ჭდე: ლუკა ზიდანი

ზინედინ ზიდანის წასვლის შემდეგ, მადრიდის “რეალის” რიგებს, დიდი ალბათობით, მისი ვაჟი ლუკა ზიდანიც დატოვებს. ამ ინფორმაციას ავტორიტეტული ესპანური გამოცემა Marca ავრცელებს.

როგორც იცით, გასული სეზონი ლუკა ზიდანმა მადრიდელთა მესამე მეკარის სტატუსით ჩაატარა. თუმცა, მომავალი სეზონისთვის “ბლანკოსი” მას მნიშვნელოვან მოთამაშედ აღარ განიხილავს. ზიდანის ნაცვლად ესპანურმა გრანდმა გუნდში უკვე მიიყვანა ანდრეი ლუნინი.

ლუკა ზიდანმა “სამეფო კლუბში” 14 წელი გაატარა, გამოდიოდა ისევე როგორც ახალგაზრდულ, ასევე მთავარ გუნდში. ძირითად გუნდში მისი დებიუტი გასულ სეზონში, ესპანეთის ლა ლიგის მატჩში შედგა.

ჯერჯერობით უცნობია, თუ რომელ კლუბში გააგრძელებს კარიერას ახალგაზრდა მეკარე.

ლუკა ზიდანი “ვილიარეალთან” ჩატარებული სადებიუტო მატჩის შემდეგ აცხადებს, რომ “რეალის” მაისურით მოედანზე ყოფნისას ის ცალკეული პიროვნება, ლუკაა და არა ზინედინ ზიდანის ვაჟი.

“ჩემი დებიუტი? ერთდროულად ტკბილი და მწარე შეგრძნება დამიტოვა. ვამაყობ, რომ მსოფლიო საუკეთესო კლუბის რიგებში ვითამაშე, თუმცა სამწუხაროა, რომ მოპოვებული უპირატესობა მატჩის ბოლომდე ვერ შევინარჩუნეთ.

ყველანაირად ვეცადე, კარი მშრალად შემენახა, მაგრამ არ გამომივიდა. გაშვებული გოლები კიდევ ერთხელ უნდა ვნახო და გავაანალიზო, თუ რა მოხდა.

როდის გავიგე, რომ ჩემი დებიუტი შედგებოდა? ზიდანმა ერთი დღით ადრე მითხრა. ნამდვილად ვამაყობ, ასეთი ფეხბურთელების გვერდით რომ ვითამაშე.

რა მითხრეს თანაგუნდელებმა? მითხრეს, რომ ყოველი წამისგან მიმეღო სიამოვნება. ჩემი გვარი? როდესაც ვთამაშობ, მე ლუკა ვარ და არა ზიდანი, ” – აცხადებს ახალგაზრდა მეკარე.