ჭდე: რაგბი

მზარდი საქართველოს ნაკრებმა პირველი მატჩი გამართა. ჩვენმა გუნდმა ინგლისის საგრაფოების ნაკრებს რუსთავის სარაგბო სტადიონზე უმასპინძლა და 23:48 დამარცხდა.

მატჩის ფოტორეპორტაჟი: გალერეა 1 >>>   გალერეა 2 >>>

გუნდებს შორის საერთაშორისო სერიის მეორე მატჩი კვირას, 8 ივნისს კვლავ რუსთავის სარაგბო სტადიონზე გაიმართება. მატჩის ბილეთების შეძენა დღეს და ხვალ რაგბის კავშირსა და რუსთავის სარაგბო სტადიონზე 12:00 საათიდან 18:00 საათამდე არის შესაძლებელი, ხოლო შაბათს და მატჩის დღეს ბილეთები მხოლოდ რუსთავის სარაგბო სტადიონზე გაიყიდება. ბილეთის ფასი 1 ლარს შეადგენს.

სერიის პირველი მატჩი

ანგარიშიც ნათლად მეტყველებს, რომ მატჩი საინტერესო და უხვლელოიანი იყო. ინგლისელებმა, რომლებიც ჩვენებურებზე ბევრად ზორბად გამოიყურებოდნენ, მე-5 წუთზე სახიფათოდ შემოგვიტიეს, მაგრამ მარცხენა ფრთაზე გარემარბმა მურაზ გიორგაძემგადაცემა ჩაჭრა და იქვე მგეზავ რეზი ჯინჭველაშვილს გაატანა, რომელმაც მეტოქის ლელომდე 65 მეტრი ირბინა. გარდასახვა ფულბეკმა საბა ნიკოლავამ გაიტანა – 7:0.

ძნელი სათქმელია, ჯინჭველაშვილმა სწორედ ამ ეპიზოდში დაიშავა ფეხი თუ არა, მაგრამ ფაქტია, ის მალე შესაცვლელი შეიქნა. მე-9 წუთზე მას საკუთარი 22-მეტრიანი ზონიდან ბურთი ფეხით გამოჰქონდა, თუმცა დაუფარეს. საბოლოოდ სტუმრებმა აუტის მოწოდების უფლება მოიპოვეს. დერეფნის სუფთად მოგების შემდეგ ინგლისლებმა ფაზები აკინძეს და მრჯვენა ფრთაზე მგეზავმა ლოურენს რაინერმა ბურთი ჩვენს ლელოში ფეხით შეაცურა. მასთან ყველაზე სწრაფად გარემარბი ლუის ვაინკომბი გაჩნდა. გარდასახვა რაინერმა გაიტანა – 7:7.

ინგლისელები ბევრად უფრო განსწავლულად და ფიზკურად ძლიერად გამოიყურებოდნენ. ერთი-ერთზე ბოჭვიასას ჩვენს მორაგბეებს სერიოზული პრობლემები ჰქონდათ. ამიტომ, ერთი მეტოქის გაჩერებას მინიმუმ სამი ჩვენებურის ძალისხმევა ჭირდებოდა, ეს კი, სტუმრებს სათამაშო სივრცეს უზრდიდა. მიუხედავად ამისა, საგრაფოების კრებული ანგარიშში მხოლოდ ტაიმის ბოლო წუთზე დაწინაურდა.

ჯერ ნიკოლავას საჯარიმოს რაინერნმა საჯარიმოთივე უპასუხა. მერე, როცა პირველი ნახევრის დამთავრებას აღარაფერი აკლდა, ინგლისელებმა მორიგი მრავალფაზიანი შეტევა წამოიწყეს, რომელიც ლელოთი ისევ ლუის ვაინკომბმა დაასრულა. რაინერმა ვერ გარდასახა – 15:13. ასე დამთავრდა პირველი ტაიმი.

შესვენების შემდეგ, სამ წუთში ნიკოლავამ კიდევ ერთი საჯარიმო გაიტანა 16:15, რაზეც ინგლისლებმა ზედიზედ სამი ლელოთი გვიპასუხეს. ამ შემთხვევაში ჩვენი დაცვის მარჯვენა ფრთა ჩავარდა. სტუმრები მეტწილად სწორედ იქეთკენ ავითარებდნენ შეტევას. 57-ე წუთისთვის სტუმრები 18 ქულთ დაწინაურდნენ – 34:16.

