ჭდე: u-20

საქართველოს 20–წლამდელთა ნაკრებმა ევროპული ტურნე დაასრულა. დავით უსტიაშვილის გუნდმა ლუქსემბურგში გამართულ მესამე, სპარინგ–მატჩში 14–ქულიანი მარცხი იწვნია. შესუსტებული შემადგენლობით მოთამაშე ქართველებმა მასპინძელ თანატოლთა ნაკრებთან 63:77 წააგო.

საქართველოს ნაკრებს ტრავმების გამო აკლდა 4 წამყვანი მოთამაშე – ალექსანდრე ბოლქვაძე, ლერი კვანტალიანი, სანდრო სანაძე და მერაბ მირზიაშვილი. ამასთან ერთად, ლუქსემბურგელებს წინა დღეებში ქართველებთან 2 მატჩი ჰქონდათ წაგებული  და მათი თანამემამულე მსაჯები მასპინძლების მიმართ დაუფარავ სიმპათიას გამოხატავდნენ, რამაც საბოლოოდ შედეგი გამოიღო.

მაშ ასე, საქართველოს ნაკრებმა დაასრულა ევროპული შეკრება, რომლის ფარგლებშიც 6 მატჩი გამართა. ქართველებმა რუმინეთში ადგილობრივ ნაკრებს 3–დან 2 შეხვედრა მოუგეს და იგივე შედეგი აჩვენეს ლუქსემბურგშიც, ადგილობრივ გუნდთან. საქართველოს ნაკრები თბილისში ბრუნდება და ევროპის ჩემპიონატის „ბ“ დივიზიონისთვის მზადებას აგრძელებს.

gbf.ge

2013-2014 წლების სეზონის 20-წლამდელთა ჩემპიონი შსს აკადემია გახდა, რომელმაც ქუთაისში  ფინალური სერიის განმეორებით მატჩში 73:61 იმარჯვა, სერია 2:0 მოიგო და საჩემპიონო თასს დაეუფლა.

შეხვედრის 1-ელი ნახევარი მასპინძელთა მცირედი უპირატესობით  წარიმართა, თუმცა დიდი შესვენების შემდეგ შსს აკადემიამ თამაშში მნიშვნელოვანი გარდატეხა  შეტანა  და 51:47 დაწინაურდა. დასკვნითი პერიოდი კვლავ აკადემიელთა უპირატესობით წარიმართა, ქუთაისელები მდევრის როლში იმყოფებოდნენ, თუმცა მატჩის მიწურულს გიორგი ნიკოლაძის გაწვრთნილები უფრო მობილიზებულნი აღმოჩნდნენ და საჩემპიონო თასიც დამსახურებულად  ჩაიბარეს.

ქუთაისელებს 25 ქულით ლევან გრძელიძემ ულიდერა, ორმაგი დუბლი კი 13 ქულითა და 13 მოხსნით უჩა ამრეკლიძემ შეასრულა.

ჩემპიონთა შორის 22 ქულით საუკეთესო ლევან ლოლიშვილი იყო, ორმაგი დუბლის ავტორი გახდა შოთა გელაზონია – 21 ქულა, 16 მოხსნა, 17 ქულა კი  გუნდს  ერეკლე ლორთქიფანიძემ შემატა.

მატჩის დასრულების შემდეგ გაიმართა დაჯილდოვების ცერემონიალი. ჩემპიონი გუნდი მედლებითა და სიგელებით  მსაჯთა კავშირის  პრეზიდენტმა როლანდ  ხომერიკმა დააჯილდოვა. ტრაგიკულად დაღუპული კალათბურთელის – რაჟიკო დარბაიძის სახელობის გარდამავალი თასი, რომელიც  ჩემპიონატის საუკეთესო მცველისთვისაა განკუთვნილი, ლევან გრძელიძეს გადაეცა.  საჩემპიონო თასი შსს აკადემიის გუნდის კაპიტანმა შოთა გელაზონიამ ჩაიბარა.

მატჩისშემდგომი კომენტარები:

გიორგი ნიკოლაძე („შსს აკადემიას“ მთავარი მწვრთნელი):  პირველ რიგში მივულოცავ მთლიანად შსს აკადემიის გუნდს ამ წარმატებას. მადლობა ბიჭებს მთელი სეზონის განმავლობაში ჩემი „გაძლებისთვის“. ვფიქრობ ეს გამარჯვება ნამდვილად გვეკუთვნოდა და წლევანდელ სეზონს ღირსეული ჩემპიონი ჰყავს.  შსს აკადემია მთელი ჩემპიონატის მანძილზე მობილური გუნდი იყო და ყოველთვის ფავორიტად  ითვლებოდა. განსაკუთრებული მადლობა  ჩემს ასისტენტს დავით არეშიძეს და არჩილ ჟღენტს, რომლებიც  ყველანაირად გვერდში მედგნენ და ამ წარმატებაში დიდი წვლილი მიუძღვით.

