ჭდე: რაგბი

საქართველოს 19 წლამდელთა ნაკრები ინგლისში გაემგზავრა, სადაც ორ შეხვედრას გამართავს ინგლისის საგრაფოთა ნაკრების 20 წლამდელთა გუნდის წინააღმდეგ. 21 მაისს გუნდები ერთმანეთს სავარჯიშო ტიპის სპარინგ-მატჩში დაუპირისპირდებიან. შეხვედრა კემბრიჯში, რაგბის კლუბ ‘შელფორდის” მოედანზე გაიმართება და ადგილობრივი დროით 19:00 საათზე დაიწყება. რამოდენიმე დღის შემდეგ, 24 მაისს, გუნდები საერთაშორისო ამხანაგურ მატჩში მეორედ შეხვდებიან ერთმანეთს. შეხვედრა, რაგბის კლუბ „ქებრიჯის“ სტადიონ – ვოქალ პარკზე გაიმართება და ადგილობრივი დროით 14:00 საათზე დაიწყება.

ქართული რაგბის ქომაგებს გვინდა ვაცნობოთ, რომ ორივე შეხვედრის ჩანაწერის ხილვა შესაძლებელი იქნება საქართველოს რაგბის კავშირის Youtube.com და Myvide.ge ოფიციალურ არხებზე, მატჩების დასრულებიდან მეორე დღეს.

საერთაშორისო გამოცდილება და რაგბის განვითარება

საქართველოს რაგბის კავშირსა და ინგლისის საგრაფოთა ნაკრებს შორის ურთიერთობა შარშან დაიწყო. როდესაც, საერთაშორისო ტურნეს გასამართად საქართველოს ინგლისის საგრაფოთა ნაკრების 20 წლამდელთა გუნდი 2013 წლის მაისში ეწვია. ინგლისელებმა ორი შეხვედრა გამართეს საქართველოს 19 წლამდელთა ნაკრების წინააღმდეგ და ორივეში, საკმაოდ რთულ და საინტერესო მატჩში სამწუხაროდ სძლიეს ჩვენ ბიჭებს. ტურნეს დასრულებისას, საგრაფოთა 20 წლამდელების მწვრთნელმა, ბობ ჰუდმა განაცხადა: „საქართველომ კიდევ ერთხელ დაამტკიცა, რომ საკმაოდ სერიოზულ სარაგბო ერს წარმოადგენს. ქართველი 19 წლამდელები ორივე მატჩში საკმაოდ ორგანიზებულად და ძლიერად ბურთაობდნენ. ჩვენი გუნდით ძალზედ კმაყოფილი ვარ, ვინაიდან კარგად ითამაშეს და ამ გამოწვევას შესაბამისად უპასუხეს.“

საქართველოსა და იგნლისის საგრაფოთა რაგბის კავშირების თანამშრომლობა გრძელდება. წელს, 19 წლამდელების ინგლისური ტურნეს შემდეგ, საქართველოში ინგლისის საგრაფოთა პირველი ნაკრები გვეწვევა. ისინი ორ საერთაშორისო ტესტს გამართავენ მზარდი საქართველოს ნაკრებთან. შეხვედრები 4 და 8 ივნისს, რუსთავის სარაგბო სტადიონზე გაიმართება.

„ინგლისის საგრაფოებთან ჩვენი თანამშრომლობა შარშან დაიწყო, როდესაც მათი 20 წლამდელთა გუნდი ჩამოვიდა საქართველოს 19 წლამდელთა ნაკრებთან სათამაშოდ თბილისში ჩამოვიდა. რაგბის ქომაგებმა ორი უმაღლესი ხარისხის ტესტი იხილეს. ამის შემდეგ, საქართველოს რაგბის კავშირსა და ინგლისის საგრაფოებს შორის გაფორმდა სამ წლიანი შეთანხმება, რომლის ფარგლებში ქართველი 19 წლამდელები, საპასუხო ვიზიტით მიემგზავრებიან ინგლისში; წელსვე, ინგლისის საგრაფოთა პირველი ნაკრები ჩამოვა საქართველოში 4 და 8 ივნისს მზარდ საქართველოსთან სათამაშოდ და უკვე გაისად, კვლავ გვესტუმრებიან ინგლისელი 20 წლამდელები.

