როგორც ცნობილი სპორტული პორტალი „beIN Sports“-ი წერს, მიუნხენის „ბაიერნის“ მთავარი მწვრთნელი ხოსეპ გვარდიოლა მომავალ სეზონში, სავარაუდოდ, „მანჩესტერ სიტის“ უთავკაცებს.
ესპანელ სპეციალისტს მიუნხენელებთან ამჟამინდელი ხელშეკრულება სწორედ შემდეგ ზაფხულამდე აკავშირებს და იმ შემხვევაში, თუ მხარეები მას არ გაახანგრძლივებენ, გვარდიოლას „ქალაქელთა“ სახით, სათადარიგო ვარიანტი ექნება.
ცნობისთვის, „ბაიერნთან“ ორწლიანი მუშაობის პერიოდში გვარდიოლამ ორჯერ ბუნდესლიგის მოგება მოახერხა.
მიუნხენის „ბაიერნის“ სპორტული დირექტორის მატიას ზამერის აზრით, მისი გუნდი წარმატებას მთავარი მწვრთნელის ხოსეპ გვარდიოლას გარეშეც მიაღწევდა. ზამერმა აღნიშნა, რომ გერმანულ გრანდს მოთამაშეთა საკმაოდ ძლიერი შემადგენლობა ჰყავს.
„რა თქმა უნდ,ა მწვრთნელი გუნდს ქმნის, ფეხბურთელების ფორმირებაში მონაწილეობს და თამაშის სტილს აყალიბებს. ამის მიუხედავად, ჩვენმა მოთამაშეებმა უკვე დაამტკიცეს, რომ წარმატებით გამოსვლა შეუძლიათ. ეს მწვრთნელზე დამოკიდებული არ არის“, – ციტირებს ზამერს გამოცემა „Sport1“.
