11 მაისს, მეორე ლიგის დასავლეთ ზონაში ქუთაისის სტადიონზე ბაღდათის “საირმესა” და ვანის “სულორს” შორის გამართულ შეხვედრას 4 000 მაყურებელი დაესწრო. აღსანიშნავია, რომ ამ გუნდების მატჩი 5 მაისს 67-ე წუთზე ჩაიშალა.
ქუთაისში დანიშნული გადათამაშება კი “სულორის” გამარჯვებით, 5:1 დასრულდა, რითაც ვანელებმა პირველ ლიგაში დაბრუნების შანსი შეინარჩუნეს. ამჟამად მეორე ლიგის დასავლეთ ზონას ვანელები ხონის “იმერეთთან” ერთად ლიდერობენ.
შაბათს, 21 თებერვალს, უმაღლეს ლიგასთან ერთად მეორე ეტაპი პირველ ლიგაშიც დაიწყო. თუმცა, უმაღლესისგან განსხვავებით, პირველ ლიგაში ტური არასრული გამოდგა.
უცნობი მიზეზის გამო “ჭიათურასა” და თბილისის “სასკოს” შორის გასამართი შეხვედრა გადაიდო. როგორც შემდეგ გაირკვა, “სასკოს” ფინანსური პრობლემები ჰქონია და გუნდი ფაქტობრივად დაშლილი ყოფილა. მოთამაშეთა უმეტესობა სხვა გუნდებში გადავიდა, კლუბის ხელმძღვანელებმა კი “სასკოს” გაყიდვა გადაწყვიტეს.
თბილისური კლუბის ყიდვის სურვილი მეორე ლიგის ბინადრებს, გურჯაანის “ალაზანს” და ჩხოროწყუს “სამეგრელოს” ჰქონდათ. საბოლოოდ, თბილისელებს უკეთესი პირობები “სამეგრელოს” მესვეურებმა შესთავაზეს და კლუბიც მათი საკუთრება გახდა. დაუდასტურებელი ინფორამციით “სასკო” 50 000 დოლარად გაიყიდა.
ვრცელდებოდა ინფორამცია იმის შესახებ, თითქოს პირველ ლიგაში “სასკოს” “სამეგრელო” ჩაანაცვლებდა და მეგრული კლუბი ასპარეზობას თბილისური გუნდის ქულებით გააგრძელებდა. პრინციპში, ეს ასეც იქნება, თუმცა, როგორც გაირკვა, მიმდინარე სეზონს გუნდი “სასკოს” სახელით ჩაამთავრებს, რათა იურიდიული ნორმები არ დაიღვეს. ფაქტობრივად კი მოედანზე “სამეგრელოს” ფეხბურთელები იქნებიან. ამასთან ერთად მეორე ლიგაში გუნდი დიდი ალბათობით ახალგაზრდული შემადგენლობით გააგრძელებს ასპარეზობას.
მნიშვნელოვანია ისიც, რომ დასავლეთის გუნდებს “სამეგრელო” ჩხოროწყუში მიიღებს, ხოლო აღმოსავლეთის – თბილისში, “მარაკანაზე” უმასპინძლებს, სადაც პირველ ეტაპზე საშინაო თამაშებს “სასკო” ატარებდა.
ერთ-ერთი მთავარი პრობლემა კი იმ ფეხბურთელების საკითხია, რომლებიც კლუბების “ჩანაცვლების” შედეგად უგუნდოდ დარჩნენ. მათ შორის არის საქართველოს ახალგაზრდული ნაკრების კანდიდატი, მეკარე ნიკა შერმადინი, რომელსაც Fanebi.com დაუკაშირდა და სამომავლო გეგმებზე ესაუბრა.
“როგორც ვიცი “სასკო” გაიყიდა. მოთამაშეთა უმრავლესობა სხვა კლუბებში გადავიდა, ნაწილი უგუნდოდ დავრჩით, ხოლო რამდენიმემ სამწუხაროდ კარიერაც კი დაასრულა.
კლუბის ხელმძღავნელებმა გვითხრეს, რომ გუნდის გაყიდვას აპირებდნენ, რადგან მისი შენახვის საშუალება აღარ იყო. მაგრამ, იყო იმის შანსიც, რომ “სასკო” რომელიმე გუნდთან გაერთიანდებოდა და ასპარეზობას ჩველუებრივად, პირველ ლიგაში გააგრძელებდა, თუმცა, სამწუხაროდ ასე არ მოხდა, რამაც პირადად ჩემს გეგმებზეც უარყოფითად იმოქმედა.
ამჟამად უგუნდოდ ვარ და პირველი ლიგის რომელიმე გუნდში ვაპირებ მისვლას, სადაც თამაშის საშუალება მექნება. მოგეხსენებათ, მარტში 21-წლამდელთა ნაკრები შეიკრიბება და უგუნდოდ მყოფს გამოძახების შანსი არ მექნება” – გვითხრა შერმადინმა.
