ჭდე: რაგბი

დღეს, 19 აპრილს გაიმართა 2014 წლის მსოფლიო ახალგაზრდული ალაფის მეოთხე, ფინალური ეტაპი. პირველ შეხვედრაში, ტურნირის მე-7 ადგილისათვის ერთმანეთს, ჰონკონგისა და კანადის ნაკრებები დაუპირისპირდნენ ერთმანეთს. საკმაოდ დაძაბულ მატჩში, კანადელებმა 33-30 დაამარცხეს მასპინძლები, რითაც მეშვიდე ადგილს დაეუფლნენ.

მეხუთე ადგილისათვის არაფერი დავთმეთ

ტურნირის ფინალური დღის მეორე შეხვედრაში საქართველოსა და ნამიბიის ნაკრებები გავიდნენ მოედანზე. 20 წლამდე ბორჯღალოსნებმა შეხვედრა აქტიურად დაიწყეს, რასაც მალევე, ვახტანგ ამირანაშილის ლელო მოჰყვა. რეზი ჯინჭველაშვილმა, რომელიც დღევანდელ მატჩში უშეცდომოდ გაისარჯა, ლელო გარდასახა და მატჩის მეშვიდე წუთზე საქართველოს ნაკრები 7-0 დაწინაურდა. ანგარიშის გახსნიდან 9 წუთი მილეული იყო, როდესაც ჯინჭველაშვილმა უმცროსი ბორჯღალოსნების მონაგარს 3 ქულა შემატა და ანგარიში 10-0 დააფიქსირა. საქართველოს ნაკრებმა შეტევებს უმატა. მეცხრამეტე წუთზე მათ მოწინააღმდეგის 5 მეტრიან ხაზთან დერეფანი მოიგეს და ნამიბიელებს მოლი აუგორეს. ამ დროს, მოლს ამირანაშვილი მოწყდა და ბრწყინვალედ ამოუგდო ბურთი გიორგი ტალახაძეს, რომელმაც მორიგი ლელო დადო. რეზი ჯინჭველაშვილმა ლელო გარდასახა და ანგარიში 17-0 გახდა. ტაიმის ბოლომდე, საქართველოს ნაკრების მგეზავმა, დამატებით სამი ჯარიმა შესრულა და შესვენებაზე გუნდები ანგარიშით 26-0 გავიდნენ.

მატჩის მეორე ნახევარში ნამიბიელი 20 წლამდელები ცოტათი გამოცოხხლდნენ, რასაც მალან კრუგერის ზუსტი არეკნი მოჰყვა. მატჩის 52-ე წუთზე, მათ უკვე ლელოს დადება შესძლეს. ამის მერე ორი სწრადი ლელო დაფიქსირდა: 52-ე წუთზე მურაზ გიორგაძემ დაალელოვა მოწინააღმდეგე, ხოლო 2 წუთის შემდეგ, ქართველებს ნამიბიელებმა იგივეთი უპასუხეს და ანგარიში 33-17 გახდა. უმცროსი ბორჯღალოსნები დალაგდნენ და ძალ-ღონე მოიკრიბეს, რასაც ოთხი წუთის ინტერვალით, რეზი ჯინჭველაშვილმა ორი ზუსტი ჯარიმა მოაყოლა და საქართველოს ნაკრები 39-17 დააწინაურა. ამით საქმე არ დასრულებულა. მეორე ტაიმის ბოლოსკენ, შეცვლაზე შემოსულმა დავით პაპავაძემ მეოთხე ლელო და ტურნირის პირველი ბონუსი მოუტანა საქართველოს ნაკრებს. ჯინჭველაშვილმა გარდასახვა ზუსტად შეასრულა და საქართველოს 20 წლამდელებმა ნამიბია 46-17 დაამარცხა.

2015 წლის ახალგაზრდულ ჩემპიონატზე იაპონია იასპარეზებს

მესამე ადგილისათვის ბრძოლა აშშ-სა და ურუგვაის შორის გაჩაღდა. პირველ ნახევარში ამერიკელები 20-3 იგებდნენ. მეორე ნახევარში, ურუგვაელმა 20 წლამდელებმა მოუმატეს და ანგარიში გაათანაბრეს, მაგრამ გამარჯვება ვერ მოახერხეს – აშშ-ს ნაკრებმა, დაძაბულ მატჩში ერთი ქულით, 26-25 გაიმარჯვა და დაეუფლა მესამე ადგილს.

