“მანჩესტერ სიტის” თავდამსხმელმა სერხიო აგუერომ განაცხადა, რომ “ბარსელონას” ლიდერ ლიონელ მესის “ეტიჰადზე” ეპატიჟებოდა.
“რა თქმა უნდა, ვცდილობდი, ლეო “სიტისთან” კონტრაქტის გაფორმებაში დამერწმუნებინა. საოცარი რამ იქნებოდა, მსოფლიოს საუკეთესო ფეხბურთელი რომ შეგვეძინა, თუმცა იგი “ბარსელონას” ერთგულია.
არაერთხელ ვცადე მისი დარწმუნება, მაგრამ მეტს აღარ ვთხოვ. ვიცი, რომ ლეო “ბარსელონას” არ დატოვებს”, – აგუეროს სიტყვები “დეილი მეილმა” გამოაქვეყნა.
ესპანეთის სამეფო თასის ფინალში “ბარსელონამ” ბილბაოს “ატლეტიკი” ანგარიშით 3:1 დაამარცხა. დუბლი შეასრულა ლეო მესიმ, ერთი გოლი კი ნეიმარის ანგარიშზეა.
კატალონიური გუნდის შემტევმა ტრიომ გატანილი გოლების რაოდენობით ესპანეთში რეკორდი დაამყარა. მათ ამ სეზონში ყველა ტურნირზე ერთად 120 გოლის გატანა შეძლეს (მესი — 58 გოლი; ნეიმარი — 38 გოლი; სუარესი — 24 გოლი).
წინა რეკორდი მადრიდის “რეალის” შემტევ ტრიოს ეკუთვნოდა. 2011/12 წლების სეზონში კრიშტიანუ რონალდუმ, კარიმ ბენზემამ და გონსალო იგუაინმა 118 გოლი გაიტანეს.
კატალონიელებს ამ სხვაობის გაზრდის შესაძლებლობა კიდევ აქვთ. როგორც მოგეხსენებათ, “ბარსელონა” სეზონის ბოლო მატჩს ბერლინში ჩაატარებს, სადაც ტურინის “იუვენტუსს” ჩემპიონთა ლიგის თასის მოგებაში შეეცილება.
“ბარსელონას” ნახევარმცველი ანდრეს ინიესტა თვლის, რომ კატალონიურ გუნდს მსოფლიოში საუკეთესო შეტევითი ხაზი ჰყავს.
“ვფიქრობ, დღესდღეობით ჩვენს გუნდში ლეო მესის, ლუის სუარესისა და ნეიმარის სახით მსოფლიოს საუკეთესო თავდამსხმელებმა მოიყარეს თავი. გამიმართლა, რომ ამ შეუდარებელ შემტევებთან ერთად ვთამაშობ.
ვიმედოვნებ, “ბარსელონა” მომავალში უფრო უკეთესი იქნება, ვიდრე დღეს არის. ამის თქმის საფუძველს ის მაძლევს, რომ ეს ფეხბურთელები ახალგაზრდები არიან და უდიდესი პოტენციალი აქვთ”, – ინიესტას კომენტარს Goal.com-ი აქვეყნებს.
ესპანეთის ჩემპიონატის 36-ე ტურში “ბარსელონამ” საკუთარ მოედანზე “რეალ სოსიედადი” ანგარიშით 2:0 დაამარცხა. კატალონიური გუნდის რიგებიდან გოლები ნეიმარმა და პედრომ გაიტანეს.
“ბარსელონას” ლიდერმა ლიონელ მესიმ პრიმერადივიზიონში პირველად დიდი ხნის შემდეგ გოლის გატანა ვერ შეძლო. არგენტინელმა ფეხბურთელმა ლა ლიგაში გოლი უკანასკნელად 5 აპრილს ვერ გაიტანა, როდესაც “ბარსელონამ” “სელტა” ანგარიშით 1:0 დაამარცხა. ესპანეთის ჩემპიონატის მიმდინარე გათამაშებაში მესიმ 40 გოლი გაიტანა და 18 საგოლე გადაცემა გააკეთა.
სამაგიეროდ, დღევანდელ მატჩში გატანილი გოლი ნეიმარისთვის მიჯრით მეექვსე გახლავთ. ეს ბრაზილიელი ფეხბურთელისთვის კატალონიური გუნდის რიგებში მოწყობილი საუკეთესო სერიაა. აქვე აღსანიშნავია, რომ ნეიმარისთვის აღნიშნული გოლი “ბარსას” ფორმით 50-ე გატანილი ბურთია. ბრაზილიელ გარემარბს “ბლაუგრანას” შემადგენლობაში სულ 88 მატჩი აქვს ჩატარებული.