რაც შეეხება თამაშს, ვიცოდით რომ ქუთაისში რთული იქნებოდა, მით უმეტეს რომ ლერი კვანტალიანი დაგვაკლდა, მაგრამ საბედნიეროდ საჭირო დროს შევიტანეთ მატჩში გარდატეხა და ყველაფერი ჩვენს სასარგებლოდ დავასრულეთ.

და ბოლოს, ამ გამარჯვებას პირადად ჩემს მეუღლეს მივუძღვნიJ

შოთა ჯავახიშვილი („ქუთაისის“ მთავარი მწვრთნელი): კარგი ფინალი იყო. მთელი სულითა და გულით ვულოცავ შსს აკადემიას  ჩემპიონის ტიტულის მოპოვებას, ნამდვილად დამსახურებლად მოიგეს. რაც შეგვეხება ჩვენ, ვფიქრობ არც მეორე ადგილი უნდა  იყოს ურიგო.

u-20.ge

20-წლამდელთა ჩემპიონატის ფინალური სერიის პირველი მატჩი დღეს სპორტის სასახლეში გაიმართა. ჩემპიონობისთვის მებრძოლი “შსს-აკადემიისა” და “ქუთაისის” მატჩს დაძაბულობა არ აკლდა, თუმცა გამარჯვებულის გამოსავლენად ისეთი ბრძოლა არ გამართულა, ფინალს რომ შეეფერება.

“შსს-აკადემიამ” “ქუთაისს” ზედმეტი გართულებების გარეშე მოუგო და ფინალურ სერიაში 1:0 დაწინაურდა. ეს კი იმას ნიშნავს, რომ თუკი 14 აპრილს, ქუთაისში დანიშნულ მეორე შეხხვედრაშიც იმარჯვებს, “შსს-აკადემია” ჩემპიონი გახდება.

მატჩი აკადემიელთა უპირატესობით დაიწყო და ისე ჩამთავრდა, გიორგი ნიკოლაძის გუნდს საკუთარი ფავორიტობა ეჭვქვეშ არ დაუყენებია. თავში ნახსენები დაძაბულობა კი იმ მომენტს ეხება, რომელიც მატჩის დასრულებამდე 4-ნახევარი წუთით ადრე მოხდა. აკადემიელი ლერი კვანტალიანი მეტოქის ფარქვეშ შეიჭრა, მასზე კი ქუთაისელმა გიორგი ჩორგოლაშვილმა არასპორტულად ითამაშა, რითაც მას კინაღან მძიმე ტრავმა მიაყენა. კვანტალიანმა ჩორგოლაშვილისკენ გაიწია, თუმცა სიტუაცია მალევე ისე განიმუხტა, რომ ჩხუბი არ მომხდარა.

ორივე მოთამაშე მოედნიდან გააძევეს და ისინი ფინალური სერიის მეორე მატჩს გამოტოვებენ. რაც შეეხება მატჩის საბოლოო შედეგს, “შსს-აკადემიამ” შეხვედრა 61:43 მოიგო, რაშიც გამორჩეული წვლილი სწორედ კვანტალიანმა შეიტანა – 27 ქულა, 11 მოხსნა. 11 ქულა დაგროვდა ერეკლე ლორთქიფანიძის ანგარიშზე. “ქუთასში” 10-ქულიან ზღვარს მხოლოდ უჩა გამრეკლიძემ გადაბიჯა, რომელმაც 14 ქულა მითვალა.

ფინალური სერიის მეორე მატჩი ქუთაისში, 14 აპრილს გაიმართება.

მატჩისშემდგომი პრესკონფერენცია

გიორგი ნიკოლაძე(,,შსს აკადემიის’’ მთავარი მწვრთნელი): ,,ქუთაისი’’ ძალიან ღირსეული მეტოქეა, დამსახურებულად გავიდნენ ფინალში და მინდა ჩემი პატივისცემა გამოვხატო მათ მიმართ. რაც შეეხება თამაშს, ფინალი იყო და შესაბამისად, ბიჭები უფრო დაძაბულები იყვნენ, გამოუცდელები არიან და მოსალოდნელიც იყო ნაკლებად სანახაობრივი და შედეგიანი თამაში.გამარჯვებით გახარებულები ვართ. სამწუხაროდ, ბოლოს იყო ინციდენტი, რაც არ უნდა მომხდარიყო, თუმცა სპორტში ყველაფერი ხდება. გავანაალიზებთ დღევანდელ შეცდომებს, შევეცდებით გამოვასწოროთ ისინი და მაქსიმალურად მომზადებულები შევხვდეთ მეორე თამაშს ქუთაისში, რომელიც რადიკალურად განსხვავებული იქნება.