მას შემდეგ რაც მესამედან-მეშვიდემდე ყველა ადგილოსანის ვინაობა გაირკვა, დადგა ფინალური მატჩის ჯერი. თბილისის დროით 15:00 საათზე იაპონიისა და ტონგას მატჩი დაიწყო. ეს მეოთხე ფინალი იყო იაპონიის ნაკრებისათვის. აღნიშნული მატჩი ძალზედ მნიშვნელოვანი იყო ამომავალი მზის ქვეყნის 20 წლამდელებისათვის, ვინაიდან 2010, 2011 და 2012 წლებში ისინი ფინალში დამარცხდნენ. მათ ამ მატჩში ყველაფერი გააკეთეს და ტონგელი 20 წლამდელების, ანგარიშით 33-10 დამარცხებით, იაპონიის ნაკრებმა პირველად მოიპოვა ახალგაზრდულ მსოფლიო ჩემპიონატზე ასპარეზობის უფლება.

კომენტარები

დავით ვართანიანი, საქართველოს 20 წლამდელთა ნაკრების მთავარი მწვრთნელი

„დღევანდელ თამაშს დადებითად ვაფასებ – კარგად ვითამაშეთ მიუხედავად იმისა, რომ უამრავი ტრავმა გვქონდა, რის გამოც პოზიციების მიხედვით ფაქტიურად სათანადო შეცვლეაც არ გვყავდა. თამაშის ხარისხი მიახლოვებული იყო იმასთან, თუ რაც უნდა გვეთამაშა და რასაც ვცდილობდით გაგვეკეთებინა წინა მატჩებში. დღევანდელ მატჩში ბიჭებმა უკეთესად შეასრულეს დავალებაც და მაქსიმალურად იმ ტაქტიკური მონახაზის მიხედვით ითამაშეს, რომელიც შემუშავებული გვქონდა. რაც მთავარია, გუნდმა ის ხასიათი გამოავლინა, რომელიც გვაკლდა და ბოლომდე.

„ჯობდა, რომ გუნდს ეს თამაში წინა მატჩებში ეთამაშა. ძალიან ბევრი რამ ჩავინიშნეთ, რაზეც გვაქვს სამუშაო და რომ ჩამოვალთ ამაზე მუშაობას დავიწყებთ. სათამაშო დისციპლინის მხრივ ხარისხმა იმატა – სულ ორი ჯარიმა ავიღეთ. ბიჭებმა პრაგმატულად ითამაშეს და შესაბამისად, მოწინააღმდეგემ მიიღო ჯარიმები, რომლებიც ჯინჭველაშვილმა გამოიყენა და დღეს 6 ჯარიმა გაიტანა. საქართველოში, რომ ჩამოვალთ უფრო ვრცლად შემეძლემა ალაფაზე ჩვენი გუნდის გამოსვლაზე საუბარი.“

გიორგი ნიჟარაძე, საქართველოს რაგბის კავშირის პრეზიდენტი

„ბიჭებმაყველაფერი დადეს დღევანდელ თამაშში. გუნდში ძალიან ბევრი ტრავმა იყო. ხაზში შეცვლაზე შერკინების მოთამაშე გვყავდა, მეორე ხაზელი ფარნა გასვიანი, რომელიც გამოვიდა მშეცვლაზე და შესანიშნავად ითამაშა. 15 ნომერზე ძალიან კარგად ითამაშა გიორგი ბაბუნაშვილმა. ბიჭებმა უდაოდ ყველაფერში აჯობეს ნამიბიას. მეორე ტაიმში ტრავმებმა და დაღლილობამ იმატა. ბევრი ბიჭი იყო ტრავმირებული, მაგრამ იმის გამო, რომ შეცვლა არ იყო, მოუწიათ თითქმის მთელი მეორე ტაიმის ტრავმებით თამაში. რაც მთავარია, ხასიათი გამოავლინეს როგორც იქნა და ეპიზოდებში გუნდი იყო ის, რისთვისაც ეს ბიჭები გულშემატკივარს უყვარს – იყო შესანიშნავი კომბინაციები, ლამაზი ლელოები და ეპიზოდურად ვთამაშობდით ძალიან კარგ რაგბის.

„რაც შეეხება ზოგადად ტურნირს, უამრავი პრობლემა გვაქვს. სტატისტიკის მიხედვით თუ ვიმსჯელებთ – სამი თამაში მოვიგეთ და ერთი წავაგეთ 1 ქულის სხვაობით, მაგრამ ჩვენზე კარგად არავინ არ იცის თუ რა არის ჩვენი პრობლემები. ეს პრობლემები დავინახეთ – მთავარმა მწვრთნელმა, სამწვრთნელო შტაბმა და ყველამ ერთად ამის ანალიზი გავაკეთეთ. ვიცით რაზეც გვაქ სამუშაო და ამ მუშაობას დავიწყებთ ჩამოსვლისთანავე. პირველ ეტაპზე დაიდება ორივე ტურნირის მიმოხილვა. როგორც გულშემატკივარს მოეხსენება, აქ იმყოფება ეროვნული ნაკრების მთავარი მწვრთნელი, მილტონ ჰეიგი, რომელიც აქაური ტურნირის შემაჯამებელ ანალიზს გააკეთებს, ხოლო 18 წლამდელების ევროპის ჩემპიონატის ანალიზს კი, მაიკლ ბრედლი განახორციელებს, რომელიც გუნდთან ერთად პოლონეთშია. შემდეგ, შევიკრიბებით ეროვნულ სარაგბო აკადემიაში, დავსახავთ მიზნებს და დავიწყებთ ამ შეცდომების გამოსწორებაზე მუშაობას.

