ამისულაშვილი საქართელოს ნაკრებიდან მიდის

ალექსანდრე ამისულაშვილი საქართველოს ეროვნული ნაკრებიდან მიდის. 31 წლის მცველის ამ გადაწყვეტილების მიზეზი თემურ ქეცბაიას სატელევიზიო ინტერვიუ გახდა, რომელიც საზოგადოებრივი მაუწყებლის პირველი არხის ეთერში გავიდა.

საქართველოს ნაკრების მთავარმა მწვრთნელმა „საფეხბურთო მიმოხილვაში“ განაცხადა:

„ამ ოთხი წლის განმავლობაში ვერ შევძელით, ფეხბურთელები დაგვერწმუნებინა, რომ ეს არის მათი ქვეყანა, ეს არის მათი ვალდებულება.
ამისულაშვილმა დამირეკა თამაშამდე 2-3 კვირით ადრე და მითხრა, დავიღალე, უკვე მიჭირს – აქაც-იქაც, გადასხმებს ვიკეთებ, პლუს ამას ემატება ის, რომ ნაკრებში ბიზნესკლასით არ მამგზავრებენ, ფეხებს ვერ ვშლი და დავიტანჯეო.
პირდაპირ ვუთხარი, პირველ რიგში, ჩასაფრებული ჟურნალისტები გამოაცხადებენ, რომ ჩემთან კონფლიქტი გაქვს-მეთქი.
ასეთი ხალხი წავიდეს თავის გზაზე. არავის არ შევეხვეწები, თან არც გვყავს ისეთი ფეხბურთელები, რომ საქართველოს ნაკრებში თამაში ვეხვეწოთ.
ნორმალურად მოაზროვნე ადამიანი არ იტყვის, რამ დაგღალა 31 წლის კაცი?! ან რას ვთხოვთ ისეთს ნაკრებში?! ჩამოვიდეს და წელიწადში 3 თუ 4 მატჩი ჩაატაროს“.

ამისულაშვილი ქეცბაიას ამ სიტყვებს გამოეხმაურა:

„ცხოვრებაში არავისთვის არაფერი არ მომითხოვია, რა ბიზნესკლასი?! თუ სადმე წავსულვარ, ყველგან ჩემი ფულით წავსულვარ. 2 საათის განმავლობაში ჩაიხვია ჩემი გვარი, თითქოს ჩემი შეცდომა იყო, რომ ნაკრებმა რაღაც წარმატებას ვერ მიაღწია. მოვა დრო და ყველაფერს ვიტყვი. ნაკრების მწვრთნელი როგორც იქცევა, მგონი, ახალგაზრდა ფეხბურთელებისთვისაც არ იქნება კომფორტული მასთან ერთად მუშაობა“.

შეგახსენებთ, რომ სექტემბრის თვეში საქართველოს ნაკრებში ასპარეზობაზე უარი გამო კიდევ ერთმა გამოცდილმა მოთამაშემ ზურაბ ხიზანიშვილმა განაცხადა. საქმე მაშინაც მწვრთნელსა და ფეხბურთელს შორის კონფლიქტთან გვქონდა.

ბექა დოგრაშვილი

„მსოფლიოში ფეხბურთს ქართული წესითაც თამაშობენ“

მსოფლიო ფეხბურთის განვითარებაში ქართველებსაც გვაქვს მნიშვნელოვანი წვლილი შეტანილი და ეს არ გახლავთ ლიტონი სიტყვები. მიხეილ მესხის სახელობის სტადიონზე ბატონ სულხან იაშვილს შევხვდით, რომელიც თანამედროვე ფეხბურთის ერთ-ერთი წესის თანაავტორი გახლავთ. მოგეხსენებათ, მეკარეს ბურთის ხელში აღება არ შეუძლია, როცა მას გადაცემას მისივე გუნდის მოთამაშე ფეხით აწვდის. თავის დროზე აღნიშნული წესი მსოფლიო ფეხბურთის მმართველ ორგანოს სწორედ ბატონმა სულხანმა შესთავაზა.

„ეს წესი 20 წელზე დიდი ხანია, რაც დაინერგა. ამის საშუალებით სათამაშო ტემპი ნარჩუნდება. ფიფას ყოფილი და ამჟამინდელი პრეზიდენტებისგან – ჟოაო აველანჟისა და ზეპ ბლატერისგან მადლობის წერილებიც მაქვს მიღებული. 2006 წელს ბლატერმა წიგნი გამომიგზავნა ფიფას 100 წლიანი ისტორიის შესახებ. თბილისის „დინამოს“ ძველი გულშემატკივარი ვარ. თავის დროზე ფეხბურთს მეც ვთამაშობდი. თავისუფალ დროს საფეხბურთო სტატისტიკის მოძიებით ვარ დაკავებული“, – აღნიშნავს ბატონი სულხანი.

სულხან იაშვილი

სულხან იაშვილმა გაგვანდო, რომ კიდევ აქვს შემუშავებული სხვადასხვა საფეხბურთო წესები.

„ერთ-ერთი წესის მიხედვით, თავით პასის დროს თამაშგარე მდგომარეობა არ უნდა დაფიქსირდეს. აღნიშნული იდეა ფიფას შევთავაზე, თუმცა იქიდან წერილი მოვიდა, რომ ეს ჯერ ეროვნულმა ფედერაციამ უნდა გამოსცადოს. სამწუხაროდ, ამას საქართველოს ფეხბურთის ფედერაციიდან დაინტერესება არ მოჰყოლია. მეორე წესიც მაქვს: კუთხურის ჩაწოდების, საჯარიმო და თავისუფალი დარტმების დროს მეკარის ბაქანზე მოედნის ფეხბურთელები არ უნდა შევიდნენ. ასეთ დროს მოთამაშეთა შორის ერთი გაწამაწია იმართება ხოლმე, თან მეკარესაც ხელს უშლიან. ეს წესი ამ პრობლემას შეძლებისდაგვარად მოაგვარებს“, – გვითხრა ბატონმა სულხანმა.

შესაძლოა, აღნიშნული წესების დანერგვა გამოსაცდელი ვადით მაინც ღირდეს.

სულხან იაშვილის თქმით, ის საფეხბურთო წიგნის – „მსოფლიოში ფეხბურთს ქართული წესითაც თამაშობენ“ გამოცემას აპირებს, რომელშიც განხილული იქნება სხვადასხვა საინტერესო საკითხები: ფეხბურთის ისტორია, ფეხბურთის როლი ეროვნულ მოძრაობაში, ფეარ-პლეის პრინციპი და სხვა. წიგნის გამოცემას გარკვეული თანხა სჭირდება. სამწუხაროდ, ამის დამფინანსებელი ჯერჯერობით არ გამოჩენილა, თუმცა იმედს ვიტოვებთ, რომ აღნიშნული წიგნი გამოიცემა, თუნდაც იმიტომ, რომ „მსოფლიოში ფეხბურთს ქართული წესითაც თამაშობენ“ და ეს არ არის ლიტონი სიტყვები, ეს ფაქტია.