„დეტროიტ პისტონსისა“ და იტალიის ეროვნული ნაკრების ფორვარდის ლუიჯი დატომეს თქმით, მასთან კონტრაქტის გაფორმება კატალონიის „ბარსელონას“ სურს, თუმცა თავად მოთამაშეს 2014/15 წლების სეზონში ეროვნულ საკალათბურთო ასოციაციაში დარჩენა სურს.
„NBA-ში მინიმუმ კიდევ ერთი წლის გატარება მსურს. თავიდან ორწლიანი კონტრაქტი გავაფორმე, რადგან გავითვალისწინე, რომ სადებიუტო სეზონები ბევრი მოთამაშისთვის წარუმატებელი გამოდგა.
სასიამოვნოა, რომ ერთ-ერთი საუკეთესო ევროპული კლუბი ჩემით ინტერესდება. თუმცა აგენტთან გადავწყვიტეთ, რომ ამ ეტაპზე აქ დავრჩები“, – განაცხადა ლუიჯიმ.
განვლილ სეზონში დატომემ 34 მატჩი ჩაატარა და მისმა საშუალო სათამაშო დრომ 6 წუთი და 59 წამი შეადგინა.