ამის შემდეგ, ნაკრების მთავარმა მწვრთნელმა, ლევან მაისაშვილმა შერკინების ორივე ბურჯი და ერთი მესამხაზელი შეცვალა. ცვლილების შედეგად ჩვენმა ნაკრებმა თამაში ისევ დაალაგა და 62-ე წუთზე საკმაოდ კარგად ორგანიზებული იერიში განავითარა. მეტოქის 22-მეტრიანი ზონის ხაზთან რაქი წარმოიქმნა. ბურთი ყველასთვის მოულოდნელად მეორეხაზელმა ლაშა ლომიძემ აიტაცა და ლელომდე ისე ირბინა წინააღმდეგობა არ შეხვედრია. გარდასახვა შეცვლაზე შესულმა მამუკა ნინიძემშეასრულა – 23:34.

ქომაგებს მატჩის გადარჩენის იმედი გაუჩნდათ. თუმცა, დასკვნით ათ წუთში ინგლისელებმა კიდევ ორჯერ შეძლეს ლელოს დადება და ორ მატჩიანი სერიის პირველი შეხვედრა 48:23 მოიგეს.

მატჩის შემდეგ

ჯეიმზ შენეჰენი, საგრაფოების ნაკრების მწვრთნელი:

„ველოდით, რომ ფიზიკურად მძიმე მატჩი იქნებოდა. საქართველოს ნაკრების სასახელოდ უნდა ითქვას, რომ რაქში შესანიშნავად ითამაშა და მოლშიც მედგრად დაგვიდგა. პირველ ტაიმში ბრძოლა თანაბარი იყო. შესვენების შემდეგ თამაში წაგვივიდა, მეტოქემ რამდენიმე შეცდომა დაუშვა, რაც გამოვიყენეთ კიდეც და ანგარიშში სხვაობა გავზარდეთ.

„თამაში სანახაობრივად, ვფიქრობ, კარგი იყო. ბურთს ჩვენ უფრო მეტხანს ვფლობდით. ქართველებმაც შეძლეს რამდენჯერმე თამაშის გაშლა.”

ბენ ჰილტონი, საგრაფოების ნაკრების კაპიტანი:

„მინდა ჩემი დიდი პატივისცემა გამოვხატო ქართველი მორაგბეების მიმართ. ძალიან აგრესიულად, თავგანწირვით თამაშობდნენ. რამდენიმე ჩემი თანაგუნდელი გასახდელში გვარიანად დაჟეჟილია. ვფიქრობ, მეორე მატჩში თქვენი გუნდი ნამდვილ სახეს გამოაჩენს”

ლევან მაისაშვილი, მზარდი საქართველოს მწვრთნელი:

„ამ ერთი, თუნდაც სუსტი თამაშით დასკვნების გაკეთება არ იქნება სწორი, გუნდი ერთი კვირაა რაც შეიკრიბა, სულ რაღაც შვიდი-რვა ვარჯიში გვქონდა ერთად.

ცხადია, კმაყოფილი ვერაფრით ვიქნები. წნეხის ქვეშ მორაგბეები ხშირად ცდებოდნენ. ეს მათი ახალგაზრდული ასაკისა და შეუთამაშებლობის ბრალია.

ვერ შევძელით იმის ჩვენება, რასაც ვგეგმავდით. წინ მეორე თამაში გავქვს. ამ შეხვედრას გავაანალიზებთ და, თუ ვინმეს აქვს თავისი ამბიციები დასამტკიცებელი, დაამტკიცოს. გამორიცხული არ არის ვინმე კიდევ დავიმატოთ. გააჩნია, ტრავმები რამდენად სერიოზულია.

„ინგლისელთა გუნდი კარგად შეთამაშებული კრებულია. ღია თამაშში, ორთაბრძოლებში გვაჯობეს. ბურთსაც მეტწილად სტუმრები აკონტროლებდნენ. ერთი სიტყვით, ინგლისლებისგან ბევრი რამ შეიძლება ვისწავლოთ”.

გუშინდელ შეხვედრას საპატიო სტუმრის სტატუსით დაესწრო ინგლისისა და ბრიტანელი და ირლანდიელი ლომების ყოფილი ბირჯი, 2003 წლის მსოფლიო თასის მფლობელი, ინგლისის რაგბის კავშირის ვიცე-პრეზიდენტი ჯეისონ ლეონარდი, რომელმაც მატჩის შემდგომ გამართულ პრესკონფერენციაზე განაცხადა:

„საქართველო ძალიან მეგობრული და სტუმართმოყვარე ქვეყანაა. რაგბის კავშირის პრეზიდენტმა, გიორგი ნიჟარაძემ ბევრი რამ მანახა და გამაცნო. რაც შეეხება თამაშს. ეს ორივე გუნდის მორაგბეებისთვის სასარგებლო გამოცდილებაა.

