ჭდე: Cristiano Ronaldo

ევრო-2016-ზე რონალდუ ცენტრფორვარდი იქნება

Posted on by ბექა დოგრაშვილი

2016 წლის ევროპის ჩემპიონატზე პორტუგალიის ნაკრების მთავარი მწვრთნელი ფერნანდუ სანტუში კრიშტიანუ რონალდუს ცენტრალური თავდამსხმელის პოზიციაზე გამოყენებას აპირებს. პორტუგალიელები, სავარაუდოდ, 4-4-2 სქემით ითამაშებენ და აქედან ერთი თავდამსხმელი სწორედ რონალდუ იქნება. სანტუში კრიშტიანუს მთლიანად გაათავისუფლებს თავდაცვითი ფუნქციებისგან.

Cadena Cope-ს ცნობით, კრიშტიანუ რონალდუმ ცოტა ხნის წინათ მადრიდის “რეალის” თავკაც რაფაელ ბენიტესს სთხოვა, რომ არა ცენტრალური თავდამსხმელის, არამედ მარცხენა გარემარბის პოზიციაზე დაეყენებინა, რადგან ამ ამპლუაში თავს გაცილებით კომფორტულად გრძნობს.

 

“ელ კლასიკოს” ჩატარების თარიღი და დრო ოფიციალურად დადგინდა

Posted on by ბექა დოგრაშვილი

ოფიციალურად დადგინდა სეზონის პირველი “ელ კლასიკოს” ჩატარების თარიღი და დრო.

ესპანეთის პრიმერადივიზიონის მე-12 ტურში მადრიდის “რეალსა” და “ბარსელონას” შორის გასამართი მატჩი 21 ნოემბერს, თბილისის დროით 21:15 (ადგილობრივი დროით 18:15) საათზე  დაიწყება.

მეორე წრეში ამავე გუნდებს შორის “ნოუ კამპზე” გასამართი შეხვედრა აპრილში უნდა ჩატარდეს.

 

ფერნანდუ სანტუში: “რონალდუ ვერ იტანს, როცა ცვლიან”

Posted on by ბექა დოგრაშვილი

პორტუგალიის ნაკრების მთავარმა მწვრთნელმა ფერნანდუ სანტუშმა კრიშტიანუ რონალდუსთან მუშაობის დეტალებზე ისაუბრა.

“კრიშტიანუს შეცვლა შეუძლებელია. იგი ვერ იტანს, როცა ცვლიან. მას ყოველთვის სურს, რომ მოედანზე იყოს.
რონალდუს დახასიათება ერთი სიტყვით ასე შეიძლება: “ამბიცია”. იგი არ დაკმაყოფილდება მეოთხე “ოქროს ბუცის” მოგებით. კრიშტიანუ მეხუთე, მეექვსე და მეშვიდე “ოქროს ბუცისთვის” იბრძოლებს”, – ციტირებს სანტუშის სიტყვებს “ასი”.

 

რონალდუ: “ჩემთვის “ოქროს ბუცზე” მნიშვნელოვანი ჯილდო არ არსებობს”

Posted on by ბექა დოგრაშვილი

მადრიდის “რეალის” ლიდერ კრიშტიანუ რონალდუს “ოქროს ბუცი” გადაეცა. პორტუგალიელი ფეხბურთელისთვის ეს კარიერაში მოგებული მეოთხე “ოქროს ბუცი” გახლავთ, რაც სარეკორდო მაჩვენებელია. ჯილდოს მიღების შემდეგ რონალდუმ ჟურნალისტები კითხვებს უპასუხა.

— რა ადგილს დაიკავებს “ოქროს ბუცი” თქვენი ჯილდოების სიაში?
— ჩემთვის ამ ჯილდოს დიდი ფასი აქვს. “ოქროს ბუცზე” მნიშვნელოვანი ჯილდო ჩემთვის არ არსებობს. თავდამსხმელის საქმე გოლების გატანაა. ევროპის მასშტაბით ოთხჯერ საუკეთესო ბომბარდირად გახდომა საოცარი რამ გახლავთ. განსაკუთრებით მნიშვნელოვანია ის, რომ “ოქროს ბუცი” ოთხჯერ არავის მოუპოვებია. ასე რომ, ეს ჯილდო ჩემთვის ძალზედ მნიშვნელოვანია, ეს ჩემი მუშაობის მტკიცებულებაა. ძალიან მიხარია, რომ “ოქროს ბუცი” ოთხჯერ მოვიგე, რაც სარეკორდო მაჩვენებელია.

— კარიერის დასაწყისში თუ ოცნებობდით ასეთ შედეგზე?
— არა. ვფიქრობდი, რომ “ოქროს ბუცს” ერთხელ ან ორჯერ მოვიგებდი და არა ოთხჯერ. ყოველ სეზონში ვცდილობ, რომ მეტი გოლი გავიტანო. ამავე შემართებით გავაგრძელებ თამაშს. თითოეული მოგებული ჯილდო ახალი გამარჯვებებისკენ მოტივაციას გძენს.