შოთა ჯავახიშვილი(,,ქუთაისის’’ მთავარი მწვრთნელი): ფინალს ყოველთვის ახლავს დაძაბულობა და ეს მატჩიც ასეთი გამოდგა. ბოლოს მართლაც არ უნდა მომხარიყო ასეთი ფაქტი, თუმცა ბიჭები გამოუცდელები არიან და თავის გაკონტროლება გაუჭირდათ. ,,შსს აკადემიამ’’ ძალიან მაღალ დონეზე ითამაშეს, დამსახურებულად გაიმარჯვეს და მივულოცავ ამ წარმატებას. ჩვენ ცოტა მეტი მობილიზება გვმართებდა, ნაკლები შეცდომა უნდა დაგვეშვა როგორც დაცვაში, ისე თავდასხმაში.ეს არ იყო ჩვენი გუნდის თამაში და ვეცდებით, გამოვასწოროთ. შანსი გვაქვს და აუცილებლად უნდა გამოვიყენოთ.

გიორგი ცირეკიძე(,,ქუთაისი’’):  მივულოცავ მეტოქე გუნდს გამარჯვებას, ძალიან ძლიერად ითამაშეს, კარგი დაცვა შემოგვთავაზეს. ჩვენი გუნდის ყველაზე დიდი მინუსი მოკლე სათადარიგო სკამია, მეტოქეს კი ამაშიც დიდი პლიუსი აქვს. ქუთაისში შევეცდებით კარგი თამაში ვაჩვენოთ და სერია გავათანაბროთ.

u-20.ge

„შსს აკადემიასა“ და „ოლიმპს“ შორის მიმდინარე ნახევარფინალურ სერიაში მე-3,  გადამწყვეტი მატჩი დაინიშნა. ზაზა ცაგარეიშვილის გაწვრთნილმა ოლიმპელებმა სერიის მეორე მატჩი დღეს აკადემიელებს მოუგეს და სერიაში ანგარიში გაათანაბრეს – 1:1.

წინა მატჩის მსგავსად, ეს შეხვედრაც დაცვითი ტაქტიკით გამოირჩა. ორივე გუნდი ფრთხილობდა და უფრო მეტ ყურადღებას საკუთარი ფარის დაცვას უთმობდა, რაც ანგარიშზეც აისახა. „ოლიმპმა“ 58:50 გაიმარჯვა.

ცაგარეიშვილის გუნდმა პირველ მეოთხედში სოლიდური უპირატესობა მოიპოვა. დაცვაში საიმედოდ მოთამაშე ოლიმპელები სწრაფ კონტრშეტევებს ახორციელებდნენ – ირაკლი მიქელაძის და ნოდარ გოგოძის შედეგიანობით პირველი მეოთხედი 22:12 მოიგეს და დამაჯერებელი თამაში მეორე პერიოდშიც განაგრძეს.

„შსს აკადემიის“ წევრები ბევრს ეცადნენ, მაგრამ ოლიმპელთა საიმედო ზონური დაცვა ვერ დაშალეს და ესე გაგრძელდა ბოლო წუთებამდე. „ოლიმპმა“ უშეცდომოდ ჩაამთავრა თამაში და ისე მივიდა გამარჯვებამდე, ვითარება არ დაძაბულა.

„ოლიმპში“ 15 ქულით ბომბარდირი ნოდარ გოგოძე გახდა, ირაკლი მიქელაძის ანგარიშზე კი 13 ქულა და 7 მოხსნა დაგროვდა. აკადემიელებში 10-ქულიანი ბარიერი მხოლოდ შოთა გელაზონიამ დაძლია, რომელმაც ორმაგი დუბლი – 12 ქულა და 13 მოხსნა მიითვალა.

„შსს აკადემიასა“ და“ოლიმპს“ შორის სერიის მე-3, გადამწყვეტი შეხვედრა 8 აპრილს, საკალათბურთო აკადემიის დარბაზში, 12:00 საათზე გაიმართება.

სტატისტიკა

მატჩისშემდგომი კომენტარები

ზაზა ცაგარეიშვილი(,,ოლიმპის’’ მთავარი მწვრთნელი): გუშინდელი დასანანი მარცხის შემდეგ ბიჭებმა სწორი დასკვნები გამოიტანეს. დღესაც მაქსიმალური კონცენტრაცია დაცვაზე გავაკეთეთ, ძალიან ცოტა ბურთი გავუშვით და ამის შედეგად გამოიკვეთა ჩვენი უპირატესობა. მთელი სეზონიდან გამომდინარე, ,,შსს აკადემია’’, რა თქმა  უნდა, ფავორიტად ითვლება, თუმცა პლეი ოფებში სხვანაირი სიტუაციაა და მესამე თამაშში შანსებს 50-50-ზე
შევაფასებდი.

გიორგი ნიკოლაძე(,,შსს აკადემიის’’ მთავარი მწვრთნელი): ვერ ვითამაშეთ და წაგებას მთლიანად ჩემს თავზე ვიღებ. მესამე შეხვედრა ყველაფერს გადაწყვეტს. რა თქმა უნდა, ასე იოლად არაფერს დავთმობთ, საბრძოლო განწყობა გვაქვს და ყველაფერი ბოლო მატჩში გამოჩნდება.

ირაკლი მიქელაძე(,,ოლიმპი’’): პირველი წაგებული თამაშის შემდეგ კონცენტრაცია მოვახდინეთ, შეცდომები გამოვასწორეთ და გავიმარჯვეთ. ვფიქრობ, თანაბარი შანსები გვაქვს. რომელი გუნდიც უკეთ იქნება ფსიქოლოგიურად მზად, ფინალშიც ის გავა.