„ჩვენ რაგბის ერთი დიდი ოჯახი ვართ და ერთმანეთს ვეხმარებით. ვფიქრობ, ანგარიში რეალურად არ ასახავს ძალთა თანაფარდობას. ქართველებმა რამდენიმე შეცდომა დაუშვეს და მეტოქემ ეს გამოიყენა. თუმცა, სანამ აქ მოვიდოდი ბიჭებთან გასახდელში ვიყავი და ვნახე, რამდენიმე მათგანი როგორი დაჟეჟილია.

„ჩვენი და საქართველოს რაგბის კავშირის თანამშრომლობა ძალიან კარგად ვითარდება. ეს მარტო თქვენთვის არა, ჩვენთვისაც სასარგებლოა. 2003 წელს მსოფლიოს თასზე თავად მომიწია საქართველოს ნაკრებთან თამაშმა. მაშინ ვთქვით, რომ თუ ამ ქვეყანაში რაგბის მეტ ყურადღებას მიაქცევენ ის სულ უფრო წინ და წინ წავა. ეს ასეც ხდება.”

გიორგი ნიჟარაძე, საქართველოს რაგბის კავშირის პრეზიდენტი:

„ინგლისელებმა თანამედროვე რაგბის მასტერკლასი ჩაგვიტარეს. გვაჯობეს, როგორც რაგბის თამაშის ცოდნაში, ასევე ფიზიკურ ბრძოლაშიც. იყო ეპიზოდები, როცა ჩვენმა მორაგბეებმა აჩვენეს რა შეუძლიათ. თუმცა, შეუთამაშებელმა გუნდმა ასეთი მაღალი დონის მეტოქეს სათანადო წინააღმდეგობა გაუწიოს ძალიან ძნელია. სწორედ ამიტომ გვინდა ასეთი თამაშები, რომ საჭირო ცოდნა და გამოცდილება შევიძინოთ.

„ეს მარცხი ცივი შხაპივით იყო.  ჩვენი სიძლიერე კი ისაა, რომ ასეთი წარუმატებლობების შემდეგ სწორ ანალიზს ვაკეთებთ და უფრო ვძლიერდებით. ეჭვი არ მეპარება, რომ ეს ორი თამაში სარგებლობას მოუტანს ჩვენს ახალ გუნდს, მზარდ საქართველოს. მადლობა ინგლისელებს შესანიშნავი გაკვეთილისთვის. ჩვენ კი მეტი სწავლა და შრომა გვჭირდება. მჯერა, ჩვენი გუნდი მეორე მატჩს ბევრად უკეთ ითამაშებს.”

Rugby.GE

7 და 8 ივნისს ნორვეგიის ქალაქ ბერგენში გაიმართება ფირა-აერის ქალთა რაგბი 7-ის ევროპის ჩემპიონატის “ა” დივიზიონის გათამაშება. საქართველოს ქალთა ნაკრები ნორვეგიაში ორშაბათს გაემგზავრა, სადაც აგრძელებს მზადებას აღნიშნული ტურნირისათვის.

ჩვენს ჯგუფში შეჯიბრების გამართვა ორ ეტაპად იყო დაგეგმილი, მაგრამ უკრაინაში მოვლენების გამო ოდესის ტურნირი გაუქმდა.

საქართველო პულში ჩეხეთის, პოლონეთისა და დანიის წინააღმდეგ იასპარეზებს.

საქართველოს 7-ქალა “ა” (მეორე) დივიზიონში შარშან ამოვიდა. მთავარი მწვრთნელის, ჯაბა მალაღურაძის განცხადებით, გუნდის მიზანს დივიზიონში გამარჯვება და 12-გუნდა ელიტაში ადგილის დამკვიდრება წარმოადგენს, მაგრამ მოსამზადებელ ტურნირებზე გუნდს ტრავმები დაუგროვდა და აქედან გამომდინარე, დივიზიონში დარჩენაც არ იქნება ურიგო შედეგი.

„წლის დასაწყისში უფრო ამბიციური გეგმები გვქონდა – ვუმიზნებდით ელიტურ, ტოპ თორმეტეულში ასვლას, მაგრამ მოსამზადებელ ტურნირებზე გოგონებმა ბევრი ტრავმა მიიღეს. მე მაინც ოპტიმისტურად ვარ განწყობილი და თუ ჩვენს თამაშს ვითამაშებთ, მიმაჩნია, რომ საქართველო შეძლებს ქალთა ელიტაში ასვლას.

