დღეს ბათუმში “რაგბი არენაზე” ეროვნული ლიგა 1-ის პლეი-ოფის შეხვედრა გაიმართა, სადაც ადგილობრივმა “დინამომ” ბოლნისის “სიონს” უმასპინძლა და პენალტების სერიაში დამარცხდა.
შეხვედრის ძირითადი დრო 3:2 დასრულდა. თავდაპირველად ანგარიში ბათუმელებმა გახსნეს, მე-8 წუთზე თავი ელგუჯა გრიგალაშვილმა გამოიჩინა. აღსანიშნავია ის ფაქტი, რომ 23-ე წუთზე ვალერიან თევდორაძემ პენალტი ზუსტად ვერ გამოიყენა. ბოლნისელებმა ანგარიში 36-ე წუთზე კოშკაძის ლამაზი საჯარიმო დარტყმის შემდეგ გაათანაბრეს. მეორე ნახევარში ბათუმელები წინ გავიდნენ, 62-ე წუთზე კვასოვმა გაიტანა თავისი გოლი, ხოლო 83-ზე მარცვალაძემ სხვაობა ორამდე გაზარდა. ეს ანგარიში მასპინძლებს აძლევდა ხელს, მაგრამ “სიონის” ნახევარმცველმა ზვიად სიხარულიამ დამატებულ მეორე წუთზე მეტოქის საჯარიმოში არეულობით ისარგებლა და შეხვედრა დამატებით დროში გადაიყვანა. გამარჯვებული ვერც ამ შემთხვევაში გამოვლინდა და საქმე თერთმეტმეტრიანებამდე მივიდა. იღბალი კი სტუმართა მხარეს აღმოჩნდა და ბოლნისელებმა პენლატების სერიაში 4-2 დაამარცხეს მეტოქე.
ამ გამარჯვებით ბოლნისის “სიონმა” საქართველოს რანგით პირველ დივიზიონში ასპარეზობის უფლება მოიპოვა და ერთ წლიანი პაუზის შემდეგ ეროვნულ ლიგა 1-ს დაუბრუნდა.