„მსაჯობაზე მინდა ავღნიშნო, რომ ზოგადად მთელ ტურნირზე არის ძალიან ცუდი და არაკვალიფიციური მსაჯობა. მაგალითად, ვუყურებთ აშშ-ურუგვაის თამაშს და ბევრ შეცდომებს უშვებს მსაჯი ამერიკის სასარგებლოდ.

„რა საკვირველია, რომ ეს ტურნირი წარმატებულად ვერ ჩაითვლება ჩვენთვის, ვინაიდან სულ სხვა ამოცანები გვქონდა და სულ სხვა შედეგი მივიღეთ. მიუხედავად ამისა მერწმუნეთ, რომ არც სატრაგედიოა რაიმე – არის უბრალოდ ძალიან ბევრი სამუშაო და ჩვენ ყველანი მზად ვართ ამ მუშაობისათვის. კიდევ ვიმეორებ, რომ ანალიზი გაკეთებულია და ჩამოსვლისთანავე ავიკაპიწებთ ხელებს და დავიწყებთ ამ პრობლემებზე მუშაობას. ზოგადად, კონკრეტულ დეტალებზე სპეციალურად არ ვსაუბრობ, რადგან ყველაფერი უკვე ითქვა ჰონკონგის თამაშის მერე.“

Rugby.GE

უფში პირველ ადგილზე გასვლის შანსი შევინარჩუნოთ, საქართველოს ნაკრებმა შეხვედრაში ბონუს ქულით უნდა გაიმარჯვოს, მაგრამ ჰონკონგთან მოგება არ არის საკმარისი – ჩვენი შეხვედრის შემდეგ, ტონგელი 20 წლამდელები A ჯგუფის ლიდერ აშშ-ს ნაკრებს შეხვდებიან. იმ შემთხვევაში თუ ტონგას ნაკრები 8 ქულაზე მეტით მოუგებს აშშ-ს და ამავდროულად, ამერიკელები ვერ მოახერხებენ ოთხი ლელოს დადებას, მაშინ ჩვენ შევძლებთ ჯგუფში პირველ ადგილზე გასვლას და 19 აპრილს ფინალში, მსოფლიო ახალგაზრდული ჩემპიონატის საგზურისათვის ბრძოლას.

საქართველოსა და ჰონკონგის 20 წლამდელთა მატჩი გაიმართება ხვალ, 15 აპრილს, თბილისის დროით 09:00 საათზე. წინა მატჩის მსგავსად, შეხვედრისათვის თვალყურის მიდევნება, მხოლოდ ტექსტური ლაივის მეშვეობით იქნება შესაძლებელი, რომელიც იწარმოებს ტურნირის თვიტერზე:

twitter.com/IRBjuniors>>>

და ასევე საქართველოს რაგბის კავშირის თვითერზე და Facebook პლათფორმაზე:

twitter.com/GeorgianRugby>>>

Facebook.com/GeorgianRugbyUnion>>>

 

კაპიტნის ვარჯიში და სამატჩო რაზმი

დღეს, საქართველოს 20 წლამდელთა ნაკრებმა კაპიტნის ვარჯიში გამართა. აღსანიშნავია, რომ გუნდთან ერთად სრულფასოვნად ივარჯიშა როლანდ კვაჭაძემ. სამწუხაროდ გიორგი აფციაურს ტრავმა კვლავ აწუხებს და შესაბამისად იგი ვერ შესძლებს ჰონკონგთან თამაშს. ვარჯიშის შემდეგ, ნაკრების სამწვრთნელო შტაბმა ხვალინდელი რაზმი დაასახელა, რომელშიც ზემოხსენებული როლანდ კვაჭაძის გარდა, გიორგი სორდიას ვიხილავთ.

