სუპერლიგის ALL STAR 2017-ის მონაწილეები ცნობილია

დასრულდა სუპერლიგის ყველა ვარსკვლავის მატჩისთვის ხუთეულების შერჩევა. ხმის მიცემის პროცედურა სუპერლიგის ოფიციალურ ვებ-გვერდზე მიმდინარეობდა. გამოკითხვის შედეგად შეირჩა სასტარტო ხუთულები, ხოლო გუნდების დარჩენილი, სათადარიგო მოთამაშეები მწვრთნელებმა დაასახელეს.

ოლ სტარი რეგიონული პრინციპით გაიმართება. ერთ გუნდში თბილისის, ხოლო მეორეში რეგიონის გუნდებიდან შერჩეული კალათბურთელები მოიყრიან თავს. შესაბამისად, დედაქალაქის გუნდში თავი მოიყარეს მოთამაშეებმა დინამოდან, კაკტუსიდან, ოლიმპიდან და მგზავრებიდან, ხოლო რეგიონში – ქუთაისის, ბათუმის, სოხუმისა და რუსთავის კალათბურთელებმა.

თბილისის გუნდის მთავარი მწვრთნელი დინამოს თავკაცი ირაკლი ხოშტარია იქნება, ხოლო მისი ასისტენტი – კაკტუსელი არჩილ ჟღენტი. რეგიონის გუნდს ქუთაისის მთავარი მწვრთნელი კოტე ტუღუში გაუძღვება, მისი ასისტენტი კი რუსთავის მწვრთნელი, რამაზ გოგობერიშვილი იქნება.

ყველა ვარსკვლავის მატჩის პარალელურად გაიმართება კონკურსები სამქულიან სროლებსა და ჩატენვებში. სნაიპერთა კონკურსში მიმდინარე სუპერლიგის საუკეთესო 5 მსროლელი მიიღებს მონაწილეობას, რომელსაც გასული ოლ სტარის ამ კონკურსის გამარჯვებული აკაკი ლომოური დაემატება. ლომოური ამჯერადაც იმყოფება სეზონის საუკეთესო 5-ეულში და ამის გამო, წლევანდელ სნაიპერთა კონკურსს მე-6 ადგილზე მყოფი გიორგი ბარბაქაძე დაემატა.

ჩატენვების კონკურსში მონაწილეობას მიიღებს 5 კალათბურთელი – ტომი სპანოლო (რუსთავი), ოთარ ბულიავა, უეიდ ლათანი (ორივე სოხუმი), ტერიკ ბრიჯმენი (კაკტუსი) და დეანდრე რეი (დელტა, ა ლიგა).

ოლ სტარის გამორჩეული მოთამაშეებისთვის კალათბურთის ფედერაციის სპონსორებმა და პარტნიორებმა საჩუქრები დააწესეს. ეროვნული ნაკრებისა და სუპერლიგის გენერალური პარტნიორი, აზარტული თამაშების კომპანია „ევროპა ბეთი” ოლ სტარის MVP-ის 1000 ლარით დაასაჩუქრებს, ხოლო სამქულიანების კონკურსისა და ჩატენვების კონკურსების გამარჯვებულებს – 500-500 ლარით. ყველა ვარსკვლავის მატჩი-აქციის პარტნიორი, საერთაშორისო ქსელ „სნეპ-ფიტნესის” საქართველოს ფილიალი MVP-სა და ორივე კონკურსის გამარჯვებულებს ერთთვიან სასაჩუქრე ვაუჩრს გადასცემს.

სუპერლიგის ყველა ვარსკვლავის მატჩი-აქცია თბილისის ოლიმპიურ სასახლეში, 28 იანვარს, 14:00 საათზე გაიმართბა.

superleague.ge