“ინგლისის საგრაფოთა ნაკრებებთან საერთაშორისო სპარინგების გამართვა უაღრესად მნიშვნელოვანია, როგორც ასაკობრივი და მზარდი საქართველოს ნაკრებისთვის, ასევე ქართული რაგბის განვითარებისათვის. ასეთი დონის ტესტებით, ჩვენი მოთამაშეები იღებენ საერთაშორისო გამოცდილებას, რაც მათ აუცილებლად გამოადგებათ მომავალ ოფიციალურ ტურნირებში და საერთაშორისო ტესტებში.“ განაცხადა საქართველოს რაგბის კავშირის სანაკრებო კომიტეტის თავმჯდომარემ, ლაშა ხურციძემ.

Rugby.GE

არმიამ წინასწარ ფინალში იოლად ძლია ლოკომოტივი და გავიდა დიდში, სადაც შარშანდელი ჩემპიონი, ლელო ელის.

ავსტრალიური სისტემით “წინასწარ ფინალში” შესარჩევის დამარცხებული არმია და  გასავარდნის გამარჯვებული ლოკომოტივი შეწყვილდნენ.

არმია 48:17 ლოკომოტივი

7ლ: თავართქილაძე (1 6) შკინინი ჩიტიძე ჩხიკვაძე ტუჩაშვილი გაბროშვილი; 5გ ჯ: კობახიძე სბ ქორიძე –

2ლ: ზაბახიძე ჟამუტაშვილი; 2გ: წიკლაური; ა: ჭინჭარაული

მსაჯი ბერი (ირლ) აცდა: 2გ ჯ – .   #   შეცვლა: 10 / 8

წინა ვიქენდზე ორივე გუნდს დიდი ბრძოლა გადახდა, მაგრამ არმიამ უკეთ აღიდგინა ძალები და 33 გრადუს სიცხეში უმალ დაწინაურდა.

ჯარის გუნდმა პირველ მეოთხედშივე სამი ლელო შეიტანა 19:0, პირველი ტაიმი კი 29:3 მოიგო. შესვენების შემდეგ თამაში ინერციითღა გაგრძელდა და სხვაობად 31 ქულა აღინუსხა. არადა, ჩემპიონატის წრიულ ეტაპზე მეტოქეებმა ერთმანეთს თითო მატჩი მოუგეს და ჯამური ანგარიში 32:29 იყო რკინიგზის სასარგებლოდ.

9-გზის ჩემპიონი ლოკომოტივი ბრინჯაოს დაჯერდა და შარშანდელთან შედარებით სამი ადგილით ზემოთ აინაცვლა, 2011 წლის ფალავანი არმია კი ლელოს შაბათს, 24 მაისს შეეცილება “ბზის თასს”.

ფინალს ირლანდიელი პითერ ფითსგიბონი განსჯის. სტადიონი და დრო ორშაბათს დაზუსტდება.

პლეი-ოფის სქემა

პლეი-ოფის ოქმები

სეზონის სტატისტიკა

შინაური კვარცხლბეკი

Rugby.GE

შაბათს, შევარდენზე, ხუთის ნახევრიდან (16.30), საქართველოს 2014 წლის პირველობის წინასწარ ფინალში, არმია ლოკომოტივს შეერკინება.

პირველობაზე ორი მატჩიღა დარჩა გასამართი, მაგრამ იმის გამო, რომ გარდამავალი “ბზის თასი” ავსტრალიური სისტემით თამაშდება, შეჯიბრს ოთხის ნაცვლად სამი გუნდიღა შემორჩა.

მედალი სამივეს გარანტირებული აქვს, ოღონდაც გასარკვევია უმთავრესი – ვის რომელი ლითონისა (ოქრო, ვერცხლი, ბრინჯაო) ერგება.

ამ შაბათს (17/05) წინასწარი ფინალია, ერთი კვირის თავზე (24/05) კი – დიდი, საჩემპიონო. მასში მონაწილეობა წინა ვიქენდზე დაიბევა შარშანდელმა (2013) ჩემპიონმა, ლელომ, რაკი შესარჩევი ფინალი 19:13 მოუგო არმიას.

არმია – ლოკომოტივი

რადგან არმიამ ორი წრე პირველ ადგილზე დაასრულა, ავსტრალიური სისტემით მარცხი ეპატია და მეორე შანსი მიეცა – ჯარის გუნდი ეთამაშება გასავარდნი ფინალის გამარჯვებულს, ლოკომოტივს, ვინაც ბოლნისი ყოჩები 29:10 ძლია და მეოთხე ადგილზე დატოვა.