U20 საქართველოს რაზმი – საქართველო v ჰონკონგი>>>

შერკინება

1. ზაურ ხარებავა, 2. ბადრი ალხაზიშვილი, 3. გიორგი მარგველანი, 4. როლანდ კვაჭაძე, 5. ბესიკ ბარბაქაძე, 6. საბა შუბითიძე (კაპ), 7. გიორგი სორდია, 8. ვახტანგ ამირანაშვილი

ღერძი

9. თემურ თუთბერიძე, 10. რეზი ჯინჭველაშვილი

ხაზი

11. დევი დევსურაშვილი, 12. რევაზ ბროძელი, 13. გიორგი ფრუიძე, 14. მურაზ გიორგაძე, 15. დავით გულიტაშვილი

მარქაფა

16. გიორგი თორაძე, 17. ბექა კაკაბაძე, 18. ფარნავაზ გასვიანი, 19. დავით პაპავაძე, 20. ჟორა მღებრიშვილი, 21. გიორგი ბაბუნაშვილი, 22. შალვა შაშიაშვილი

Rugby.GE

დღეს, 11 აპრილს სტარტი აიღო FIRA AER-ის 2014 წლის ევროპის ჩემპიონატის ელიტ-დივიზიონის გათამაშებამ 18 წლამდე ნაკრებ გუნდებს შორის.

საქართველოს 18 წლამდელებს პირველი შეხვედრა ირლანდიელ თანატოლებთან ჰქონდათ, რომელიც ოპალენიცას სტადიონზე, თბილისის დროით 16:00 საათზე გაიმართა.

მოგებული პირველი ტაიმი

მატჩის დაწყებიდან 9 წუთი იყო გასული, როდესაც ირლანდიელებმა რამოდენიმე ფაზიანი შეტევის შემდეგ ჩვენს ლელოში ბურთის დამიწევა შეძლეს. ლელოს გარდასახვა ვერ შეძლეს და ანგარიში 0-5 დაფიქსირდა. ჩვენ 18 წლამდელებს ყურები არ ჩამოუყრიათ, ირლანდიელებს შეტევებით უპასუხეს და ანგარიშის გახსნიდან 10 წუთის შემდეგ, საქართველოს ნაკრების მეორე ხაზელმა, ბესიკ გოგოლაძემ მეტოქეს საპასუხო ლელო დაუდო. ფრთის მოთამაშე, დავით ლობჟანიძეს გარდასახვის გატანა არ გასჭირვებია. საქართველოს ნაკრები 7-5 დაწინაურდა. მოგვიანებით ლობჟანიძემ ჯარიმა გაიტანა და ანგარიში 10 ქულამდე გაზარდა.

პირველი ტაიმის დრო ამოწურული იყო, როდესაც 18 წლამდე ბორჯღალოსნებმა მოწინააღმდეგის კარისკენ არეკნი დაარტყეს, რომელიც მიზანს ასცდა. გუნდები შესვენებაზე ანგარიშით 10-5 გავიდნენ.

მეორე ტაიმში ირლანდიელებს ვეღარ ვაჯობეთ

მოგებული პირველი ტაიმის შემდეგ, ქართველი 18 წლამდელები უფრე თავდაჯერებულად ათამაშდნენ შეტევაში, მაგრამ სამწუხაროდ ეს საკმარისი არ აღმოჩნდა. მიუხედავად იმისა, რომ ისინი შეტევაში სჯობდნენ მოწინააღმდეგეს და თავსაც ცუდად არ იცავდნენ, ირლანდიელები პრაგმატულად მიუდგნენ საქმეს და ჩვენს მიერ დაშვებული შეცდომების ხარჯზე სამი ლელოთი გვიპასუხეს და საბოლოოდ შეხევდრა ირლანდიელების სასარგებლოდ, ანგარიშით 10-20 დასრულდა.

აღსანიშნავია, რომ ანგარიშში სხვაობა შეიძლებოდა უფრო დიდიც ყოფილიყო ირლანდიის ნაკრების მხრიდან ჯერ მგეზავს, ხოლო მოგვიანებით 15 ნომერს ზუსტად, რომ შეესრულებინათ გარდასახვები და ჯარიმები.

შემდეგ ტურში იტალიასთან

15 აპრილს გათამაშების მეორე ტური გაიმართება. ჩვენს წყვილში გამარჯვებული ირლანდიის U18 ნაკრები საფრანგეთს შეხვდება, რომელმაც დღეს იტალიელ თანატოლებს 29-7 სძლია. უმცროსი ბორჯღალოსნები შესაბამისად იტალიელ 18 წლამდელებს ეთამაშებიან.

ელიტ დივიზიონის პირველი ტურის დანარჩენ მატჩებში, ინგლისელებმა 62-5 სძლიეს პორტუგალიელებს, ხოლო შოტლანდიელმა 18 წლამდელებმა 2 ქულის სხვაობით, 21-23 დათმეს შეხვედრა უელსელებთან.