ლერი კვანტალიანი(,,შსს აკადემია’’): მივულოცავ ,,ოლიმპს’’ გამარჯვებას. მობილიზება გვაკლდა, მოშვებულები გამოვედით თამაშზე და ბევრი შეცდომა დავუშვით. მაქსიმალურად შევეცდებით, დღევანდელი ხარვეზები მომდევნო შეხვედრისთვის გამოვასწოროთ და სასურველ შედეგს მივაღწიოთ.

u-20.ge

20-წლამდელთა ჩემპიონატში დღეს 2 მატჩი გაიმართა – ერთ შეხვედრას რუთავმა უმასპინძლა, ერთსაც – ქუთაისმა. სატურნირო თვალსაზრისით ქუთაისში უფრო მნიშვნელოვანი მატჩი გაიმართა, სადაც წაგების შემთხვევაში “აკადემია” პლეი ოფში გასვლის შანსს ეთხოვებოდა.

აკადემიელები შანსს ბოლომდე ეჭიდებოდნენ, მაგრამ გამარჯვების მოპოვება ვერ მოახერხეს. ქუთაისელებმა პირველი ტაიმის შემდეგ 21-ქულიანი უპირატესობა მოიპოვეს და მიუხედავად აკადემიელი ბექა დარახველიძის დიდი მოწადინებისა, ლიდერობა ბოლომდე შეინარჩუნეს. დარახველიძემ მიმდინარე სეზონის რეკორდი დაამყარა – 49 ქულა მოაგროვა და თავისივე რეკორდი გააუმჯობესა. მიმდინარე სეზონის საუკეთესო შედეგად 40 ქულა ითვლებოდა, რომელიც დარახველიძემ გასული წლის 1-ლ ნოემბერს, ასევე “ქუთაისთან” მატჩში ჩააგდო.

მატჩი ქუთაისელთა სასარგებლოდ – 103:95 დამთარდა და “აკადემია” პლეი ოფის მიღმა დარჩა. გამარჯვებულებს 34 ქულით გიორგი ცირეკიძემ ულიდერა, 25 ქულა და 14 მოხსნა დააგროვა უჩა გამრეკლიძემ, ხოლო ლევან გრძელიძემ მასპინძლებს 20 ქულა და 9 პასი მიაშველა.

მატჩისშემდგომი კომენტარები

ქუთაისი – აკადემია  103:95

შოთა ჯავახიშვილი(,,ქუთაისის’’ მთავარი მწვრთნელი): თავიდან სერიოზული უპირატესობა მოვიპოვეთ და ამიტომ მესამე პერიოდიდან ძირითადი სათამაშო დრო ახალგაზრდებს მივეცით, მათ უფრო ნაკლები კლასი და გამოცდილება აქვთ და ამიტომ, დიდი სხვაობით ვერ გავიმარჯვეთ, თუმცა ეს ჩვენთვის მთავარი არაა. მინდა აღვნიშნო აკადემიელი დარახველიძის ძალიან კარგი თამაში, მისი შეჩერება, ფაქტობრივად, ვერ მოვახერხეთ.

ირაკლი ტომარაძე(,,აკადემიის’’ მწვრთნელი): ვულოცავ ,,ქუთაისს’’ გამარჯვებას, ძალიან კარგი გუნდი ჰყავთ და წარმატებებს ვუსურვებ. რაც შეგვეხება ჩვენ, შემოკლებული შემადგენლობით ჩავედით და ბიჭებმა ყველაფერი გააკეთეს თამაშის მოსაგებად, სამწუხაროდ, ძალები აღარ გვეყო. გუნდმა ბოლომდე იბრძოლა და მინიმალური სხვაობით დავმარცხდით.

რუსთავში გამართულ შეხვედრას რაც შეეხება, ქვემოქართლელები ლიდერ “შსს-აკადემიას” მასპინძლობდნენ, თუმცა მოიგებდნენ თუ წააგებდნენ, ამას სატურნირო თვალსაზრისით არანაირი მნიშვნელობა არ ჰქონდა. რუსთაველთათვის მთავარი მატჩი 29 მარტს გაიმართება, როცა პლეი ოფში გასვლისთვის ბრძოლაში მთავარ კონკურენტ “ოლიმპს” უმასპინძლებენ.

“რუსთავს” “შსს-აკადემია” რომც დაემარცხებინა, პლეი ოფში გასასვლელად ბოლო ტურში “ოლიმპის” ძლევა მაინც ესაჭიროებოდა. ამიტომ, დღევანდელ მატჩში რუსთაველებს დიდი ძალისხმევა არ დაუხარჯავთ. 3 მეოთხედი თანაბარი ბრძოლა მიდიოდა, ბოლოს კი “შსს-აკადემიამ”, რომელსაც ძლიერი შემადგენლობა და უფრო მეტი ამბიცია აქვს, დამსახურებულად გაიმარჯვა.

