გარი ნევილი: “ვერ გამიგია, რატომ გაყიდა “მანჩესტერ იუნაიტედმა” უელბეკი “არსენალში”

“მანჩესტერ იუნაიტედის” ყოფილმა ფეხბურთელმა გარი ნევილმა განაცხადა, რომ მისთვის გაუგებარია, თუ რატომ მიჰყიდა კლუბმა დანი უელბეკი ლონდონის “არსენალს”. ნევილისთვის ამ ტრანსფერის ღირებულებაც გასაკვირია.

“ვერ გამიგია, რატომ გაყიდა “მანჩესტერ იუნაიტედმა” უელბეკი. ამ ზაფხულს მომხდარი ტრანსფერების ღირებულებების გათვალისწინებით, ჩემთვის გაუგებარია, როგორ იყიდა “არსენალმა” ეს ფეხბურთელი მხოლოდ 16 მილიონ ფუნტ სტერლინგად. კლუბები მარცხენა და მარჯვენაფლანგელ მცველებს 15 მილიონად ყიდულობენ და “მანჩესტერ იუნაიტედმა” უელბეკი მხოლოდ 16 მილიონად დათმო. უცნაურია. გუნდი დატოვა ცენტრალურმა თავდამსხმელმა, რომელიც საუკეთესო ოთხეულში მოხვედრისთვის “მანჩესტერ იუნაიტედის” უშუალო კონკურენტს შეუერთდა. ამ გადაწყვეტილებაში ლოგიკას ვერ ვხედავ”, – ციტირებს ნევილის სიტყვებს “თოქსპორტი”.

შეგახსენებთ, რომ დანი უელბეკი “მანჩესტერ იუნაიტედიდან” “არსენალში” ზაფხულის სატრანსფერო ფანჯრის დახურვამდე რამდენიმე წუთით ადრე გადავიდა.

 

საინტერესო დიალოგი გარი ნევილსა და კარაგერს შორის

„ლივერპულისა“ და „მანჩესტერ იუნაიტედის“ ყოფილი მცველები ჯეიმი კარაგერი და გარი ნევილი ტელეკომპანია „სქაი სპორტსის“ საფეხბურთო ექსპერტები არიან და ხშირად სტუდიაში ერთადაც სხედან. მათ შორის მეგობრული ურთიერთობაა, თუმცა ხანდახან ერთმანეთს კბილსაც გაჰკრავენ ხოლმე. ორიოდე დღის წინათ პირდაპირ ეთერში მათ შორის საინტერესო დიალოგი შედგა.

გარი ნევილი: „ჩემთვის სეზონის საუკეთესო მწვრთნელი ბრენდან როჯერსია“.

ჯეიმი კარაგერი: „გარი, მომისმინე. შენ რაც არ უნდა თქვა, „ლივერპულის“ ქომაგები მაინც არასდროს შეგიყვარებენ, ამიტომ ნუ ეცდები“.

გარი ნევილი: „სამაგიეროდ, შენ „ევერტონის“ ფანი ხარ“.

ცნობილი ფაქტია, რომ კარაგერი ბავშვობაში სწორედ „ევერტონს“ ქომაგობდა.

ბექა დოგრაშვილი