ორიგი: “ამას ჩვენს შვილებსა და შვილიშვილებს მოვუყვებით”

უეფას ევროპის ლიგის მეოთხედფინალური ეტაპის საპასუხო მატჩში “ლივერპულმა” დორტმუნდის “ბორუსია” დრამატულ ბრძოლაში ანგარიშით 4:3 დაამარცხა და ტურნირის ნახევარფინალში თამაშის უფლება მოიპოვა. მატჩის შესახებ კომენტარი გააკეთა დივოკ ორიგიმ, რომელმაც მერსისაიდელთაგან პირველი გოლი გაიტანა.

“ჩვენ ამას ჩვენს შვილებსა და შვილიშვილებს მოვუყვებით. როდესაც პირველი გოლი გავიტანეთ, ვიგრძენით, რომ საოცარი დღე გვექნებოდა”, – ციტირებს ორიგის სიტყვებს “ბიბისი”.

 

“ლივერპული” ორიგის იანვარში დაიბრუნებს

“ლივერპულს” ახალგაზრდა ბელგიელი თავდამსხმელი დივოკ ორიგი “ლილში” სეზონის ბოლომდე ჰყავს განათხოვრებული, თუმცა მერსისაიდული გუნდის ხელმძღვანელობამ იჯარის ვადამდე გაწყვეტა გადაწყვიტა, რისთვისაც ფრანგული კლუბისთვის ექვსი მილიონი ფუნტის გადახდა მოუწევს.

როგორც მოგეხსენებათ, დანიელ სტარიჯს სერიოზული ტრავმა აქვს, მარიო ბალოტელის კი ამ დრომდე ვერ უპოვია საკუთარი თამაში. ამ პრობლემების გათვალისწინებით, ბრენდან როჯერსმა “ლილში” გასხვისებული ორიგის ნაადრევად დაბრუნება გადაწყვიტა.

ფიფას ოფიციალური ვებგვერდის ჟურნალისტის და საფრანგეთის ჩემპიონატის ექსპერტ ენდი სკოტის თქმით, ორიგის ვადამდე ადრე დაბრუნების შემთხვევაში, “ლივერპულს” “ლილის” სასარგებლოდ ექვსი მილიონი ფუნტის გადახდა დაეკისრება.

შეგახსენებთ, რომ “ლივერპულმა” დივოკ ორიგი ზაფხულის სატრანსფერო პერიოდში სწორედ “ლილისგან” შეიძინა და იმავე “ლილში” სეზონის ბოლომდე გაანათხოვრა.

 

ორიგი: “ლივერპულში” სურთ, მსოფლიოს ერთ-ერთ საუკეთესო ფეხბურთელად ვიქცე”

“ლივერპულის” ახალწვეულმა დივოკ ორიგიმ აღნიშნა, რომ მერსისაიდულ გუნდში შეეცდება, მსოფლიოს მასშტაბით ერთ-ერთ საუკეთესო ფეხბურთელად ჩამოყალიბდეს. “წითლებმა” ბელგიელი თავდამსხმელი მიმდინარე სატრანსფერო პერიოდში ფრანგული “ლილისგან” შეიძინეს, თუმცა იმავე “ლილში” ერთწლიანი ვადით გაასხვისეს.

“ბრენდან როჯერსს სურს, რომ მსოფლიოს ერთ-ერთი საუკეთესო ფეხბურთელი გავხდე. “ლივერპული” დიდი ხნის განმავლობაში მაკვირდებოდა. როდესაც კლუბის ბაზაზე პირველად მივედი, 15 წლამდე ნაკრებში ჩემ მიერ ჩატარებული მატჩების ვიდეოჩანაწერები მანახეს. ყველამ მიცნო. წარმოუდგენელია“, – ციტირებს ორიგის სიტყვებს ბრიტანული “დეილი მეილი”.

19 წლის ფეხბურთელმა იმის შესახებაც ისაუბრა, თუ რა გრძნობები დაეუფლა გუნდის ძირითადი შემადგენლობის წევრებთან შეხვედრისას.

“შოკში ვიყავი. სტივენ ჯერარდმა მისაყვედურა, როგორც გელოდით, ისე სწრაფად არ მოხვედიო. დანიელ სტარიჯიც გავიცანი, ძალიან კარგი ბიჭია”, – აღნიშნა ორიგიმ.

დივოკ ორიგი საყოველთაო ყურადღების ცენტრში ბრაზილიაში გამართული მსოფლიოს ჩემპიონატის მიმდინარეობის დროს მოექცა. მან ბელგიის ნაკრების მიერ მუნდიალზე ჩატარებულ ხუთივე მატჩში მიიღო მონაწილეობა და ერთი ბურთი გაიტანა. სწორედ მისი კინკილა გოლის წყალობით დაამარცხეს ბელგიელებმა რუსები. ორიგი ყველაზე ახალგაზრდა მოთამაშე გახლავთ, რომელმაც 2014 წლის მსოფლიოს ჩემპიონატზე ბურთი გაიტანა. გარდა ამისა, მსოფლიოს ჩემპიონატების ისტორიაში იგი ყველაზე ახალგაზრდა ბელგიელი მოთამაშეა, რომელმაც გოლის გატანა შეძლო.