 

რონალდუს “ოქროს ბუცი” გადაეცა (ფოტო)

Posted on by ბექა დოგრაშვილი

მადრიდის “რეალის” ლიდერ კრიშტიანუ რონალდუს “ოქროს ბუცი” გადაეცა.

2014/15 წლების სეზონში პორტუგალიელმა ფეხბურთელმა 48 გოლი გაიტანა. ეს ჯილდო რონალდუსთვის მეოთხეა. მანამდე მან “ოქროს ბუცი” 2008, 2011 და 2014 წლებში დაისაკუთრა.

აღსანიშნავია ისიც, რომ მოგებული “ოქროს ბუცის” რაოდენობით რონალდუ რეკორდსმენი გახდა.

CR7

 

პელე: “მესი ბოლი ათწლეულის საუკეთესო ფეხბურთელია”

Posted on by ბექა დოგრაშვილი

ლეგენდარულმა ბრაზილიელმა ფეხბურთელმა პელემ, რომელიც ვიზიტით ინდოეთში იმყოფება, ლიონელ მესისა და კრიშტიანუ რონალდუს შესახებ ისაუბრა.

“მესი ბოლო ათწლეულის საუკეთესო მოთამაშეა. ბევრი ადარებს ერთმანეთს მესისა და კრიშტიანუ რონალდუს, თუმცა ისინი სრულიად განსხვავებული ფეხბურთელები არიან. ამასთან, ორივე მათგანი ფანტასტიური მოთამაშეა”, – ციტირებს პელეს სიტყვებს ესპანური გამოცემა “ასი”.

“ეჭვგარეშეა, რომ ფეხბურთი დღეს უფრო რთული სათამაშოა, ვიდრე ადრე, მაგრამ როდესაც ღმერთი გაძლევს განსაკუთრებულ ნიჭს, თაობას მნიშვნელობა აღარ ენიჭება”, – აღნიშნა პელემ.

ლეგენდარულმა ბრაზილიელმა იქვე ისიც განაცხადა, რომ ფიფას საპრეზიდენტო არჩევნებზე საკუთარი კანდიდატურის დაყენებას არ აპირებს.

 

რონალდუმ 2010 წლის შემდეგ პირველად მიჯრით ოთხ ტურში გოლი ვერ გაიტანა

Posted on by ბექა დოგრაშვილი

ესპანეთის პრიმერადივიზიონის მე-7 ტურში მადრიდის “ატლეტიკოსა” და “რეალს” შორის გამართული მატჩი ფრედ, ანგარიშით 1:1 დასრულდა. “სამეფო კლუბის” რიგებიდან გოლი კარიმ ბენზემამ გაიტანა, კრიშტიანუ რონალდუმ კი მოედანი გატანილი ბურთის გარეშე დატოვა. პორტუგალიელს პრიმერადივიზიონის ბოლო ოთხ ტურში გოლი არ გაუტანია. მას ასეთი რამ ერთადერთხელ, ხუთი წლის წინათ, 2010 წლის მაისიდან სექტემბრამდე პერიოდში დაემართა.

შეგახსენებთ, რომ კრიშტიანუ რონალდუს პრიმერადივიზიონის მიმდინარე გათამაშებაში ხუთი გოლი აქვს გატანილი, ხუთივე გოლი “ესპანიოლის” წინააღმდეგ გამართულ მატჩში (6:0) გაიტანა.

 

2009 წლიდან “რეალის” გოლების 40 პროცენტი რონალდუზე მოდის

Posted on by ბექა დოგრაშვილი

კრიშტიანუ რონალდუ მადრიდის “რეალში” 2009 წლის ზაფხულში გადავიდა. ამ დროიდან მოყოლებული “სამეფო კლუბის” მიერ გატანილი გოლების 40 პროცენტი სწორედ პორტუგალიელ ფეხბურთელზე მოდის.

ოთხშაბათს, უეფას ჩემპიონთა ლიგის ჯგუფური ეტაპის მეორე ტურში “მალმიოს” წინააღმდეგ გამართულ მატჩში (2:0) რონალდუმ თავის კარიერაში მე-500 და 501-ე გოლი გაიტანა. გაზეთ “მარკას” ცნობით, პორტუგალიელმა ფეხბურთელმა გატანილი ბურთების რაოდენობით “სამეფო კლუბის” ლეგენდარულ თავდამსხმელ რაულს გაუსწრო და ახლა მას “რეალის” რიგებში 324 გოლი აქვს. დღეს “ბლანკოსის” პრეზიდენტმა ფლორენტინო პერესმა რონალდუს სარეკორდო გოლის გატანისთვის სპეციალური ჯილდო გადასცა.