„ჯგუფში ყველაზე ანგარიშგასაწევ მეტოქედ ჩეხეთი მიმაჩნია, მაგრამ საპლეიოფო ეტაპზე საკმაოდ ძლიერ რუმინეთის, მოლდოვისა და უკრაინის გუნდებთან მოგვიწევს თამაში,“ თქვა ჯაბა მალაღურაძემ.

ტურნირის განრიგი: http://rugby.no/bergen2014/schedule

ტურნირის ოფიალური ვებგვერდი: http://rugby.no/bergen2014/

სთრიმის ბმულები: https://sumo.tv2.no/ http://www.ba.no/tv/ www.norgesrugby.no

საქართველოს რაგბი 7-ის ქალთა ნაკრები

1. ანა პოღოსიანი

2. ნინო ელოშვილი

3. ბელა გოგსაძე

4. მარეხ მაისურაძე

5. შორენა გამსახურდია

6. ანა ანდღულაძე

7. ნათია ცინცქილაძე

8. ნანა კაშია

9. ქრისტინე გვაზავა

10. სალომე საღარაძე

11. ქეთევან მოდებაძე

12. ანა კვაჭაძე

მთავარი მწვრთნელი: ჯაბა მალაღურაძე

მწვრთნელი; გიორგი მაისურაძე

მენეჯერი: ია ხურცილავა

ექიმი: ილია ლათიბაშვილი

ფიზიო: რუსუდან კუპატაძე

Rugby.GE

შეკრებაზე მყოფმა მზარდმა საქართველომ დღეს შევარდენზე სრული შემადგენლობით ივარჯიშა. ‘მზარდი საქარველო’ მეორე ნაკრებია, რომელშიც ასაკობრივი ნაკრებებიდან ამოსული 25 წლამდე მორაგბეები ირჩევიან.

ვარჯიშის ფოტოები >>>

მთავარი მწვრთნელის, ლევან მაისაშვილის განკარგულებაში 26 მორაგბეა. გუნდში, ახლახან  19-წლამდელების ინგლისური ტურნედან დაბრუნებული მგეზავი რეზი ჯინჭველაშვილი და ფულბეკი გიორგი ბაბუნაშვილი არიან. ეროვნულ ჩემპიონატში მოასპარეზე კლუბების მოთამაშეების გარდა, მზარდ საქართველოში რამოდენიმე ლეგიონერია: ლაშა ლომიძე (მონპელიე), გურამ კავთიძე (ლიონი), თორნიკე ლომიძე (ოში), ზაზა ნავროზაშვილი (ბორდო) და ბაჩუკი გუჯარაიძე (სენ ნაზერი).

მზარდი საქართველოს და ინგლისის საგრაფოთა XV 4 და 8 ივნისს ორ საერთაშორისო მატჩს გამართავენ რუსთავის სარაგბო მოედანზე. შეხვედრები 19 და 18 საათზე დაიწყება. მატჩზე დასასწრები ბილეთები 2 ივნისისდან რაგბის კავშირში და რუსთავის სარაგბო მოედანზე ყოველდღიურად, 12 საათიდან 18 საათის ჩათვლით გაიყიდება. ბილეთის ფასია 1 ლარი.

მზარდი ბორჯღალოსნების მოწინააღმდეგე, ინგლისის საგრაფოთა პირველი ნაკრები 2 ივნისს ჩამოვა. ინგლისელთა შემადგენლობაში ორი ახალწვეულია, რომლებმაც 21 და 24 მაისს, საქართველოს 19-წლამდელთა წინააღმდეგ საგრაფოთა 20-წლამდელთა ნაკრების შემადგენლობაში ითამაშეს: ღერძი, როდრი ედემსონი და ბურჯი, ჯამალ ფორდ-რობინსონი.