კომენტარი

დავით ჩავლეიშვილი, საქართველოს 18 წლამდელთა ნაკრების მთავარი მწვრთნელი:

„ბრწყინვალე პირველი ტაიმის შემდეგ, მოედანზე მიღებული არასწორი გადაწყვეტილებებისა და ტაქტიკური შეცდომების გამო, მივიღეთ ის დასანანი ლელოები. მეორე ტაიმში ვეღარ დალაგდნენ ბიჭები და შესაბამისად ჯარიმებმაც იმატა. მატჩის ბოლოს ფაქტიურად ჩვენი ნახევრიდან ვეღარ გამოვედით. მიუხედავად ამისა, გუნდი მაინც ცდილობდა შეტევას. ირლანდია უფრო თავდაჯერებული გუნდი იყო და საქმესაც ცივსისხლიანად მიუდგნენ. უფრო მაღალი კლასის გუნდმა დამსახურებულად გაიმარჯვა. ემი ბიჭებით კმაყოფილი ვარ. ანგარიშის მიუხედავად, ისინი ბოლომდე იბრძოდნენ.

„ბიჭები თავს მხნედ კი გრძნობენ, მაგრამ გულგატეხილები არიან, ვინაიდან ნახეს, რომ ამ თამაშის მოგება შეეძლოთ. ხვალ გუნდს დავასვენებთ და ვიდეო ანალიზს გავივლით. დაშვებულ შეცდომებს გავაანალიზებთ და შესაბამისად მოვემზადებით იტალიისთვის.

„მატჩის მსვლელობისას ხმამაღლა და აქტიურად გვქომაგობდნენ სტადიონზე შეკრებილი ქართველი გულშემატკივრები, რომლებსაც ქომაგობა არც ერთი წამით არ შეუწყვეტიათ. ისინი მატჩის დასრულების შემდეგაც ამხნევებდნენ ბიჭებს,  რისთვისაც მინდა მათ უდიდესი დიდი მადლობა გადავუხადო.“

Rugby.GE

11 აპრილს რაგბის ქართველ ქომაგებს დატვირთული დღე ელით. 11:00 საათზე U20 ბორჯღალოსნები მსოფლიო ახალგაზრდული ალაფის მეორე რაუნდში აშშ-ს შეხვდებიან (მატჩის მიმდინარეობისას კვლავ ტექსტური ლაივი იწარმოებს რაგბის კავშირის Facebook და Twitter პლატფორმებზე), ხოლო თბილისის დროით 16:00 საათზე დაიწყება 2014 წლის ევროპის ჩემპიონატის ელიტ დივიზიონის გათამაშების მატჩი საქართველოსა და ირლანდიის 18 წლამდე ნაკრებებს შორის, რომელიც ოპალენიცას სტადიონზე შედგება

ტურნისირს ორგანიზატორების მიერ მოწოდებული ინფორმაციით მატჩის სთრიმის მეშვეობით ნახვა შესაძლებელი იქნება ტურნირის ოფიციალურ ვებ-გვერდზე Eurorugby2014.pl და FIRA AER-ისDailymotion.com/FIRA-AER პლატფორმაზე.

ელიტ დივიზიონი

წლევანდელი ერვოპის ჩემპიონატის ელიტური დივიზიონის მატჩები პოლონეთში, პოზნანში 11-19 აპრილს გაიმართება.

შარშანდელი გათამაშების მსგავსად, ტურნირის პირველ რაუნდში ქართველი 18 წლამდელები პირველ მატჩს ირლანდიასთან გამართავენ. მატჩი ოპალენიცას სტადიონზე, თბილისის დროით 16:00 საათზე დაიწყება. მეორე რაუნდი 15 აპრილს გაიმართება. პირველ რაუნდში მიღებული შედეგის მიხედვით, საქართველოს U18 ნაკრები საფრანგეთი-იტალიის წყვილიდან ერთ-ერთს შეხვდება. ტურნირის ფინალურ რაუნდში, რომელიც 19 აპრილს შედგება, ჩვენი ნაკრების მეტოქე ტურნირის მსვლელობისას გაირკვევა

U18 პოლონეთში აგრძელებს მზადებას

ჩვენი 18 წლამდელები პოზნანში 6 აპრილს გაემგზავრნენ, სადაც პირველი მატჩისათვის მზადებას განაგრძობენ. უმცროსი ბორჯღალოსნები დღეში ორჯერ ვარჯიშობენ და ნაკრების სამწვრთნელო შტაბის თქმით გუნდი ოპტიმალურ ფორმაშია. საბედნიეროდ მზადება ტრავმების გარეშე მიმდინარეობს.

ხვალ, 10 აპრილს ნაკრები ოპალენიცას სტადიონზე კაპიტნის ვარჯიშს გამართავს,  რომლის შემდეგაც დასახელდება გუნდის სამატჩო რაზმი.