არმია 2011 წლის ჩემპიონია და 2012 წელს, მოკლე, გარდამავალი ტურნირიც მოიგო, ლოკომოტივი კი დამოუკიდებლობის ხანაში 9-ჯერ (ბოლოს 2010 წელს) იყო პირველი, ხოლო სულ 18 მედალი მოუგროვებია.

მიმდინარე სეზონში მეტოქეებმა ერთმანეთს თითო მატჩი მოუგეს – შემოდგომაზე (28/09) ლოკომოტივმა ავჭალაში 27:15 იმარჯვა, არმიამ კი ხუთი თვის თავზე (28/02) იქვე 24:15 აიღო რევანში.

წინასწარი ფინალის გამარჯვებული ბზის თასისთვის აგრძელებს ბრძოლას, დამარცხებული კი ვარდება და მესამე ადგილს დაიკავებს.

მსაჯობს მორიგი, მეხუთე ირლანდიელი – ქიარან ბერი, დიდ ფინალზე კი თვით პითერ ფითსგიბონი ჩამოვა.

შევარდენზე დასწრება ამჯერადაც უფასოა.

Rugby.GE

საქართველოს 2014 წლის პირველობის პლეი-ოფის მეორე წრეში იმ გუნდებმა იმარჯვეს, რომლებმაც ორი კვირით ადრე, წრიული ეტაპის ბოლო ტურში, იმავე მეტოქეებთან წააგეს.

მეორე წრე – შესარჩევი და გასავარდნი ფინალები – შევარდენზე მოეწყო.

შაბათს ლელომ 6 ქულით ძლია არმია და პირდაპირ გავიდა “ბზის თასის” “დიდ ფინალში” (24/05),
კვირას კი ლოკომოტივმა 19 ქულით აჯობა “ბოლნისი ყოჩებს” და ახლა
“წინასწარ ფინალში” (17/05) არმიას შეეცილება “დიდი ფინალის” საგზურს.

არმია 13:19 ლელო

მატჩის ფოტოები >>>

2ლ: ტუჩაშვილი თხილაიშვილი; ჯ: კობახიძე სბ წბ თხილაიშვილი –
ლ: ჭყოიძე; გ 4ჯ: ყიასაშვილი წბ კოლელიშვილი
მსაჯი ო’ქონელ (ირლ) აცდა: 2გ – ჯ # შეცვლა: 5 / 4

ლელომ შარშან, ბზის თასის ფინალში 16:10 ძლია არმია და ჩემპიონი გახდა, მაგრამ ამ სეზონში, ავჭალაში, ორივე წრიული რკენა არმიამ მოიგო – 16:12 (30/11) და 19:10 (26/04)

სტადიონი პირამდე აივსო. ჯაფა დაადგათ მორკინალებს: შეცვლაზე შესული ცხრავე სათადარიგო ფორვარდი იყო. სამივე ლელო მატჩის საწყის ათ წუთში დაიდო, შემდეგ კი ჯარიმებიღა გავიდა. ბოლო მეოთხედში, მოლში ატყდა მუშტი-კრივი, რასაც თითო მარბიელის გაძევება მოყვა წითელი ბარათით.

არმია სამჯერ დაწინაურდა – 5:0, 10:7 და 13:10, მაგრამ ირაკლი ყიასაშვილის ჯარიმით პირველი ტაიმი მაინც ფრედ,  13:13 დასრულდა. მესამე მეოთხედში არმიას 6 ქულად დაუჯდა გიორგი თხილაიშვილის სინბინი, ბოლო 27 წუთში კი ანგარიში აღარ შეცვლილა და ლელო დამდეგ უქმეებზე დაისვენებს.

ლოკომოტივი 29:10 ბოლნისი ყოჩები

მატჩის ფოტოები >>>

2ლ: წიკლაური კავთიძე; 2გ 5ჯ: წიკლაური –
ლ: ტყეშელიაძე; გ ჯ: სოხაძე
მსაჯი ბლექ (ირლ) აცდა: 2ა – ა  #  შეცვლა: 6 / 8

წრიულ სტადიაზე 9-გზის ჩემპიონმა ლოკომოტივმა ყოჩებთან თანაბარ თამაშში თითო მოიგო 20:19(1/12) და წააგო 16:18 (26/04), ამჯერად კი ტაქტიკური დარტყმებით დაჯაბნა მეტოქე და დამაჯერებლად გაიმარჯვა.