ინგლისის საგრაფოები XV

რიჩარდ ლისტი (დონკასტერ,იორკშირი), თომ მანთელი (მაქლესფილდი, ჩეშირი), ჯამალ ფორდ-რობინსონი (ქემბრიჯი, ქორნვოლი), სთივ ჯონსონი (ჰალი, იუორკშირი), შონ ედვარდსი (ბიშოფს სტორფორდი, ჰეფორდშირი), ჯეიმს სალთერი (რედრუთი, ქორნვოლი), უილიამ რედარნი (ბირმინჰემი, ნორს მიდლენდსი), ქრის ვერმუსი (ბლეიდონი, დურჰემი), ბენ ჰილთონი (ლენქესთონი, ქორნვოლი), ოლლი ქუფერ-მილერი (ოლდ ალბანიანსი, ჰერთფორდშირი), თომ სთრადუიქი (ბლექჰეთსი, კენტი), ბილი ჯონსონი (ოლდ ალბანიანსი, ჰერთფორდშირი), ჯესი ლისთონი  (ბლექჰეთსი, კენტი), ქიის ლოულინი (ბლეიდონი, ნორსმიდლენდსი)
ჰარი ბროდბენთი (როსლინპარკი, ჩეშირი), ჯო ბედფორდი (სენდელი, იორკშირი), როდი ედემსონი (ნიუქასლ, ნორსამბერლენდი), ლოურენს რაინერი (ოლდ ალბანიანსი, ჰერთფორდშირი)
მაიქ უილქოქსი (სინდერფორდი, გლოსტერშირი), სებ როდველი (ჰართპური, გლოსთერშირი)
მარკუს ბარქემი (ბლაქჰისი, კენტი), ქემერონ მიტჩელი (დარლინგთონი, დარჰემი)
ლიუის ვინიქომბრი (თრუროუ, ქორნვოლი), ნევარო ქონდინი (ქინდერფორდი, გლოსტერშირი)
ჯიმ უინგლვორსი (ქემბრიჯი, იორქშირი). შონ თეილორი (ფრესთონ გრასჰოფერსი, ლანქაშირი)

Rugby.GE

ლელომ შერკინებაში ჯობნითა და ქიქერის სნაიპერობით ჩემპიონატის დიდ ფინალში დამაჯერებლად, 24:11 ძლია არმია და შარშან მოგებული “ბზის თასი” შეინარჩუნა.

ფინალის ფოტოები >>>

ფინალი ქართული რაგბის ოდინდელ ბინაზე, ვაკეში, “მიხეილ მესხზე” მოეწყო და 5 ათასი ქომაგი მიიზიდა. რაგბი პირველად გადაიცა საზოგადოებრივი მაუწყებლის “მეორე არხით”, რომელიც ივნისში “ირბ თბილისის თასის” ტელე-პარტნიორიც იქნება.

ლელო 24:11 არმია

7ჯ ა: ყიასაშვილი სბ პატარაია –
ლ: შკინინი; 2ჯ: კობახიძე სბ ზაქაშვილი

მსაჯი ფითსგიბონ (ირლ)   აცდა: 2ჯ – გ ჯ   #   შეცვლა: 6 / 10

3:0(6) 6:0(12) 9:0(22) 9:3(26) 12:3(29) 15:3(35ა) 15:6(37) /
18:6(54სბ) 21:6(62) 24:6(64) სბ(75ლ) 24:11(76)

ფინალისტებმა ორი კვირით ადრე, შევარდენზე გამართეს შესარჩევი ფინალი. ის თამაში თვალსასეირო გამოვიდა და ლელომ 19:13 იმარჯვა, ამჯერად კი ვიხილეთ ურისკო, პრაგმატული, საფინალო რაგბი, რომლის ბედსაც შერკინებაში, დერეფანსა და რაქში ფორვარდებით მძლავრობა, კარში დამრტყმელის სიზუსტე და დაცვის სიმტკიცე წყვეტს.

ყველა ამ კომპონენტში ლელომ აშკარად აჯობა არმიას. მარცხენა ბურჯმა გიორგი სანიკიძემ ვიზავი რომ დაჯაბნა, არმიამ 3 ნომერი 25’ წუთზევე შეცვალა, ტაიმის ბოლომდე კი, თამაშის გეზის შესაცვლელად, ჯარს გამოცდილი ჰავბექის შეყვანაც დაჭირდა.

ამ დროს ლელო უკვე სამი გოლით (9 ქულით) იყო წინ: შერკინებაში თრევით, წამოყენებითა და ჩაქცევით მოპოვებული ჯარიმები ირაკლი ყიასაშვილმა მეტწილად შორიდან გაიტანა და არეკნიც დროულად დაარტყა, რასაც არმიამ ბახვა კობახიძის ორი ჯარიმითღა უპასუხა * 15:6

მეორე ტაიმი უფრო ცოცხლად დაიწყო: “ბორჯღალოსანთა” მგეზავმა ლაშა ხმალაძემ გარღვევა მოაწყო და გადაკიდებაც სცადა, მაგრამ თამაში მალევე ძველ კალაპოტს დაუბრუნდა. არმიას ვერც ბითუმმა შეცვლებმა არგეს, ბურჯის გასინბინების შემდეგ კი ყიასაშვილმა სამი ჯარიმაც შეაგდო და ანგარიში 24:6 გახადა.

