“ლესტერ სიტიმ” ოფიციალურად დაადასტურა, რომ შაბათს მომხდარ ავიაკატასტროფას კლუბის მფლობელი ვიშაი შრივადანაპრაბჰა ემსხვერპლა.
“ღრმა მწუხარებით გატყობინებთ, რომ ჩვენი კლუბის ხელმძღვანელი ვიშაი შრივადანაპრაბჰა მათ შორისაა, ვინც შაბათს, “კინგ პაუერ სთეიდიუმის” მახლობლად ვერტმფრენის ჩამოვარდნას ემსხვერპლა. მის გარდა ბორტზე კიდევ ოთხი მგზავრი იმყოფებოდა. სიკვდილს ვერცერთი მათგანი ვერ გადაურჩა. ვიშაის სახით დავკარგეთ ძალიან კარგი, კეთილი, გულუხვი ადამიანი, რომელმაც თავისი სიცოცხლე საყვარელ ოჯახს მიუძღვნა. “ლესტერი” იყო მისი ოჯახი”, – ნათქვამია კლუბის ოფიციალურ ვებგვერდზე გამოქვეყნებულ განცხადებაში.
ბორტზე ასევე იმყოფებოდნენ შრივადანაპრაბჰას პერსონალის ორი წევრი – ნუსარ სუკნამაი და კავეპრონ პუნპარი, პილოტი ერიკ სვაფერი და მგზავრი იზაბელა როზა ლეჩოვიჩი.
შეგახსენებთ, რომ ინგლისის პრემიერლიგის მეათე ტურში “ლესტერსა” და “ვესტ ჰემ იუნაიტედს” შორის გამართული მატჩის (1:1) შემდეგ “მელიების” მფლობელის საკუთრებაში არსებული ვერტმფრენი სტადიონის მახლობლად ჩამოვარდა.