ყოჩებმა რამდენჯერმე საკუთარი დერეფანი წააგეს. ლოკომოტივის ბექებმა 20 წუთის შუალედით ორი ლელო გაიტანეს და საათის თავზე ანგარიში 26:3 რომ გახდა, მატჩის ბედიც გადაწყდა.

რკინიგზელებს ლელოთი და 7 გოლით 24 ქულა შესძინა კაპიტანმა ბექა წიკლაურმა და მექულეთა დოღში მეორე ადგილზე აინაცვლა.

თემურ სოხაძე	ყოჩები	232
ბექა წიკლაური	ლოკომოტივი	213
ირაკლი ყიასაშვილი	ლელო	209

ყოჩებმა მეოთხე ადგილზე დააფინიშეს, რაც უდაო წარმატებაა გუნდისთვის, რომელიც შარშან ბოლო, მეათე იყო.

შაბათობით, შევარდენზე

სეზონის ორი დასკვნითი თამაშიც შევარდენზე, შაბათობით გაიმართება.

17 მაისს, ხუთის ნახევარზე (16.30) არმია “წინასწარ ფინალში” ლოკომოტივს ხვდება.

24 მაისს, ხუთზე (17.00) ლელო შარშან მოპოვებულ “ბზის თასს” წინასწარის მოგებულთან რკენაში დაიცავს.

Rugby.GE

28 და 29 აპრილს, საქართველოს რაგბის კავშირის მოწვევით, თბილისში სამუშაო ვიზიტით იმყოფებოდა სპორტული კომპლექსებისა და ნაგებობების ინჟინერი, ირლანდიელი მაიქლ გრინი. მაიქლ გრინის დაპროექტებულია დუბლინის ‘ავივა სთედიუმი’, რომელიც 2010 წლის მაისში ოფიციალურად გაიხსნა და 51,700 მაყურებელს იტევს. მაიკლ გრინის სტუმრობის მიზანს ქართული მხარისთვის გამოცდილების გაზიარება და რჩევების მიცემა წარმოადგენდა.

ვიზიტის ფარგლებში მაიქლ გრინი და საქართველოს რაგბის კავშირის პრეზიდენტი, გიორგი ნიჟარაძე შეხვდნენ საქართველოს სპორტისა და ახალგაზრდობის საქმეთა მინისტრის მოადგილეს, აკაკი ლოდიას.

იმ შემთხვევაში თუ საქართველო ეროვნული ნაკრებისათვის გადაწყდება სტადიონის აშენება, მაიქლ გრინისგან მოხდება რჩევებისა და მითითებებს მიიღება საუკეთესო გამოცდილების გათვალისწინებით – როგორ უნდა შესრულდეს მშენებლობისთვის მოსამზადებელი სამუშაოები, რა ტევადობის იქნება სტადიონი, რა ხარჯების გაწევა მოუწევს რაგბის კავშირს და სახელმწიფოს.

რაგბის კავშირის პრეზიდენტმა გიორგი ნიჟარაძემ და მინისტრის მოადგილე აკაკი ლოდიამ სტუმართან ერთად სტადიონის საკითხის ირგვლივ ყველა საჭირბოროტო თემაზე ისაუბრეს და მოსაზრებები გაცვალეს.

Rugby.GE

საქართველოს რაგბის კავშირის განვითარების ჯგუფი გაცნობებთ, რომ 26 აპრილს wissol-ს სარაგბო სტადიონზე გაიმართება საბავშვო რაგბის ფესტივალი,  რომელშიც მონაწილეობას მიიღებენ 2000-2007 წლებში დაბადებული საფესტივალო ასაკის მორაგბეები.

ფესტივალის განრიგისა და მონაწილე გუნდების შესახებ ინფორმაციის მისაღებათ გთხოვთ ესტუმროთ ბმულს – ფესტივალის განრიგი

მისამართი:

დიდი დიღომი III და IV მიკრო რაიონებს შორის მდებარე ველოტრეკისა და რაგბის კომპლექსი

Rugby.GE