გოლების გარდა, ფინალი დაამშვენა ირაკლი ჩხიკვაძის მიერ დაჩი კოპაძის ხისტად შემოჭვამ და გიორგი შკინინის პრესტიჟის ლელომ. ყიასაშვილმა 80 წუთში 24 ქულა მოინაგრა და ბომბარდირთა დოღში ერთი, კინკილა ქულით გადაუსწრო აქამდელ ლიდერს, ყოჩ თემურ სოხაძეს, ჩემპიონატის საუკეთესო მელელოვე კი არმიელი ალეკო ტუჩაშვილი გახდა.

ლელომ “ბზის თასი” მეოთხედ შემართა (2004 2009 2013 2014), რაც კლუბის მოთამაშეთა რამდენიმე თაობისა და ხელმძღვანელობის – პრეზიდენტ ბათუ კევლიშვილის, მენეჯერ დავით ჯალაღონიას, მწვრთნელების – ლევან მაისაშვილის, მიხეილ სუჯაშვილისა და ნონო ანდღულაძის, და დამხმარე პერსონალის დამსახურებაა.

პრესკონფერენცია

ნიკოლოზ ჭავჭავაძე (“არმიას” მთავარი მწვრთნელი): “ერთი კვირის წინ გამარჯვებული შემადგენლობა იმის გამო შევცვალე, რომ მინდოდა ჩემს გუნდს უფრო სწრაფად ეთამაშა, მაგრამ არაფერი გამოვიდა. წავაგეთ შერკინებები და დერეფანი, ორთაბრძოლები შერკინებებში და მარცხიც ამან განაპირობა. გარდა ამისა, მრავლად გვყავდა ტრავმირებული მოთამაშეები, განსაკუთრებით მესამე ხაზში და აღმოჩნდა, რომ მათი სათანადო შემცვლელები არ გვყავდა.

ერთი კვირის წინ “ლოკომოტივთან” ისეთ სიცხეში ვითამაშეთ, რომ აღდგენას 3 დღე დაჭირდა და შესაძლოა, ბიჭები გამოიფიტნენ. მთლიანობაში, ამ სეზონს დადებითად ვერ შევაფასებ, რადგან ფინალი დავთმეთ, მაგრამ რეგულარული პირველობის მეორე წრე მართლაც კარგად ჩავატარეთ და სატურნირო ცხრილში პირველი ადგილიც დამსახურებულად დავიკავეთ.

ჩვენ გვსურს, რომ ევროთასებზე ვითამაშოთ და ამისათვის მზად ვართ, მაგრამ ჯერჯერობით ფორმატიც არაა ცნობილი და წინასწარ რამის თქმა გამიჭირდება”.

ლაშა თავართქილაძე (“არმიას” კაპიტანი): “ტრავმები მთელი სეზონის განმავლობაში გვტანჯავდა და სტაბილურად, 15-კაციანი შემადგენლობის დაყენება ვერასდროს მოხერხდა. ტრავმების გამო მეც ბევრი გამიცდა, ფინალში კი, “ლელომ” დამსახურებული გამარჯვება მოიპოვა”.

ლევან მაისაშვილი (“ლელოს” მთავარი მწვრთნელი): “ამ გამარჯვებისთვის ბევრი ვიშრომეთ. კარგად გვყავდა შესწავლილი “არმია”, ვიცოდით მათი დადებითი და უარყოფითი მხარეები, მაგრამ ერთია შრომა, შეფასება, დავალებების მიცემა და სულ სხვაა მას როგორ შეასრულებენ მორაგბეები უშუალოდ მოედანზე. მადლობა ბიჭებს, რადგან მათ ყველაფერი ზედმიწევნით ზუსტად შეასრულეს. მოხარული ვარ, რომ ჩემპიონის ტიტული ზედიზედ მეორედ შევმართეთ.

ეს თამაში ნაკლებ სანახაობრივი გამოდგა, ვიდრე ორი კვირის წინანდელი, მაგრამ ფინალს ასეთი რამ ახასიათებს. ფასი ძალიან დიდი იყო და გარისკვა არ ღირდა, შედეგზე ვითამაშეთ და დასკვნით წუთებში ნერვიულობა თავიდან ავიცილეთ. რაც შეეხება ევროთასებზე მონაწილეობას, ჯერ ფორმატიც არაა ცნობილი, მაგრამ იქ მონაწილეობას დამატებითი ფინანსები ჭირდება. თუ მოწვევა გვექნება, ვეცდებით ფინანსები ვიშოვოთ და ევროთასებში ჩავერთოთ”.