 

“ნაპოლი” იგუაინის მიერ რონალდუს გაკრიტიკებას უარყოფს

Posted on by ბექა დოგრაშვილი

ცოტა ხნის წინათ მედიაში “ნაპოლის” თავდამსხმელ გონსალო იგუაინის ასეთი ციტატა გავრცელდა:

“კრიშტიანუ რონალდუ ეგოისტია. თუ არ იტყვი, რომ კრიშტიანუ საუკეთესოა, ის შენთან მეგობრობაზე უარს ამბობს. იგი საკუთარ თავს საუკეთესოდ თვლის, სინამდვილეში კი გადაფასებულია. მე ლეო მესისთან ერთად ვთამაშობ და ეს უკანასკნელი სრულიად განსხვავებულია”.

მოგვიანებით “ნაპოლიმ” სპეციალური განცხადება გაავრცელა და უარყო, რომ ეს განცხადება იგუაინმა გააკეთა.

“ნაპოლი” და გონსალო იგუაინი კატეგორიულად უარვყოფთ იმას, რომ ფეხბურთელს გამოცემა “დონ ბალონისთვის” ოდესმე ინტერვიუ მიუცია.
ასე რომ, სიტყვები, რომელიც იგუაინს მიაწერეს, ყალბი და საფუძველს მოკლებულია”, – ნათქვამია “ნაპოლის” მიერ გავრცელებულ განცხადებაში.

 

რონალდუ: “რუნისთან ერთად თამაში მენატრება”

Posted on by ბექა დოგრაშვილი

მადრიდის “რეალის” ლიდერმა კრიშტიანუ რონალდუმ “მანჩესტერ იუნაიტედის” ფორვარდ უეინ რუნის შესახებ BBC-ს მიერ გადაღებულ ფილმში მიიღო მონაწილეობა. შეგახსენებთ, რომ ისინი ერთად თამაშობდნენ “მანჩესტერ იუნაიტედის” შემადგენლობაში. პორტუგალიელმა ფეხბურთელმა იმედი გამოთქვა, რომ ინგლისელთან ერთად თამაში კიდევ მოუწევს.

“რუნისთან ერთად თამაში მენატრება. შესაძლოა, ჩვენ კიდევ ვითამაშოთ ერთად. რა მახსენდება მასზე? იგი ყველას უყვარდა. რუნი იმდენად ძლიერია, რომ მას “პიტბულს” ეძახდნენ. მისი ძალა მის ფორმასა და ხასიათშია. რუნი არასდროს არ ჩერდება. იგი ფანტასტიური მოთამაშეა. როდესაც მანჩესტერში გადავბარგდი, უეინი დიდად დამეხმარა”, – რონალდუს სიტყვებს ესპანური სპორტული პორტალი sport.es ციტირებს.

 

რონალდუ: “იმედია, აშშ-ში ოდესმე მეც წავალ სათამაშოდ”

Posted on by ბექა დოგრაშვილი

მადრიდის “რეალის” ლიდერმა კრიშტიანუ რონალდუმ კიდევ ერთხელ განაცხადა, რომ ამერიკის შეერთებულ შტატებში თამაში სურს.

“აშშ დიდებული ქვეყანაა როგორც ადგილობრივი მოსახლეობის მენტალიტეტით, ასევე საფეხბურთო პირობებით. ყველანაირად ცდილობენ ფეხბურთის განვითარებას და კიდევ უფრო მეტის გაკეთებაც შეუძლიათ.

მზად ვარ, აშშ-ს ფეხბურთის განვითარებაში დავეხმარო. იმედი მაქვს, იქ ოდესმე მეც ვითამაშებ”, – რონალდუს კომენტარს AS ციტირებს.

ცნობისთვის, კრიშტიანუ რონალდუს “რეალთან” მოქმედი შრომითი ხელშეკრულება 2018 წლის 30 ივნისს ეწურება. იმ დროისთვის პორტუგალიელი ფეხბურთელი უკვე 33 წლის იქნება.

 

კასილასმა რონალდუსთან ურთიერთობის შესახებ ისაუბრა

Posted on by ბექა დოგრაშვილი

“პორტუს” კიპერმა იკერ კასილასმა უარყო ჭორები იმის შესახებ, თითქოს მას მადრიდის “რეალში” კრიშტიანუ რონალდუსთან პრობლემები ჰქონდა. ესპანელმა მეკარემ აღნიშნა, რომ ყველა უთანხმოება სწრაფად გვარდებოდა.

“კრიშტიანუ რონალდუ თავისებური ტემპერამენტისა და ხასიათის ადმაიანია. მე მას ექვსი წელია, ვიცნობ და ერთმანეთთან ყოველთვის დიდებული ურთიერთობა გვქონდა. როდესაც რაიმე პრობლემა წარმოიშვებოდა, მის გადასაჭრელად გზებს ერთად ვეძებდით”, – ციტირებს კასილასის სიტყვებს “მუნდო დეპორტივო”.