ამრიგად, პირველ ლიგას ძველი სახელით ახალი გუნდი შეემატება, რომელიც მეორე ლიგაში ერთ-ერთი გამორჩეული და ზედა დივიზიონში დაწინაურების კანდიდატიც იყო.
ქართულ ფეხბურთში ინვესტიციების მოზიდვა ერთ-ერთი მთავარი პრობლემა რომ არის ყველასთვის კარგადაა ცნობილი. თუმცა, ჩვენს ქვეყანაში გამონაკლისებიც არსებობს. სწორედ ასეთია მეორე ლიგის ბინადარი “მარკ სტარსი”, რომლის მეპატრონე ნიგერიელი კელვინ ოტუს ბლექია. ჩვენ თბილისური კლუბის სპორტულ დირექტორს, ირაკლი ხვედელიანს დავუკავშრდით და კლუბის ამჟამინდელ მდგომარეობაზე და სამომავლო გეგმებზე ვესაუბრეთ.
სეზონის სტარტი
გუნდმა ახალი სეზონი საკმაოდ კარგად დაიწყო. წინასწარ რამის თქმა ყოველთვის ძნელია, თუმცა განვლილი თამაშები ოპტიმისტურად ყოფნის საშუალებას გვაძლევს. გასული წლის შემდეგ შემადგენლობა 80 პროცენტით შეიცვალა. მოთამაშეთა უმეტესობა უმაღლესი და პირველი ლიგის გუნდებში თამაშობენ. ამის ფონზე, “მარკ სტარსმა” მეორე ლიგის სასტარტო მატჩებში ქულათა მაქსიმუმს მოუყარა თავი და სატურნირო ცხრილს ერთპიროვნულად ლიდერობს.
ახალი მწვრთნელები და მენეჯმენტი
“მარკ სტარსის” პრეზიდენტმა, კელვინ ოტუს ბლექმა, ყველაფერი გააკეთა იმისთვის, რომ ერთ გუნდში შეეკრიბა სხვადასხვა გუნდებში მოთამაშე გამორჩეული ფეხბურთელები. მენეჯმენტის ერთობლივი მუშაობის შედეგად, დღეს გუნდში რამდენიმე ისეთი ფეხბურთელი ირიცხება, რომელთაც უმაღლესი ლიგის გუნდებში თამაშის გამოცდილება აქვთ. “მარკ სტარსის” ღირსებას უცხოელი მოთამაშეებიც იცავენ. ძალიან მალე, ჩვენი გუნდის მაისურს მოლდოვის უმაღლესი ლიგიდან ახლახანს დაბრუნებული ოთარ კირვალიძეც მოირგებს. მთავარი მწვრთნელის, დავით მაჩიტაძისა და მისი ასისტენტის, გიორგი ჯმუხაძის ყოველდღიური შრომა დარწმუნებული ვარ, უშედეგოდ არ ჩაივლის და “მარკს სტარსი” სეზონის ბოლომდე მოწინავე პოზიციაზე დარჩება.
მიზნები
წინა სეზონის მსგავსად, მიმდინარე სეზონშიც კლუბის მთავარი მიზანი პირველ ლიგაში გადასვლა არის. გასულ სეზონში “მარკ სტარსი” ლიდერ “ბორჯომს” ერთი ქულით ჩამორჩა და სამწუხაროდ პირველი ლიგის გარეშე დარჩა. ამას მეორე ლიგის თასის გათამაშებაც ემატება, როგორც მოგეხსენებათ, “მარკ სტარსი” თასის მოქმედი ჩემპიონია და გუნდს დასამტკიცებელი აქვს, რომ ამ ტიტულს შემთხვევით არ დაეუფლა.
საფეხბურთო სკოლა
სამომავლო გეგმები მართლაც შთამბეჭდავია. საფეხბურთო სკოლის შექმნაც სწორედ ამ იდეას ემსახურება. “მარკ სტარსს” 5-დან 15 წლამდე ასაკობრივი გუნდები ეყოლება, საიდანაც ძირითადი გუნდი სამომავლო შევსებას მიიღებს. სკოლაში მოსვლა და ვარჯიში, სადაც კვალიფიციური მწვრთნელები მომავალი თაობის აღზრდაზე იზრუნებენ, ყველა მსურველს შეეძლება. წვრთნები ვარკეთილში 180 სკოლის მიმდებარე ტერიტორიაზე არსებულ მოედნებზე გაიმართება. სწავლების საფასური კი 50 ლარი იქნება. პატარები სათამაშო, სავარჯიშო და გამოსასვლელი ფორმებით იქნებიან უზრუნველყოფილი, გაივლიან უფასო სამედიცინო შემოწმებას, ითამაშებენ სფფ-ს ეგიდით გამართულ ასაკობრივ ტურნირებში და გათავისუფლებულნი იქნებიან ყველა სხვა სახის გადასახადისგან. ამჯამად, ჩვენს სკოლაში უკვე 50-ზე მეტი მოზარდია დარეგისტრირებული და იმედია მათი რიცხვი სულ მალე კიდევ უფრო სოლიდური გახდება.
