ჭდე: რენატო სანჩესი

“ბაიერნის” პორტუგალიელმა ვარსკვლავმა, რომელსაც არენდის წესით სხვა გუნდში გადასვლას უწინასწარმეტყველებენ, პრესასთან საუბრისას გერმანიაში ჩატარებული პირველი სეზონი შეაფასა.

“ყველაფერი არც ისე კარგად წავიდა, მაგრამ მჯერა, რომ მომავალ სეზონში ყველაფერი უკეთ იქნება. მეტის მოლოდინი მქონდა, რა თქმა უნდა, მაგრამ დარწმუნებული ვარ, რომ მომავალში ყველაფერი გამოსწორდება.

ამ სეზონში რამდენიმე წუთით მომეცა თამაშის შანსი. მეტი უნდა ვიმუშავო, რათა საკმარისი ოდენობის სათამაშო პრაქტიკა მივიღო.

მომავალი? ამაზე საუბარს არ ვაპირებ, “ბაიერნში” თავს მშვენივრად ვგრძნობ. ჩემი მთავარი მიზანი მეტის თამაში და გუნდისთვის დახმარების გაწევაა,” – აცხადებს სანჩეში.

მიუნხენის “ბაიერნის” ყოფილმა თავკაცმა, ოტმარ ჰიცფელდმა რენატო სანჩესის მხარე დაიჭირა და აღნიშნა, რომ მისი არასახარბიელო ასპარეზობა აბსოლიტურად ადეკვატური მიზეზებით არის გამოწვეული.

“რენატო სანჩესის ასეთი მძიმე სტარტი მისი ახალგაზრდული ასაკითაც არის გამოწვეული. არ უნდა დავივიწყოთ, რომ ის სულ რაღაც 19 წლის არის.

ამასთანავე, “ბაიერნში” გადმოსვლისას ის ტრავმირებული იყო, რასაც მისი დიდი სატრანსფერო ფასით გამოწვეული სტრესი დაემატა, რაც ყოველთვის ახდენს ფეხბურთელზე გავლენას.

ის ბუნდესლიგის რიგით კლუბს კი არა, “ბაიერნს” შეუერთდა. ძირითადში ადგილის მოსაპოვებლად მას საკმაოდ დიდი ბრძოლის გამართვა მოუწევს. მან ეს ყველაფერი უნდა გაანალიზოს.

ვფიქრობ ნორმალურია, რომ მას თავის წარმოსაჩენად მეტი დრო სჭირდება.”