აკადემიელთა შორის 13 ქულით ბომბარდირი ლევან გოგალაძე გახდა, ხოლო ლერი კვანტალიანმა მატჩის ერთადერთი ორმაგი დუბლი – 10 ქულა და 11 მოხსნა მიითვალა. მასპინძლებს 14 ქულით, 5 პასით და 4-4 მოხსნა-ჩაჭრით ნუგზარ ტაბაღუამ ულიდერა, 15 ქულა და 7 მოხსნა კი გიორგი ოქროჭელიძის ანგარიშზეა.

ბოლო ტურში, “რუსთავს” “ოლიმპის” მინიმუმ 8 ქულით დამარცხება მართებს იმისთვის, რომ პლეი ოფში გამსვლელი მეოთხე ადგილი დაიკავოს. წინააღმდეგ შემთხვევაში, ნახევრფინალში ოლიმპელები გავლენ.

მატჩისშემდგომი კომენტარები

რუსთავი – შსს აკადემია  58:72

მიხეილ ბერუაშვილი(“რუსთავის” მწვრთნელი):  3 მეოთხედი ვებრძოლეთ “შსს-აკადემიას”, რომელსაც გაცილებით ძლიერი შემადგენლობა ჰყავს და ჩემპიონობის მთავარი კანდიდატია. გვქონდა შეცდომები, რის გამოც მატჩი წავაგეთ, მაგრამ ამ თამაშის შედეგს სატურნირო თვალსაზრისით მნიშვნელობა არ ჰქონდა. მთავარი მატჩი მომავალ კვირას გვაქვს “ოლიმპთან”, მათი სასურველი ანგარიშით დამარცხების შემთხვევაში პლეი ოფში გავდივართ.

გიორგი ნიკოლაძე(“შსს-აკადემიის” მთავარი მწვრთნელი):  წინ პლეი ოფია, ეს მატჩი კი მოსამზადებლად გამოვიყენეთ. მატჩის შედეგს არც “რუსთავისთვის” ჰქონდა პრინციპული მნიშვნელობა,. როგორც ვიცი, რუსთაველებს გადამწყვეტი შეხვედრა “ოლიმპთან” აქვს და იმ მატჩისთვის ემზადება.

u-20.ge

რეგულარული ჩემპიონატი დასასრულს უახლოვდება და მით უფრო მძაფრდება ბრძოლა პლეი ოფში გასვლისთვის. კონკრეტულად კი, გასარკვევი მხოლოდ 1 საგზურის მფლობელია, რადგან „შსს-აკადემიამ“, „ჰიუნდაიმ“ და „ქუთაისმა“ უკვე გაინაღდეს პლეი ოფში თამაში.

ნახევარფინალის ბოლო საგზურისთვის 3 გუნდი იბრძვის, რომელთაგან ერთ-ერთმa, „ოლიმპმა“ დღეს საკალათბურთო აკადემიაში ითამაშა. ზაზა ცაგარეიშვილის გუნდის მეტოქე მეორეადგილოსანი „ჰიუნდაი“ იყო. ოლიმპელებს ჰაერივით სჭირდებოდათ გამარჯვება, მაგრამ შედარებით ძლიერ მეტოქესთნ ვერაფერი გააწყვეს.

მატჩი 7-ქულიანი სხვაობით დასრულდა, თუმცა დაძაბული არ ყოფილა. „ჰიუნდაი“ მესამე მეოთხედამდე სოლიდურ უპირატესობას ფლობდა, რაც 23-ქულიანი ლიდერობით გამოხატა და ბოლო პერიოდს აზრი დაუკარგა. დასკვნითი ათწუთეული ოლიმპელებმა 27:11 მოიგეს და თავიანთ წაგებას ღირსეული იერი მისცეს.

გამარჯვებულთაგან 22 ქულა დააგროვა სანდრო ბოლქვაძემ, 21 – კახა გიორგაძემ, ლუკა ბულიავას ანგარიშზე კი 18 ქულა დაგროვდა. „ოლიმპში“ ბომბარდირი 25 ქულის მომგროვებელი გიორგი იაკობიძე გახდა, თემურ ფხაკაძემ კი ორმაგი დუბლი – 18 ქულა და 17 მოხსნა მიითვალა.

მატჩისშემდგომი კომენტარები

ნიკოლოზ ჩერქეზიშვილი (,,ჰიუნდაის’’ მთავარი მწვრთნელი): თავიდან ძალიან კარგად დავიწყეთ. ყველაფერი ნორმალურად მიდიდოდა და თითქმის ყველა მოთამაშით  კმაყოფილი ვიყავი, მაგრამ შემდეგ სიტუაცია შეიცვალა, არადა 24 ქულას ვიგებდით. გამძლეობაზე სერიოზულად გავქვს სამუშაო. ვფიქრობ, ეს ან დაღლის ბრალი იყო,  ან ზედმეტი თავდაჯერებულობის.

