„ლივერპულის“ ყოფილი ფეხბურთელი სტივენ ჯერარდი თვლის, რომ „სუონსისთან“ ხვალინდელი მატჩი „ლესტერისთვის“ პრემიერლიგის პირველი ადგილისთვის გადამწყვეტი იქნება. ჩემპიონატის დასრულებამდე 4 ტურით ადრე კლაუდიო რანიერის გუნდი მეტოქეს 5 ქულით უსწრებს, თუმცა ხვალ თამაში ჯეიმი ვარდის გარეშე მოუწევს, რომელმაც „ვესტ ჰემთან“ წინა ტურში წითელი ბარათი მიიღო.
„ხვალ „ლესტერს“ კლუბის ისტორიაში ყველაზე მნიშვნელოვანი მატჩი ელის. „სუონსისთან“ შეხვედრა აჩვენებს, აქვს თუ არა კლუბს გასაძლებად საკმარისი რესურსი. მიმდინარე სეზონის ორი მესამედის განმავლობაში რანიერის გუნდი თამაშისგან სიამოვნებას იღებდა, მაგრამ ახლა მიზნისთვის ბრძოლის დროა. ნებისმიერი შეცდომა, შესაძლოა, გადამწყვეტი იყოს.
ხვალინდელი შეხვედრა, პირველ რიგში, მნიშვნელოვანი „ვესტ ჰემთან“ დაკარგული ქულების გამოა, რადგან ეს განგაშის ზარი იყო. ეს ისაა, რასაც „ტოტენჰემი“ დიდი ხანი ელოდა. „მელიებს“ ჯეიმი ვარდის გარეშე თამაში მოუწევთ. სამი ქულის მოპოვების შემთხვევაში, „სპურსი“ მიხვდება, რომ მეტოქეს უკვე ვერაფერი შეაჩერებს. ვფიქრობ, ამ შემთხვევაში „ლესტერს“ ერთი მოგებაც ეყოფა. მიუხედავად იმისა, რომ პრემიერლიგის მოგება ვერ მოვახერხე, ჩინებულად ვიცი, ორივე გუნდის ფეხბურთელები ახლა რას გრძნობენ. „ლივერპულთან“ ერთად ორი წლის წინ სულ ცოტა დაგვაკლდა.
„ლესტერის“ ფეხბურთელებმა იციან, რომ თუ წელს ჩემპიონები ვერ გახდებიან, ამ შემადგენლობით მიზანს ვერასდროს ვეღარ მიაღწევენ. გუნდის საუკეთესო შემსრულებლები ზაფხულში წავლენ, ამიტომ რანიერიმ ახლა უნდა მოიგოს“, – ციტირებს ჯერარდს ბრიტანული „ტელეგრაფი“.