გიორგი კაჭარავა (“ლელოს” კაპიტანი): “რაშიც უპირატესობა გვქონდა, ის ბოლომდე გამოვიყენეთ და დამახურებულად გავიმარჯვეთ. სიმართლე გითხრათ, ასეთ სხვაობას არ ველოდით, მაგრამ მატჩის ბედი თამაშის დასრულებამდე 10 წუთით ადრე უკვე გადაწყვეტილი იყო. შერკინებაში კარგად ვიმუშავეთ და რომ დავინახეთ აქ უპირატესობა გვქონდა, აქცენტი აღარ შეგვიცვლია, თამაშის გაშლაზე აღარც გვიფიქრია. ვიცოდით ამის ხარჯზე მოგება ჩვენ დაგვრჩებოდა და რატომ გაგვერისკა?

მსურს აზრი დავაფიქსირო ევროთასებთან დაკავშირებით. ამდენი წელია მხოლოდ საქართველოს ჩემპიონატში, ერთმანეთს ვეთამაშებით, საკუთარ წვენში ვიხარშებით და მოტივაციაც იკარგება. აქ უკვე ყველამ ვიცით ვის რა შეუძლია და თამაში ინტერესს კარგავს. ძალიან კარგი იქნება თუ როგორმე მოვახერხებთ და ევროთასებზე ვითამაშებთ. ეს ჰაერივით ჭირდება მოთამაშეებს, რათა მოტივაცია არ დავკარგოთ და მწამს, ევროპაშიც გავიტანთ აქართველოს და ჩვენი კლუბის სახელს”.

Rugby.GE

შემოდგომაზე დაწყებული სარაგბო სეზონი ზაფხულის პირზე, საქართველოს პირველობის დიდი ფინალით სრულდება: შაბათს, 24 მაისს, საღამოს ექვსზე (18.00), მიხეილ მესხზე (ვაკეში, ყოფილი ლოკომოტივი), ლელო და არმია “ბზის თასისთვის” შეიბმებიან. 

ჩემპიონატი 2013 წლის 7 სექტემბერს გაიხსნა. მას აქეთ უმაღლესი ლიგის ათმა გუნდმა ორი სრული წრე და “ავსტრალიური პლეი-ოფის” ხუთი რკენა გამართა, რამაც ერთად 95 მატჩი შეადგინა. და აი, მაისის ბოლოსწინა ვიქენდზე, გადამწყვეტი, საჩემპიონო ჯახია: შარშანდელი ფინალის რე-მატჩში, ისევლელო და არმია შეერკინებიან ერთმანეთს.

ერთი წლის წინ (25/05), შევარდენზე, ლელომ  16:10 იმარჯვა და ჩემპიონი გახდა. წელს, ორი კვირის წინ (10/05). პლეი-ოფის მეორე წრეში, ლელომვე 19:13 ივარგა შესარჩევ ფინალში და არმიას გზა დაუგრძელა – წინასწარ ფინალში გაისტუმრა, მანამდე კი, ავჭალაში, ორივე წრიული რკენა ჯარმა მოიგო – 16:12 (30/11 2013) და 19:10 (26/04)

ლელო – არმია

არმიამ ორი წრე პირველ ადგილზე დაასრულა: 63 ქულა (13 მოგება – 4 წაგება, 1 ფრე, სხვაობა +186, 9 ბონუსი), ლელო კი მეორე იყო – 59 ქულა (12-6, +235, 11 ბონუსი), მაგრამ რადგან პლეი-ოფში ლელომ უკვე ძლია მეტოქე, მისი ნომერი გადაიბარა, რის გამოც დიდ ფინალში მასპინძელია და ფრეზე ბოლო თაი-ბრეიქიც მის სასარგებლოდაა, ანუ თუ

კანონიკური 80 წუთი და ორი დამატებითი 10-წუთიანი ტაიმიც ფრედ დასრულდა,
გუნდებმა ამ 100 წუთში ლელოთა ტოლი რაოდენობა დადეს და
ჯერ წითელი და მერე ყვითელი ბარათების ბალანსებიც თანაბარი ექნებათ –
ბზის თასი “ლელოს” მიენიჭება.

ფინალს ირლანდიელი პითერ ფითსგიბონი განსჯის, პირდაპირი ტელე-რეპორტაჟი კი საზოგადოებრივი მაუწყებლის “მეორე არხით” მოეწყობა.

ლელო 1969 წელს დაარსებული სპარტაკის პირდაპირი მემკვიდრეა და აქამდე სამ-სამი ოქრო (2004 2009 2013) და ვერცხლი (2007 2008 2010) მოუხვეჭია, 1977 წელს დაფუძნებული “ასკ” კი “არმიად” 2011 წელს აღდგა და მონაგარში თითო ოქრო (2011), ვერცხლი (2013) და ორიც ბრინჯაო (1998 2000) ეთვლება.