ზაზა ცაგარეიშვილი (ოლიმპის მთავარი მწვრთნელი): პირველ რიგში, მივულოცავ „ჰიუნდაის“ ამ გამარჯვებას, მართლაც საინტერესო თამაში გამოვიდა. თავიდან მართალია ბევრი ხარვეზი გვქონდა შეტევაში, მაგრამ შემდეგ მოვახერხეთ  მობილიზება და ცოტა დაგვაკლდა სენსაციამდე.  ამ შეხვედრაზე ჩვენ აქცენტს არ ვაკეთებდით და რამოდენიმე მოთამაშეც კი დავასვენეთ, მარამ შემდგომ მატჩებზე, სადაც პლეი ოფისთვის მოგვიწევს ბრძოლა, ყველაფერს გავაკეთებთ სასურველი შედეგის მიღწევისთვის.

ჰიუნდაი – ოლიმპი 84:77 

დღეს გამართულ მეორე მატჩში ერთმანეთს ბოლო ადგილზე მყოფი „სოხუმი“ და პლეი ოფში მესამე გუნდად გასული „ქუთაისი“ შეხვდნენ. 9:29 წაგების შემდეგ სოხუმელებმა ძლიერად ჩაატარეს პერიოდი და სოლიდური ჩამორჩენა ჯერ გააბათილეს და შემდეგ დაწინაურდნენ კიდეც – 48:46.

მოპოვებული ლიდერობის შენარჩუნება „სოხუმმა“ ვერ შეძლო და ბოლო პერიოდის ჩაგდების შემდეგ 19 ქულით – 61:80 დამარცხდა. ქუთაისელებს 29 ქულით და 21 მოხსნით უჩა გამრეკლიძემ ულიდერა, ლევან გრძელიძემ 20 ქულა, 9 პასი და 7 მოხსნა მიითვალა, რატი ნუცუბიძის ანგარიშზე 12 ქულა დაგროვდა. სოხუმელთაგან 16 ქულით საუკეთესო შედეგი გურამ კენჭიაშვილს ჰქონდა.

მატჩისშემდგომი კომენტარები

თემურ კანკია(,,სოხუმის’’ მთავარი მწვრთნელი): მივულოცავ მეტოქეს მოგებას, ,,ქუთაისი’’ ჩვენზე ძლიერი გუნდია და ლოგიკური გამარჯვება მოიპოვეს.

შოთა ჯავახიშვილი(,,ქუთაისის’’ მთავარი მწვრთნელი): ,,სოხუმი’’ ახალგაზრდა და მზარდი გუნდია, კლასით და გამოცდილებით ჩამოგვივარდებიან, ამიტომ დღევანდელ შეხვედრაში გამარჯვება არ გაგვჭირვებია. თუმცა, ჩვენმა ბიჭებმა ნაადრევად ირწმუნეს მოგების და მოეშვნენ, ამის გამო კინაღამ დავისაჯეთ.

სოხუმი – ქუთაისი 61:80 

superleague.ge

20-წლამდელთა რეგულარული ჩემპიონატი დასასრულს უახლოვდება, რის შემდეგაც პირველობისთვის ბრძოლა პლეი ოფიდან გაგრძელდება. ასაკობრივი ლიგების ხელმძღვანელობამ 20-წლამდელთა ჩემპიონატის პლეი ოფის დაწყების თარიღი დაადგინა. ტურნირის ნახევარფინალური სერიები 2 აპრილს დაიწყება.

ჩემპიონატში 7 გუნდი მონაწილეობს. მთლიანობაში 4 წრე ტარდება, რეგულარული ჩემპიონატი კი 31 მარტს დასრულდება, რის შემდეგაც ცხრილში საუკეთესო 4 გუნდი პლეი ოფში გავა. 1 ადგილზე გასული გუნდი ნახევარფინალში მე-4-ს შეხვდება, ხოლო მე-2 მე-3-ს დაუპირისპირდება.

ნახევარფინალური და ფინალური სერიები 2 გამარჯვებამდეა. წყვილში მოედნის უპირატესობა მიენიჭება იმ გუნდს, რომელიც რეგულარულ ჩემპიონატს მეტოქეზე უკეთეს პოზიციაზე დაასრულებს.

u-20.ge

20-წლამდელთა ჩემპიონატის მატჩი გაიმართა რუსთავში, სადაც სათამაშოდ აუტსაიდერი “სოხუმი” ჩავიდა და სეზონის მეორე გამარჯვება მოიპოვა. მატჩი სოხუმელებმა გუნდური თამაშის წყალობით მოიგეს, თუმცა შეიძლება ითქვას, რომ შეხვედრის ბედი შოთა გოლეთიანმა გადაწყვიტა, რომელმაც მატჩის მიწურულს, როცა მასპინძლებმა ჩამორჩენა მინიმუმამდე შეამცირეს და გამარჯვებას მიუახლოვდნენ, ზედიზედ 2 სამქულიანი ჩააგდო და რუსთაველებს წარმატების იმედი გადაუწურა.