“ბარსელონას” ლიდერი ლიონელ მესი მეორე შვილს ელოდება. არგენტინელ ფეხბურთელსა და მის მეორე ნახევარ ანტონელა როკუცოს უკვე ჰყავთ ვაჟიშვილი ტიაგო, რომელიც 2012 წელს დაიბადა.
“გელოდებით, პატარა. ტიაგოს, დედას და მამას უყვარხარ”, – დაწერა სოციალურ ქსელში ლეო მესიმ.
“მანჩესტერ იუნაიტედის” მთავარმა მწვრთნელმა სერ ალექს ფერგიუსონმა მადრიდის “რეალის” ლიდერი კრიშტიანუ რონალდუ და “ბარსელონას” წამყვანი მოთამაშე ლიონელ მესი ერთმანეთთან შეადარა. შოტლანდიელის თქმით, მისი თავკაცობის პირობებში არცერთ ფეხბურთელს არ განუცდია ისეთი პროგრესი, როგორიც – რონალდუს.
“იუნაიტედში” ჩემი მუშაობის პერიოდში რონალდუმ დიდი პროგრესი განიცადა. ის ჩვენთან 17 წლის ასაკში მოვიდა, გამხდარი იყო. მას მუდმივად აკრიტიკებდნენ სიმულაციისა და სხვა მიზეზების გამო, თუმცა როდესაც ვარჯიშებზე თანაგუნდელებმა მისი დახმარება დაიწყეს, რონალდუ საოცარი მოთამაშე გახდა. დიდი ფეხბურთელებისთვის გადაწყვეტილების მიღების უნარი და მუდმივი პროგრესი უმთავრესია.
ხალხი ბევრს კამათობს იმაზე, თუ ვინ არის მსოფლიოს საუკეთესო მოთამაშე. ბევრი სრულიად სამართლიანად ასახელებს მესის. ძნელია, ამ მოსაზრებას შეეწინააღმდეგო. რონალდუ “მილუოლში, “ქუინს პარკ რეინჯერსში”, “დონკასტერსა” და ნებისმიერ გუნდში ითამაშებდა, გაიტანდა ჰეთთრიკებს. არა მგონია, მესის იგივე შეეძლოს.
რონალდუ ორივე ფეხით თამაშობს, სწრაფია, გამბედავია, დიდებულად მოქმედებს მეორე სართულზე. ჩემი აზრით, მესი მხოლოდ “ბარსელონას” ფეხბურთელია. ხვდებით, ალბათ, რასაც ვგულისხმობ”, – განაცხადა ფერგიუსონმა BBC-ს ეთერში.
“ბარსელონას” თავდამსხმელი ლუის სუარესი გაოცებული დარჩა იმ ფაქტით, რომ მადრიდის “რეალის” ფანებმა მიმდინარე სეზონში იკერ კასილასს არაერთხელ დაუსტვინეს. ურუგვაელი ფეხბურთელის თქმით, ესპანელი მეკარის მიმართ ასეთი საქციელი ყოვლად გაუმართლებელია.
“რეალის” ფანების არ მესმის. როგორ შეიძლება, დაუსტვინო ასეთი კარიერის მქონე ფეხბურთელს, რომელმაც საკმაოდ ბევრი ტიტული მოიგო. ამ ხალხმა სტატისტიკას ჩახედოს და ნახოს, რა მიღწევები აქვს კასილასს. სანამ ვინეს დაუსტვენ, უნდა დაფიქრდე”, – ციტირებს სუარესის სიტყვებს Cope.
ურუგვაელმა თავდამსხმელმა ისიც თქვა, რომ მისი თანაკლუბელი ლიონელ მესი “რეალის” ლიდერ კრიშტიანუ რონალდუზე ძლიერია.
“მესი რონალდუზე ძლიერია. ლეო უდიდესი ფეხბურთელი და ამავე დროს, ძალზედ თავმდაბალი ადამიანია. ბედნიერი ვარ, რომ მასთან და ნეიმართან ერთად თამაშის შესაძლებლობა მეძლევა”, – აღნიშნა სუარესმა.
