ჭდე: ეროვნული ლიგა

22, 23 და 24 სექტემბერს ეროვნულ ლიგაში 27-ე ტურის მატჩები გაიმართება.

ტურის პირველ შეხვედრაში სამტრედიის ეროსი მანჯგალაძის სახელობის სტადიონზე ერთმანეთს ფოთის „კოლხეთი“ და ბათუმის „დინამო“ დაუპირისპირდებიან. ორივე გუნდი გადათამაშების ზონაშია და ლიგაში ადგილის შენარჩუნებისთვის იბრძვის. ბათუმელები 26 ქულით მერვე ადგილზე არიან, ფოთელები კი, 19 ქულით მეცხერეზე. მიმდინარე სეზონში გუნდებს შორის გამართული ორი შეხვედრიდან ერთი ფრედ დასრულდა ერთი კი, ანგარიშით 1:0 „დინამომ“ მოიგო.

ამავე დღეს, თბილისის „საბურთალო“ საკუთარ მოედანზე ქობულეთის „შუქურას“ უმასპინძლებს. საბურთალოელები შესანიშნავ ფორმაში არიან, მათ შვიდმატჩიანი წაუგებელი სერია აქვთ. საპირისპირო მდგომარეობაა ქობულეთელთა მხარეს. გიორგი შაშიაშვილის გუნდი ეროვნული ლიგის გამოკვეთილი აუტსაიდერია და 12 ქულით ბოლო, მეათე ადგილზეა. სატურნირო თვალსაზირისით მოახლოვებული შეხვედრა ორივე გუნდისთვის ძალიან მნიშვნელოვანია. „საბურთალო“ ევროთასებზე მოსახვედრად იბრძვის, „შუქურა“ კი, დადებითი შედეგის ჩვენების შემთხვევაში ლიგაში დარჩენის მიზერულ შანსს შეინარჩუნებს.

27-ე ტურის ორი შეხვედრა 23 სექტემბერს გაიმართება.

უშუალო კონკურენტები დაუპირისპირდებიან ერთმანეთს მიხელ მესხის სახელობის სტადიონის სათადარიგო მოედანზე. თბილისის „ლოკომოტივი“ საჩხერის „ჩიხურას“ უმასპინძლებს. გუნდებს შორის სხვაობა მხოლოდ ორი ქულაა და შესაბამისად შეხვედრის შედეგს ბევრი რამის შეცვლა შეუძლია. ლოკოს 42 ქულა აქვს და მეოთხე ადგილზეა, „ჩიხურა“ კი, 40 ქულით მეხუთეა. ორივე კლუბი ევროტურნირებზე მოსახვედრად იბრძვის. ეს ფაქტორი კი, მოახლოვებულ მატჩს დამატებით ინტრიგას სძენს. მითუმეტეს, რომ სატურნირო ცხრილში საბოლოო პოზიციების განსაზღვრისას ურთიერთშეხვედრებში დაფიქსირებულ შედეგს უდიდეს მნიშვნელობა ექნება.

საინტერესო უნდა გამოდგეს გორის თენგიზ ბურჯანაძის სახელობის სტადიონზე გასამართი „დილასა“ და „სამტრედიას“ დაპირისპირება. გორელებმა გასულ ტურში მნიშვნელოვანი შეხვედრა მოიგეს და გადათამაშების ზონას თავი დააღწიეს. ეს კი იმას ნიშნავს, რომ გიორგი დარასელიას გუნდი გათამაშების ერთ-ერთ ლიდერს საკუთარ მოედანზე კარგი განწყობით დაუხვდება და სატურნირო ცხრილში პოზიციების გამყარებას შეეცდება. თავისმხრივ კარგ ფორმაში არიან იმერლები. გასული ტური მათთვისაც წარმატებული გამოდგა, გია ცეცაძის გუნდმა „ლოკომოტივი“ დაამარცხა და უახლოეს მდევართან სხვაობა კიდევ უფრო გაზარდა.

ტურის დასკვნით შეხვედრას 24 სექტემბერს ქუთაისი უმასპინძლებს. რამაზ შენგელიას სახელობის სტადიონზე „ქართული დერბი“ გაიმართება. დერბის მნიშვნელობასთან ერთად „ტორპედოსა“ და „დინამოს“ მოახლოვებულ დაპირისპირებას უდიდესი სატურნირო მნიშვნელობა აქვს. დინამოელები 57 ქულით ეროვნულ ლიგას ლიდერობენ, ტორპედოელები კი, 51 ქულით მეორეზე არიან. ბოლო პერიოდში დედაქალაქელები ფორმიდან ამოვარდნენ და ზედიზედ ორი ტურია ქულებს კარგავენ. ეს ფაქტი უშუალო კონკურენტი „ტორპედოსთვის“ კარგი შანსია ყველაზე პრინციპულ მეტოქეს დაეწიოს და ჩემპიონობისთვის იბრძოლოს.

