგარიშით, 4-2 დამაარცხა. ჰეთრიკი შეასრულა მიშიკო სარდალიშვილმა, რომელსაც Fanebi.Com-ი მატჩის დასრულებისთანავე დაუკავშირდა.

– შეაფასე მატჩი და გვითხარი, რის ხარჯზე მოახერხეთ მეტოქის ასე დაჯაბვნა?

– ჩემი აზრით, დღევანდელი თამაშიდან ჩანდა ის, რომ მეტად ორგანიზებულები ვიყავით, ვიდრე “დილა”. ჩვენ გვქონდა ბევრი საგოლე მომენტი, რომელებიც კარგად გამოვიყენეთ. ძირითადად, შეტევაზე ვიყავით ორიენტირებულნი – ამ ტაქტიკამ აშკარად გაამართლა, რაც შედეგზეც აისახა.

– შენ არც ისე სუსტ მეტოქეს სამი გოლი გაუტანე. შეაფასე საკუთარი ასპარეზობა.

– რაც შეეხება ჩემს თამაშს, ეს ჩემი გუნდელების  დიდი დამსახურებაა. რომ არა მათ მიერ შექმნილი საგოლე მომენტები და პასები, გოლებით ნამდვილად ვერ დავაგვირგვინებდი (იღიმის, ავტ.). რა თქმა უნდა, სასიხარულოა ის, რომ ჩემი ე. წ. “ჰეთრიკი” შედგა.

– ზოგადად რომ მითხრა, რა შანსები აქვს ჩემპიონატში “ჩიხურას” ამ სეზონში?

– რაც შეეხება “ჩიხურას” შანსებს წლევანდელ ჩემპიონატში, პროგრესის მიღწევა აშკარად შეგვიძლია, მოტივაცია ნამდვილად არ გვაკლია, ვიბრძოლებთ პირველობისთვის, ან მინუმუმ იმ შედეგს გავიმეორებთ, რაც შარშან დავაფიქსირეთ.