ლეგენდარულმა ბრაზილიელმა ფეხბურთელმა რონალდომ, რომელიც ამერიკული “ფორტ-ლოდერდეილ სტრაიკერსის” თანამფლობელია, საკუთარ გუნდში “ბარსელონას” ლიდერის — ლიონელ მესის ხილვა ისურვა და ამისთვის არც პირადი თანხის დახარჯვა ენანება
“მესის შესაძენად ფულს ჩემი ჯიბიდანაც გავიღებდი.
დიდებული კლუბი გვექნება. რატომ უნდა ვთქვათ უარი მესიზე ან რონალდუზე? რამდენიმე წელიწადში ჩვენ ეს შეგვეძლება.
შეუძლებელი არაფერია. ამერიკის შეერთებული შტატები ფეხბურთის მხრივ ჩინეთის შემდეგ ყველაზე სწრაფად მზარდი ქვეყანაა. ცხოვრების ხარისხის გამო ბევრ ცნობილ ფეხბურთელს მოუნდება სამხრეთ ფლორიდაში თამაში. ვინ არ ისურვებდა აქ ცხოვრებას?” – რონალდოს სიტყვები Goal.com-მა გამოაქვეყნა.
“ბარსელონას” თავდამსხმელი ლიონელ მესი და “ჩელსის” ნახევარმცველი სესკ ფაბრეგასი ლონდონის ერთ-ერთ კაზინოში შენიშნეს. ამის შესახებ Goal.com-ი იტყობინება.
დამალული არ არის, რომ მესი და ფაბრეგასი კარგ ურთიერთობას ინარჩუნებენ და წლის დასაწყისში პრესაში აქტიურად იწერებოდა არგენტინელი ფეხბურთელის “ჩელსიში” შესაძლო გადასვლის შესახებ.
სხვათა შორის, მესი და ფაბრეგასი გასულ თვეშიც შენიშნეს ბარსელონის კაზინოში. მაშინ მათ კატალონიური გუნდის მცველი ჟერარ პიკეც ახლდა. ამ ეპიზოდზე “ბარსელონას” მთავარმა მწვრთნელმა ლუის ენრიკემ კომენტარის გაკეთება არ ისურვა.
Infostrada Sports-მა მადრიდის “რეალის” ლიდერის კრიშტიანუ რონალდუსა და “ბარსელონას” თავდამსხმელის ლიონელ მესის სტატისტიკური მაჩვენებელი გამოაქვეყნა.
როგორც ირკვევა, ორივე ფეხბურთელს ჩატარებული მატჩებისა და გოლების რაოდენობაში აბსოლუტური თანაფარდობა აქვთ.
მესისაც და რონალდუსაც მიმდინარე სეზონში ყველა ტურნირზე ერთად 41-41 მატჩი აქვთ ჩატარებული და 41-41 გოლი აქვთ გატანილი.
“ბარსელონას” მცველმა ჟერარ პიკემ და თავდამსხმელმა ლიონელ მესიმ ესპანეთის პრიმერადივიზიონის 24-ე ტურში შინ “მალაგასთან” განცდილი მარცხიდან (0:1) მეორე ღამე კატალონიის ერთ-ერთ კაზინოში გაატარეს. მათ თან ლონდონის “არსენალის” მოქმედი და “ბარსას” ყოფილი ნახევარმცველი სესკ ფაბრეგასი ახლდა.
თავად პიკემ ეს ინფორმაცია “მანჩესტერ სიტისთან” მატჩისწინა პრესკონფერენციაზე დაადასტურა.
შეგახსენებთ, რომ ესპანეთში დიდი რეზონანსი გამოიწვია მადრიდის “ატლეტიკოსთან” განადგურების (0:4) შემდეგ კრიშტიანუ რონალდუს მიერ საკუთარი 30-ე იუბილეს პომპეზურად აღნიშვნამ.
ხვალ უეფას ჩემპიონთა ლიგის მერვედფინალურ ეტაპზე “მანჩესტერ სიტისა” და “ბარსელონას” შორის პირველი მატჩი შედგება. კატალონიური გუნდი უკვე ჩაფრინდა ინგლისში. “ბლაუგრანას” მთავარმა ვარსკვლავმა ლიონელ მესიმ აეროპორტის ტერიტორია ბრიტანელი სამართალდამცველებით გარშემორტყმულმა გაიარა.
მატჩი “მანჩესტერ სიტისა” და “ბარსელონას” შორის ხვალ, თბილისის დროით 23:45 საათზე დაიწყება და მას ფელიქს ბრიხის ხელმძღვანელობით გერმანელ მსაჯთა ბრიგადა მოემსახურება.