დებიუტში უპირატესობას მასპინძლები ფლობდნენ, თუმცა სოხუმელებმა დაცვითი თამაშის ხარჯზე მატჩის სადავეების მოპოვება მოახერხეს და პირველი მეოთხედის მიწურულს ლიდერობას დაეპატრონნენ – 19:18. მეორე მეოთხედიდან თემურ კანკიას გაწვრთნილმა სოხუმელებმა ტემპს უმატეს, დაცვა კი კიდევ უფრო გაალიერეს და შედეგიც მოიმკეს. დიდი შესვენებისთვის სტუმრებმა 10-ქულიანი ლიდერობა მოიპოვეს – 35:25.

მესამე პერიოდის დასაწყისში სოხუმელთა უპირატესობამ 14 ქულას უწია, თუმცა რუსთაველებმა თამაში დაალაგეს, სწორი ტაქტიკისა და ზუსტი სროლების ხარჯზე ჩამორჩენა მინიმუმამდე შეამცირეს, თუმცა წინ გასვლა ვერ მოახერხეს და ბოლო ათწუთეულის წინ 4 ქულას აგებდნენ – 44:48.

ბოლო მეოთხედში მასპინლებმა გამარჯვებისკენ გაიწიეს, მათ ჩამორჩენა რამდენჯერმე 1 ქულამდე შეამცირეს, მაგრამ დაწინაურება ვერ მოახერხეს. თამაშის დასრულებამდე 1,10 წუთით ადრე სხვაობა 1 ქულა იყო, როცა შოთა გოლეთიანმა ზუსტი სამქულიანით 59:55 დააწინაურა “სოხუმი”. რამდენიმე წამში რუსთაველმა ირაკლი წიქარიშვილმაც 3-ქულიანი ჩააგდო და სხვაობის მინიმუმამდე შემცირებით მასპინძლებს წარმატების შანსი უბოძა, თუმცა ბოლო წუთი ახალდაწყებული იყო, გოლეთიანმა ისევ სამიანი რომ ჩააგდო და მატჩის ბედი სოხუმელთა სასარგებლოდ გადაწყვიტა.

გამარჯვებულებს 31 ქულით გურამ კენჭიაშვილმა ულიდერა, გოლეთიანმა კი სოხუმელებს 15 ქულა შესძინა. 6 ქულა და 14 მოხსნა დააგროვა ვოვა ბულიგინმა. მასპინძლებში 19 ქულით  გიორგი დვალი გამოირჩა, ხოლო ლევან ურიდიამ შეხვედრა 17 ქულითა და 16 მოხსნით დაასრულა.

მატჩისშემდგომი კომენტარები:

თემურ კანკია, “სოხუმის” მთავარი მწვრთნელი:

“ბრძოლისა და კარგი დაცვითი თამაშის  წყალობით დამსახურებული გამარჯვება მოვიპოვეთ. მასპინძლებმა ბოლო მეოთხედში დიდი ძალებით შემოგვიტიეს, რასაც დაცვის ხარჯზე გავუმკლავდით. აღსანიშნავია, რომ რუსთაველებმა ბევრი ბურთი ააცილეს, რაც გახდა კიდეც მათი წაგების მიზეზი. მოხარული ვარ, რომ სეზონში მეორე გამარჯვება მოვიპოვეთ და ვეცდებით, დარჩენილ მატჩებშიც ჩვენი მაქსიმუმი გამოვავლინოთ”.

ირაკლი ჯაფარიძე, “რუსთავის” მთავარი მწვრთნელი:

“ბევრი შეცდომა დავუშვით, განსაკუთრებით გადამწყვეტ მომენტში. არაერთხელ გვქონდა დაწინაურების შესაძებლობა, თუმცა გადამწყვეტ ეპიზოდში ჩვენი კალათბურთელები უპატიებელ შეცდომებს უშვებდნენ. ბოლო წუთზე კი ისეთი 2 სამქულიანი მივიღეთ, რომელმაც მატჩის ბედი გადაწყვიტა. საქმე ამ სამქულიანებამდე არ უნდა მიგვეყვანა, თუმცა მეტოქემ ბოლომდე ბრძოლით ამის საშუალება არ მოგვცა და გამარჯვებას მიაღწია, რასაც ჩვენი გუნდის სახელით ვულოცავ სოხუმელებს”.

საკალათბურთო აკადემიაში 20-წლამდელთა ჩემპიონატის მორიგი მატჩები გაიმართა, რომლებშიც ფავორიტად მიჩნეულმა გუნდებმა იმარჯვეს. გათამაშების 1-2 ადგილებზე მყოფი გუნდები ცხრილის ქვედა ნაწილში მყოფ კლუბებს ხვდებოდნენ და ისე მოიპოვეს დაგეგმილი გამარჯვებები, პრობლემები არ შექმნიათ.

პირველ მატჩში ერთმანეთს ცხრილში მეორე ადგილზე მყოფი „ჰიუნდაი“ და „აკადემია“ დაუპირისპირდნენ. აკადემიელებმა საწყის 2 მეოთხედში იბრძოლეს და „ჰიუნდაის“ ღირსეული წინააღმდეგობა გაუწიეს. დიდი შესვენებისთვის ნიკო ჩერქეზიშვილის გაწვრთნილი გუნდი 39:33 იგებდა, რაც გელა წულაძის გუნდისთვის წარმატების იმედს იძლეოდა.