ეროვნული ჩემპიონატის უმაღლესი ლიგის 2013-2014 წლის სეზონის ფინალური მატჩი 24 მაისს, 18.00 საათზე მიხეილ მესხის სტადიონზე გაიმართება. მატჩზე დასწრება თავისუფალია.

2013-14 წლის ლელო-არმიას ფინალურ დაპირისპირებას საზოგადოებრივი მაუწყებლის მეორე არხი პირდაპირ ეთერში გადასცემს.

Rugby.GE

• ინგლისის საგრაფოები U20 – საქართველო U19
• ინგლისური ტურნეს პირველი, სპარინგ-მატჩი
• 21 მაისი, 19:00 (22:00 თბილისის დროით)
• რ.კ. ‘შელფორდის’ მოედანი, ქემბრიჯი

საქართველოს 19 ორი დღის წინ გაემგზავრენენ ინგლისში, სადაც საგრაფოთა ნაკრების 20 წლამდელებთან ორ მატჩშ გამართავენ. ინგლისური ტურნეს პირველი, სავარჯიშო ტიპის შეხვედრა,დღეს, 21 მაისს – რაგბის კლუბ ‘შელფორდის’ მოედანზე, ადგილობრივი დროით 19:00 საათზე დაიწყება.

რამოდენიმე დღის შემდეგ, 24 მაისს, გუნდები საერთაშორისო ამხანაგურ მატჩში მეორედ შეხვდებიან ერთმანეთს. შეხვედრა, რაგბის კლუბ „ქემბრიჯის“ სტადიონ – ვოქალ პარკზე გაიმართება და ადგილობრივი დროით 14:00 საათზე დაიწყება.

ქართული რაგბის ქომაგებს გვინდა ვაცნობოთ, რომ ორივე შეხვედრის ჩანაწერის ხილვა შესაძლებელი იქნება საქართველოს რაგბის კავშირის Youtube.com და Myvide.ge ოფიციალურ არხებზე, მატჩების დასრულებიდან მეორე დღეს.

აღნიშნული ტურნე საქართველოს 19 წლამდელების საპასუხო ვიზიტია. შარშან მაისში, ინგლისის საგრაფოთა ნაკრების U20 გუნდი თბილისში იმყოფებოდა.

წლამდელთა ნაკრები  ინგლისში გაემგზავრა, სადაც ორ შეხვედრას გამართავს ინგლისის საგრაფოთა ნაკრების 20 წლამდელთა გუნდის წინააღმდეგ. 21 მაისს გუნდები ერთმანეთს სავარჯიშო ტიპის სპარინგ–მატჩში დაუპირისპირდებიან. შეხვედრა კემბრიჯში, რაგბის კლუბ ‘შელფორდის” მოედანზე გაიმართება და ადგილობრივი დროით 19:00 საათზე დაიწყება. რამოდენიმე დღის შემდეგ, 24 მაისს, გუნდები საერთაშორისო ამხანაგურ მატჩში მეორედ შეხვდებიან ერთმანეთს. შეხვედრა, რაგბის კლუბ „ქებრიჯის“ სტადიონ – ვოქალ პარკზე გაიმართება და ადგილობრივი დროით 14:00 საათზე დაიწყება.

ინგლისის საგრაფოები U20 V საქართველო U19

21 მაისი, 2014

ქართული რაზმი:

შერკინება

1. ნიკა ნეფარიძე, 2. ბადრი ალხაზაშვილი (კაპ), 3. ბექა კაკაბაძე, 4. ოთარ გიორგაძე, 5. ბესიკ ბარბაქაძე, 6. დავით პაპავაძე, 7. თორნიკე ზოიძე, 8. ბექა გორგაძე

ღერძი

9. ვასო ლობჟანიძე, 10. რეზი ჯინჭველაშვილი

ხაზი

11. დავით გულიტაშვილი, 12. თემურ ირემაძე, 13. დევი დევსურაშვილი, 14. ირაკლი სვანიძე, 15.  გიორგი ბაბუნაშვილი

მარქაფა

16. თორნიკე მატარაძე, 17. გიორგი ტორაძე, 18. ვანო მარგალიტაძე, 19. ჟორა მღებრიშვილი, 20. გიორგი ჯავახია, 21. თემურ თუთბერიძე, 22. სანდრო ილურიძე, 23. დავით ლობჟანიძე

Rugby.GE