Eliga.Ge

დღეს ეროვნული ლიგა 25-ე ტურით განახლდება.

Fanebi.Com-ი გთავაზობთ აღნიშნული ტურის პრევიუს.

ბათუმში, “რაგბი არენაზე” (17:00) ფოთის “კოლხეთი” “სამტრედიას” დაუპირისპირდება. მეგრელებმა წინა მატჩი გორში, ადგილობრივ “დილასთან” ანგარიშით 0:3 დათმეს. ახლა მათ 19 ქულა აქვთ და მეცხრე პოზიციაზე იმყოფებიან. რაც შეეხება “სამტრედიას”, ამ კლუბმა 24-ე ტურში პრინციპული მეტოქის, ქუთაისის “ტორპედოს” წინააღმდეგ გააგორა ბურთი და საბოლოოდ 1:1 ითამაშა. გია ცეცაძის შეგირდებს 45 ქულა აქვთ და მესამე ადგილს იკავებენ.

ქუთაისში, “რამაზ შენგელიაზე” (20:00) იმერული დერბი შედგება: ადგილობრივი “ტოპრედო” საჩხერის “ჩიხურას” წინააღმდეგ. ქუთათურებზე უკვე ვახსენეთ. მათ 24 ტურის შემდეგ 48 ქულა აქვთ და ლიდერ “დინამოს” რვა ქულით ჩამორჩებიან. რაც შეეხება “ჩიხურას”, მან “საბურთალოსთან” ითამაშა უგოლო ფრე. ახლა ის 34 ქულით მეხუთეზეა.

გადავიდეთ შაბათს გასამართ შეხვედრებზე. თბილისში, “მიხეილ მესხი 2”-ზე (17:00) “ლოკომოტივი” გორის “დილას” დაუპირისპირდება. “ლოკომ” წინა ტურში ქობულეთის “შუქურას” ბათუმში ანგარიშით, 3:1 სძლია. გიორგი დევდარიანის ბიჭებს 39 ქულა აქვთ და მეოთხეზე არიან. “დილას” მიერ “კოლხეთზე” გაამრჯვებაზე უკვე ვთქვით. ამ კლუბს 25 ქულა აქვს და მერვეზეა.

თბილისში, “დინამო არენაზე” (20:00) ადგილობრივი “დინამო” ქობულეთის “შუქურას” დაუპირისპირდება. დედაქალაქელებმა 24-ე ტურში “რაგბი არენაზე” იმარჯვეს, როცა მათ ბათუმის “დინამოს” მინიმალური სხვაბით, ანგარიშით 2:1 მოუგეს. მათ 56 ქულა აქვთ და ერთპიროვნულად ლიდერობენ გათამაშებას. რაც შეეხება “შუქურას”, იგი “ლოკომოტივთან” დამარცხდა და ახლა 11 ქულით ბოლო – მე-10 ადგილზეა.

კვირას, თბილისში, “დავით პრეტრიაშვილზე” (20:30) “საბურთალო” ბათუმის” “დინამოს” შეხვდება. ამ ორივე კლუბის მიერ წინა ტურში გამართულ შეხვედრებზე ვთქვით. ახლა იმას აღვნიშნავთ, რომ “ლოკოს” 34 ქულა აქვს და მეექვსე ადგილზეა. ხოლო, “დინამო” 26 ქულით მეშვიდეზეა.

18, 19 და 20 აგვისტოს ეროვნული ლიგის 23-ე ტურის შეხვედრები გაიმართება.

18 აგვისტოს, ბათუმის „რაგბი არენაზე“ აჭარულ დერბიში ერთმანეთს ადგილობრივი „დინამო“ და ქობულეთის „შუქურა“ დაუპირისპირდებიან. მიმდინარე სეზონზში ორივე გუნდი ეროვნულ ლიგაში ადგილის შენარჩუნებისთვის იბრძვის. განსაკუთრებით რთულ სიტუაციაში ქობულეთელები იმყოფებიან. მათ მხოლოდ 11 ქულა აქვთ და ბოლო მეათე ადგილს იკავებენ. თუმცა უნდა აღინიშნოს, რომ უკანასკნელ ორ ტურში „შუქურამ“ კარგი თამაში აჩვენა და მნიშვნელოვანი 4 ქულა მოიპოვა. რაც შეეხება ბათუმის „დინამოს“. კონსტანტინ ფროლოვის გუნდმა მესამე წრე კარგად დაიწყო. საწყის ორ ტურში ბათუმელებმა 6 ქულა აიღეს, მაგრამ შემდეგ კვლავ ჩავარდნა დაეწყოთ და ზედიზედ ორ შეხვედრაში დამარცხდნენ. როგორც ხედავთ სატურნირო მდგომარეობიდან გამომდინარე აჭარულ დერბიში დაფიქსირებულ შედეგს უდიდესი მნიშვნელობა ექნება.