მესამე პერიოდში „ჰიუნდაიმ“ თამაშზე სრული კონტროლი დააწესა და საკუთარ ლიდერობას ისეთი სიდიდე მისცა, ბოლო პერიოდს აზრი დაუკარგა. მესამე ათწუთეულში ჩერქეზიშვილის გუნდმა 33:20 იმარჯვა, 19 ქულით დაწინაურდა, რითაც მატჩის ბედი გაარკვია. დარჩენილ მეოთხედში აკადემიელებმა მოინდომეს, რაც ჩამორჩენის მხოლოდ შემცირებას გასწვდა და მატჩი „ჰიუნდაის“ გამარჯვებით – 87:75 დასრულდა.

გამარჯვებულთაგან 24 ქულით საუკეთესო სანდრო ბოლქვაძე გახლდათ. 16 ქულა და 9 მოხსნა დააგროვა კახა ტომარაძემ. სანდრო სანაძის ანგარიშზე 12 ქულა, 6 მოხსნა და 6 პასი დაგროვდა, ვალერი ბიჭაშვილმა კი ორმაგი დუბლი – 11 ქულა და 10 მოხსნა დააგროვა. „აკადემიაში“ ორნი გამოირჩნენ – ნიკა ამირხანაშვილი – 26 ქულა, ბექა დარახველიძე – 25.

„ოლიმპთან“ მატჩი „შსს-აკადემიამ“ მძლავრად დაიწყო. პირველი მეოთხედის 19:7 მოგების შემდეგ, მეორე პერიოდში 25:9 დაწინაურდა, თუმცა ოლიმპელებმა მოახერხეს მობილიზება და პირველი ტაიმის ბოლოს აკადემიელებს 19:27 მიუახლოვდნენ.

მესამე პერიოდი თანაბარ ბრძოლაში გაილია და გადამწყვეტ პერიოდში უნდა გარკვეულიყო, მოახერხებდნენ თუ არა ოლიმპელები ფავორიტის დამარცხებას. გიორგი ნიკოლაძის გაწვრთნილმა „შსს-აკადემიამ“ ბოლო მეოთხედი დამაჯერებლად ჩაატარა და თამაში ლოგიკურ გამარჯვებამდე მიიყვანა – 59:48.

აკადემიელებს 19 ქულითა და 11 მოხსნით შოთა გელაზონიამ ულიდერა, 13 ქულა კი ლევან გორდულაძის ანგარიშზე დაგროვდა. „ოლიმპში“ 15 ქულით საუკეთესო თენგო ხუციშვილი იყო, 13 ქულა კი ბექა ნადირაძის ანგარიშზეა.

მატჩისშემდგომი კომენტარები

ჰიუნდაი – აკადემია  87:75

ნიკოლოზ ჩერქეზიშვილი(,,ჰიუნდაის’’ მთავარი მწვრთნელი): ,,აკადემია’’ ტანდაბალი გუნდი და საკმაოდ უხერხული მეტოქეა, როდის გაგასწრებენ, არ იცი. ჩემი გუნდის თამაშით კმაყოფილი ვერ ვიქნები, ბიჭები არ არიან ფორმაში, ბევრი ავადმყოფობდა და ზოგს ჯერ კიდევ ტრავმები აწუხებს. იმედია, ფინალამდე მისასვლელად ძალები გვეყოფა.

გელა წულაძე(,,აკადემიის’’ მთავარი მწვრთნელი): მეტოქემ გვაჯობა და დამსახურებულად მოიგო, დაცვაში ძალიან ცუდად ვითამაშეთ და ბევრი სწრაფი შეტევა გავუშვით.

შსს აკადემია – ოლიმპი  59:48

გიორგი ნიკოლაძე (,,შსს აკადემიის’’ მთავარი მწვრთნელი): მხოლოდ შედეგით და მატჩის მეორე ტაიმში დაცვაში თამაშით ვარ კმაყოფილი. ბიჭებს გუნდური სულისკვეთება აკლდათ და შეტევაშიც ვერ ვიასპარეზეთ სათანადოდ. ამ მხრივ თამაში გამოსაწორებელი გვაქვს და პლეიოფს მაქსიმალურად მზად უნდა შევხვდეთ.

ზაზა ცაგარეიშვილი (,,ოლიმპის’’ მთავარი მწვრთნელი): მივულოცავ ,,შსს აკადემიას’’ გამარჯვებას. გუნდში ტრავმებმა იმატა და, სამწუხაროდ, დღეს კიდევ ერთი მოთამაშე, ნიკა ბაქრაძე დაგვიშავდა. მიუხედავად ამისა, შესუსტებული შემადგენლობით ვცდილობთ ჩვეული ფორმის შენარჩუნებას. მაქსიმალურად ვიბრძოლებთ პლეიოფისთვის და ქუთაისში მნიშვნელოვანი შეხვედრისთვის სერიოზულად მოვემზადებით.

superleague.ge