დავით ჩავლეიშვილი, საქართველოს 18 წლამდე ნაკრების მთავარი მწვრთნელი:

„ოთხი დღეა რაც ჩამოვედით. სავარჯიშოდ კარგი პირობებია. ყოველდღე კარგ მოედანზე ვვარჯიშობთ. დღეში ორ ვარჯიშს ვატარებთ მინდორზე და დარბაზშიც ბევრს ვარჯიშობენ ბიჭები. ხვალ, ოპალენიცას სტადიონზე ჩავატარებთ კაპიტნის ვარჯიშს.

„საბედნიეროდ გუნდში არავინაა ტრავმირებული. ბიჭებიც ოპტიმალურ ფორმაში არიან, დალაგდნენ და დაღლილობამაც გადაიარა. შეკრებისა და ჩატარებული სპარინგ მატჩების ეიფორიამ ჩაიარა უკვე. აქაურ ვარჯიშებს ხარვეზების გამოსასწორებლად ვიყენებთ. რაც მთავარია, ის სუსტი მხარეები რაც კლერმონთან გამოჩნდა გამოსწორებულია.

„პირველივე შეხვედრა ირლანდიის 18 წლამდელთა ნაკრებთან გვაქვს. სამწუხაროდ მათი თამაშის ნახვის და შესწავლის საშუალება არ მოგვეცა, მაგრამ ირლანდიელები ამ ასაკში სტანილურად ძლიერები არიან და ჩვენც შესაბამისად ვემზადებით მათთან სათამაშოდ. როგორც მწვრთნელმა მინდა განვაცხადო, რომ გუნდი გაუმჯობესებულია და კარგი მდგომარეობაა, როგორც შერკინებაში, ასევე ხაზში. ყოველ შემთხვევაში ირლანდიასთან თამაშში ჩვენი მხრიდან არ იქნება მხოლოდ შერკინების დომინირება, ხაზის მოთამაშეებიც საფუძვლიანად ჩაერთვებიან.

„ჩვენ ელიტ დივიზიონში ვთამაშობთ და აქ ცუდი მოწინააღდეგე არ არის, ყველა ძლიერია. ირლანდიის შემდეგ, საფრანგეთთან ან იტალისთან მოგვიწევს თამაში. ორივე ძლლიერი გუნდია. იტალიასთან ჩვენ 18 წლამდელებს წინა ტურნირებზე უთამაშიათ და ყველა შეხვედრა მოგებით დაასრულეს, მაგრამ საფრანგეთთან ჯერ არ გვითამაშია. წელს ჩვენ მიზანს მე-6 ადგილის გაუმჯობესება წარმოადგენს და ამიტომ ყველა მატჩს ინდივიდუალურად მივუდგებით და მოედანზე აუცილებლად მოსაგებად გავალთ, მაგრამ ჯერ ირლანდიის თამაშია წინ და შესაბამისად ჩვენი სრული კონცენტრაცია ამ მატჩზე არის გადატანილი.“

Rugby.GE

7 აპრილს სტარტი აიღო IRB 20 წლამდელთა მსოფლიო ალაფის გათამაშებამ. ტურნირი B ჯგუფის შეხვედრები დაიწყო. პირველ შეხვედრაში ურუგვაიმ 33-28 დაამარცხა იაპონოა, ხოლო მეორე მატჩში კი,  ნამობიამ 37-25 სძლია კანადას. ამრიგად B ჯგუფს ნამიბია ლიდერობს და შემდეგ შეხვედრას იაპონიასთან გამართავს, ხოლო ურუგვაი კანადას შეერკინება.

A ჯგუფში ასპარეზობა გამარჯვებით დავიწყეთ

ამის შემდეგ A ჯგუფის დრო დადგა, სადაც პირველ შეხვედრაში 20 წლმადე ბორჯღალოსნები ტონგელ თანატოლებს ერკინენ.

საქართველოს ნაკრებს ანგარიშის გახსნა მატჩის დებიუტშივე შეეძლო – შალვა შაშიაშვილმა ტონგელების ლელოში ბურთი დაამიწა, მაგრამ ფეხი აუტის ხაზზე დადო და შესაბამისად ანგარიში არ გაიხსნა. ბორჯღალოსნებმა განაახლეს შეტევა, რომელიც ნაკრების კაპიტანმა, იუბილარმა საბა შუბითიძემ (იგი დღეს 20 წლის გახდა), ლელოთი დაასრულა.  ლელოს გარდასახვა რეზი ჯინჭველაშვილს არ გასჭირვებია და მატჩის მეოთხე წუთზე საქართველოს U20 ნაკრები 7- 0 დაწინაურდა.

