დღეს, ავსტრიის დედაქალაქ ვენაში გამართულ უეფას აღმასრულებელი კომიტეტის სხდომაზე ევროტურნირების ახალი ფორმატი დაამტკიცეს.
2024-2025 წლების სეზონიდან ჩემპიონთა ლიგაზე მონაწილე გუნდთა რაოდენობა 32-დან 36-მდე გაიზრდება. ერთ საგზურს ევროპის რეიტინგით მეხუთე ეროვნული ჩემპიონატის მესამეადგილოსანი მიიღებს, ერთი დამატებით ადგილი საკვალიფიკაციო ეტაპის ე.წ. “ჩემპიონის გზით” გაირკვევა. თითო-თითო საგზურს მიიღებენ ის გუნდები, რომლებიც ევროტურნირების გასული სეზონის შედეგებით საუკეთესო რეზულტატს აჩვენებენ.
ევროთასებზე ამოქმედდება “შვეიცარიული სისტემა”. თუ მანამდე კლუბი სამი მეტოქის წინააღმდეგ ექვს შეხვედრას ატარებდა (3 შინ, 3 სტუმრად), ახალი ფორმატით თითოეული გუნდი მინიმუმ რვა მატჩს ჩაატარებს რვა სხვადასხვა მეტოქის წინააღმდეგ (4 შინ, 4 სტუმრად), რის შემდეგაც შედგება საერთო სატურნირო ცხრილი. 1-8 ადგილებზე გასული გუნდები მერვედფინალური ეტაპის საგზურს ავტომატურად მიიღებენ, 9-24 პოზიციაზე მყოფი გუნდები კი მომდევნო სტადიისთვის ერთმანეთში ორმატჩიან საპლეიოფო თამაშს ჩაატარებენ.
ასეთივე ფორმატჩი ჩატარდება ევროპის ლიგა (8 მატჩი საერთო ეტაპზე) და კონფერენციის ლიგა (6 მატჩი საერთო ეტაპზე). ამ ტურნირებზეც 36-36 გუნდი ითამაშებს.