19 აგვისტოს, ლიგაში ორი შეხვედრა გაიმართება.

თბილისის „საბურთალო“ „სამტრედიას“ დაუპისიპირდება. სამტრედიელები გასული სეზონის მსგავსად წელსაც ჩემპიონობისთვის იბრძვიან. თბილისელთა მთავარი მიზანი კი, ევროტურნირებზე მოხვედრაა. ორივე გუნდმა ჩემპიონატი წარმატებულად გაანაახლა და შეიძლება ითქვას, რომ მოახლოვებულ შეხვედრას ორივე კარგ ფორმაში ხვდება. აღსანიშნავია, რომ „საბურთალოს“ „სამტრედია“ უკვე ორი წელია არ დაუმარცხებია. საბურთალოელებმა მომავალი მეტოქეს ბოლოს 2015/16 წლების სეზონში მოუგეს, მას შემდეგ გამართულ ხუთ შეხვედრაში კი, ოთხჯერ დამარცხდნენ და ერთი ფრე ითამაშეს.

საინტერესო შეხვედრა გაიმართება ქუთაისში. რამაზ შენგელიას სახელობის სტადიონზე „ტორპედო“ გორის „დილას“ უმასპინძლებს. ზედიზედ ორ ტურში დაკარგული ქულების შემდეგ ტორპედოელთათვის აღნიშნულ შეხვედრაში დაფიქსირებულ შედეგეს უდიდესი მნიშვნელობა ექნება. ქუთაისური კლუბი ლიდერ თბილისის „დინამოს“ ექვსი ქულით ჩამორჩება, უახლოეს მდევარ „სამტრედიას“ კი, მხოლოდ ერთი ქულით უსწრებს. თავისმხრივ გამარჯვება სჭირდება „დილას“. გორელებს წარუმატებელი პერიოდი აქვთ და ზედიზედ ხუთი ტურია მარცხდებიან. ბუნებრივია ეს მათ სატურნირო მდგომარეობაზეც აისახა და გიორგი დარასელიას გუნდი 22 ქულით მერვე ადგილზეა.

ეროვნული ლიგის 23-ე ტური 20 აგვისტოს დასრულდება.

სამტრედიის ეროსი მანჯგალაძის სახელობის სტადიონზე ფოთის „კოლხეთი“ თბილისის „ლოკომოტივს“ უმასპინძლებს. ფოთელები უძლიერესთა შორის ადგილის შენარჩუნებისთვის იბრძვიან და მათთვის თითოეულ ქულას უდიდეს მნიშვნელობა აქვს. მითუმეტეს, რომ გასულ ტურში უშუალო კონკურენტ ქობულეთის „შუქურასთან“ დამარცხდნენ და საქმე კიდევ უფრო გაირთულეს. „ლოკოს“ განსხვავებული მიზანი აქვს. თბილისური კლუბი ევროტურნირებზე მოსახვედრად იბრძვის და რა თქმა უნდა, გამარჯვება მათთვისაც ძალიან მნიშვნელოვანია. მიმდინარე სეზონში, გუნდებს შორის გამართული სამი შეხვედრიდან ორი დედაქალაქელებმა მოიგეს, ერთი კი, „კოლხეთის“ გამარჯვებით დასრულდა.

23-ე ტურის ბოლო და ცენტრალური შეხვედრა თბილისში, „დინამო არენაზე“ გაიმართება. გათამაშების ერთპიროვნული ლიდერი, „დინამო“ საჩხერის „ჩიხურას“ უმასპინძლებს. თბილისურ და იმერულ გუნდებს შორის გამართული მატჩები ყოველთვის საინტერესო  თამაშებით გამოირჩევა და სავარაუდოა, რომ ამ შემთხვევაშიც ასე იქნება. დედაქალაქელები ლიგას დამაჯერებლად ლიდერობენ, მაგრამ კონკურენტების კარგი ასპარეზობიდან გამომდინარე ქულების დაკარგა შესაძლოა ძვირად დაუჯდეთ. თავისმხრივ რთულ მდგომარეობაშია საჩხერული კლუბი. „ჩიხურა“ თბილისურ „ლოკომოტივთან“ და „საბურთალოსთან“ ერთად ევროთასებზე მოსახვედრა იბრძვის და ამ მიზნის მისაღწევად დარჩენილ შეხვედრებში დადებითი შედეგის ჩვენება ესაჭიროება.

Eliga.Ge