დაცვაში ცუდი სათამაშო დისციპლინის გამო, მსაჯმა ტონგელები დააჯარიმა, რითაც რეზი ჯინჭველაშვილმა ისარგებლა და დამატებით 3 ქულა შესძინა გუნდს. მას მოგვიანებით დამატებით ორჯერ მიეცა ჯარიმის გატანის შესაძლებლობა და შესაბამისად ტაიმის დასრულებამდე 10 წუთით ადრე, საქართველოს ნაკრები 16-0 უგებდა მოწინააღმდეგეს.

ტაიმის მიწურულს ტონგელების 5 მეტრინთან ჩვენი შერკინება დაინიშნა. ამ კომპონენტში საქართველო რამოდენიმე თავით სჯობდა მოწინააღმდეგეს, შესაბამისად ჩვენ ბიჭებს მოწინააღდეგის საკუთარ ლელოში შეთრევა და ლელოს დამიწება არ გასჭირვებიათ. ლელო 8 ნომერზე მოთამაშე ვახტანგ ამირანაშვილმა დადო. ჯინჭველაშვილს გარდასახვა გაუცუდდა და ანგარიში 21-0 დაფიქსირდა. პირველი ნახევარი ამ ანგარიშით დასრულდა.

მეორე ტაიმი – ტონგას გამოცოცხლება და უხვად დარიგებული სინ ბინები

მეორე ტაიმში ტონგელები ცოტა გამოცოცხლდნენ. ერთი ჯარიმა გაგვიტანეს და მალევე კუნძულელების მონაგარს ტაიმიკო ფანგატუამ გარდასახული ლელო შემატა. ანგარიში 21-10 გახდა.

ტონგელების გამოცოცხლებას, 20 წლამდე ბორჯღალოსნებმა მალევე ლელოთი უპასუხეს – ვახტანგ ამირანაშვილმა დუბლი გაიფორმა, ხოლო რეზი ჯინჭველაშვილმა კვლავ გარდასახა და ანგარიში 28-10 გახდა. ამის შემდეგ ჯინჭველაშვილმა კიდევ ორჯერ იმარჯვა და მატჩის საბოლოო ანგარიში 34-10 დააფიქსირა.

მეორე ტაიმის მსვლელობისას, ტონგელებმა უმატეს უხეშობასა და არადისციპლინირებულ თამაშს. ისინი არც პროვოკაციებს ერიდენოდნენ, რასაც ჩვენი ბიჭები არ აჰყოლიან. კუნძულელების ასეთ ქმედებებს მსაჯმა უხვად ყვითელი ბარათების დარიგებით უპასუხა. მეორე ტაიმის შუაწელში ტონგელებს ჯერ ერთი მოთამაშე გაუსინბინეს, მოგვიანებით მეორეც მიაყოლეს. ამ დროს შეცვლაზე შემოსული ჟორა მღებრიშვილმა მსაჯის სასტვენის შემდეგ შერკინებიდან შორს მოისროლა ბურთი, რის გამოც მსაჯმა მას ყვითელი ბარათი ანახა. 20 წლამდელები 14 კაცით დარჩნენ მინდორზე ხოლო ტონგელები კი 13-თ. მატჩის ბოლოსკენ ტონგელებმა კვლავ გააგრძელეს უხეშობა, რასაც მათი 2 მოთამაშის ყვითლით გაგდება მოყვა. საბოლოო ჯამში საქართველოს ნაკრებმა ერთი, ხოლო ტონგამ კი ოთხი ყვითელი ბარათი მიიღო.

აშშ-მაც სტარტი მოგებით აიღო

საქართველო-ტონგას მატჩის შემდეგ, B ჯგუფის მეორე შეხვედრა გაიმართა, რომელშიც ტურნირის ერთ-ერთმა ფავორიტმა, აშშ-ს ნაკრებმა მასპინძელ, ჰონკონგის 20 წლამდელთა ნაკრებს 37-0 სძლია. ჰონკონნგელების სასარგებლოდ უნდა ითქვას, რომ ისინი მთელი 80 წუთის განმავლობაში დიდ წინააღმდეგობას უწევდნენ ტურნირს ერთგიზ გამარჯვებულ გუნდს.

ტურნირის მეორე რაუნდში, საქართველოს 20 წლამდელთა ნაკრებს ჯგუფირი ეტაპის ყველაზე მნიშვნელოვანი მატჩი ელით – U20 ბორჯღალოსნები არწივებს, აშშ-ს 20 წლამდელთა ნაკრებს შეხვდებიან. მატჩი 11 აპრილს, თბილისის დროით 11:00 საათზე დაიწყება.

