2015 წლის 28 თებერვალს დავით აბაშიძის სახელობის სტადიონის საკონფერენციო დარბაზმა ძალიან საინტერესო შეხვედრას უმასპინძლა – “ზესტაფონის” გენერალური დირექტორი მიხეილ ხუციშვილი და მარგველთა დამრიგებელი გიორგი მიქაძე ზესტაფონელ ქომაგებს შეხვდნენ.
გულშემატკივართა მხრიდან შეხვედრას ესწრებოდნენ ”ზესტაფონის” გულშემატკივართა კლუბის ხელმძღვანელები, ფან-კლუბის წევრები და რიგითი გულშემატკივრები.
უნდა ითქვას, რომ შეხვედრა საკმაოდ საინტერესოდ წარიმართა – გაიმართა გულახდილი საუბარი გუნდში დღესდღეობით არსებულ ვითარებასთან და სამომავლო გეგმებთან დაკავშირებით, გულშემატკივრისა და გუნდისათვის საჭირბოროტო საკითხებისა და ამ საკითხების მოგვარების გზების შესახებ.
კლუბის წარმომადგენლებმა მადლობა გადაუხადეს გულშემატკივრებს ერთგულებისა და თანადგომისათვის. თავის მხრივ, ქომაგებმა გუნდსა და მის ახალ სამწვრთნელო შტაბს გვერდით დგომა აღუთქვეს და მოახლოვებულ ბატალიებში წარმატება უსურვეს…
უნდა ითქვას, რომ საფეხბურთო კლუბი ”ზესტაფონი” მსგავსი ხასიათის შეხვედრების, რომელთა მიზანიც ფეხბურთისა და სპორტის პოპულარიზაცია, გუნდისა და გულშემატკივრის კიდევ უფრო დაახლოებაა, სისტემატიურად გამართვას შემდგომშიც გეგმავს …
აქვე გთავაზობთ ფოტორეპორტაჟს, რომელზეც გულშემტკივრებთან დღევანდელი შეხვედრის ფრაგმენტებია ასახული.
FCZestafoni.GE