რაც შეეხება საკლუბო დონეზე ასპარეზობას, მან საფრანგეთის ჩემპიონატის გასულ გათამაშებაში 30 შეხვედრა ჩაატარა და 5 გოლი გაიტანა.

 

ოფიციალურად: ორიგი “ლივერპულის” ფეხბურთელია, თუმცა კვლავ “ლილში” ითამაშებს

“ლივერპულმა” ფრანგული “ლილის” თავდამსხმელი დივოკ ორიგი გაიფორმა.

აქვე ცნობილი ხდება, რომ 19 წლის ბელგიელი თავდამსხმელი იჯარის წესით კარიერას “ლილში” განაგრძობს. საიჯარო პერიოდი 2014/15 წლების სეზონს მოიცავს.

დივოკ ორიგი საყოველთაო ყურადღების ცენტრში ბრაზილიაში გამართული მსოფლიოს ჩემპიონატის მიმდინარეობის დროს მოექცა. მან ბელგიის ნაკრების მიერ მუნდიალზე ჩატარებულ ხუთივე მატჩში მიიღო მონაწილეობა და ერთი ბურთი გაიტანა. სწორედ მისი კინკილა გოლის წყალობით დაამარცხეს ბელგიელებმა რუსები. ორიგი ყველაზე ახალგაზრდა მოთამაშე გახლავთ, რომელმაც 2014 წლის მოსფლიოს ჩემპიონატზე ბურთი გაიტანა. გარდა ამისა,  მსოფლიოს ჩემპიონატების ისტორიაში იგი ყველაზე ახალგაზრდა ბელგიელი მოთამაშეა, რომელმაც გოლის გატანა შეძლო.

რაც შეეხება საკლუბო დონეზე ასპარეზობას, მან საფრანგეთის ჩემპიონატის გასულ გათამაშებაში 30 შეხვედრა ჩაატარა და 5 გოლი გაიტანა.

“უბედნიერესი ვარ, რომ ჩემით ისეთი დიდი კლუბი დაინტერესდა, როგორიც “ლივერპულია”. ყოველთვის ვოცნებობდი დიდ კლუბში თამაშზე. “ლივერპულს” დიდებული ისტორია აქვს. ჩემი მთავარი უპირატესობები სისწრაფე, ტექნიკა და შეტევის დასრულების უნარია. მინდა, რომ კიდევ უფრო განვვითარდე. ევროთასებზე თამაშის შესაძლებლობა მექნება. ჩემთვის სასარგებლო იქნება “ლილში” კიდევ ერთი სეზონის განმავლობაში თამაში. ხალხი ჩემზე მუდმივად ამბობს, რომ ნიჭიერი ვარ, თუმცა კვლავ და კვლავ მუშაობა მომეთხოვება. გასულ სეზონში “ლივერპულის” თითქმის ყველა მატჩი ვნახე. გუნდმა შესანიშნავი სეზონი ჩაატარა. ჩვენ ვიხილეთ გამოცდილებისა და ახალგაზრდების კომბინაცია ჩინებული მწვრთნელის თავკაცობით. სასიამოვნო იყო “წითლების” თამაშის ცქერა. ბელგიის ნაკრებისა და “ლივერპულის” კიპერმა სიმონ მინიოლემ კლუბის შესახებ ბევრი კარგი რამ მიამბო. მან მითხრა, რომ ეს ჩემთვის იდეალური კლუბია. ახალგაზრდული გუნდია, რომელიც კიდევ გაიზრდება“, – ორიგის სიტყვები “ლივერპულის” ოფიციალურ ვებგვერდზე გამოქვეყნდა.

დივოკ ორიგის ტრანსფერის შესახებ კომენტარი გააკეთა მერსისაიდული გუნდის თავკაცმა ბრენდან როჯერსმაც.

„მოხარული ვარ, რომ მსოფლიოს ერთ-ერთი ყველაზე ნიჭიერი ფეხბურთელი დავიმატეთ. ეს 19 წლის ბიჭი სცენაზე მსოფლიოს ჩემპიონატის მსვლელობის დროს შემოიჭრა, თუმც ჩვენ მას მანამდეც ვაკვირდებობით. ორიგის ყველაფერი აქვს იმისთვის, რომ მსოფლიო დონის მოთამაშე გახდეს: სწრაფია, ტექნიკურია, ძლიერი და აგრესიულია. მასში შრომისადმი სიყვარულსაც ვაფასებ. დამდეგ სეზონს “ლილში” გაატარებს, შემდეგ კი მისი სახით შესანიშნავ ფეხბურთელს მივიღებთ”, – აღნიშნა როჯერსმა.