წინა შეხვედრის მსგავსად, აღნიშნული მატჩის მსვლელობისათვის თვალყურის დევნა მხოლოდ ტექსტური ლაივის მეშვეობით იქნება შესაძლებელი, რომელიც კვლავ ტურნირის და საქართველოს რაგბის კავშირის თვითერისა და ფეისბუქ გვერდებზე იწარმოებს:

twitter.com/IRBjuniors>>>

twitter.com/GeorgianRugby>>>

Facebook.com/GeorgianRugbyUnion>>>

 

კომენტარები

დავით ვართანიანი, საქართველოს 20 წლამდელთა ნაკრების მთავარი მწვრთნელი:

„ასეთი ანგარიშით მოგებას  ნამდვილად არ ველოდი, მაგრამ იმაში დარწმუნებული ვიყავი, რომ შერჩეული სტრატეგია და ტაქტიკა გაამართლებდა. ჩვენს მიზანს სათამაშო დისციპლინის არ დარღვევა და შეკრულად თამაში წარმოადგენდა. მოწინააღმდეგე გუნდი საკმაოდ არეულად ათამაშდა, რაც ჩვენს სასარგელოდ გამოვიყენეთ. დაცვაშიც კარგად ვითამაშეთ და შედეგიც სახეზეა.

„რათქმაუნდა რაღაც ხარვეზებსაც ქონდა ადგილი, რის გამოსწორებასაც შემდეგი თამაშისათვის ვეცდებით. აშშ-ს ნაკრები სულ სხვა გუნდია, ისინი უფრო ორგანიზებული გუნდის შთაბეჭდილებას ტოვებენ და შესაბამისად რიგი ჩვენს თამაშში რიგი ცვლილებების შეტანა მოგვიწევს.

„შემდეგ თამაშზე როლანდ კვაჭაძეც შემოგვიერთდება, რომელმაც მოიშუშა ტრავმა, ხოლო რაც შეეხება გიორგი აფციაურს, ჯერ კიდევ ველოდებით ექიმების პასუხს, იმედია ტურნირის ბოლომდე გიორგიც შეძლებს გუნდის დამხარებას.“

ლადო კილასონია, საქართველოს 20 წლამდელთა ნაკრების მწვრთნელი:

„ორი სხვადასხვა ტაიმი ვნახეთ. პირველ ტაიმში ვიყავით კარგად ორგანიზებულები და შეცდომა თითქმის არ დაგვიშვია. ჩვენი პლიუსი გამოჩნდა და მოწინააღმდეგე დავჯაბნეთ შერკინებაში, მოლში და აუტში. მეორე ტაიმში თავიდან ცოტათი ავირიეთ და მანამ დავლაგდებოდით 10 ქულა მივიღეთ. შემდეგ შერკინებამ აიღო თავის თავზე ინიციატივა და მოწინააღმდეგეს შევუტრიალეთ თამაში. ხაზგასმით აღსანიშნავია, რომ ხაზი შესანიშნავად თამაშობდა დაცვაში. თავისუფლად შემიძლია ვთქვა, რომ რაც დავგეგმეთ ბიჭებმა სრულიად შეასრულეს.“

საბა შუბითიძე, საქართველოს 20 წლამდელთა ნაკრების კაპიტნაი:

„ძალიან ბედნიერი ვარ იმით, რომ პირველივე მატჩში ძლიერ მოწინააღმდეგეს პირნათლათ მოვუგეთ. თამაშს რაც შეეხება, შერკინებაში საგრძნობლად ვაჯობეთ მოწინააღდეგეს, ხოლო დაცვაში უშეცდომო თამაშმა რამოდენიმე კარგი შეტევის განხორციელების შესაძლებლობა მოგვცა. მოწინააღმდეგეც საკმაოდ აგრესიულად იდგა დაცვაში, მაგრამ ჩვენ მათი დაცვის გატეხვა შევძელით.

„მინდა ავღნიშნო, რომ ტონგას საკმაოდ ძლიერი და მოძრავი ბიჭები ყავდათ, მაგრამ ისინი უხეშ და ბინძურ თამაშს არ ერიდებოდნენ, მაგრამ ვერც ამით შეძლეს ჩვენი გატეხვა.

„ბიჭებზე მინდა ვთქვა, რომ როგორც კაპიტანი მე მათ დიდ მადლობას ვუხდი ასეთი გარჯისათვის. გუნდი, როგორც ერთი ორგანიზმი იყო შეკრული და ბიჭები არცერთი წუთით არ მოშვებულან. საკმაოდ მოტივირებულნი ვიყავით და შემიძლია ვთქვა, რომ გასახდელშივე ვიყავით დარწმუნებულნი ჩვენს მოგებაში.“.

 

გიორგი ნიჟარაძე, საქართველოს რაგბის კავშირის პრეზიდენტი:

„ძალიან კმაყოფილი ვარ. ტურნირის ერთ-ერთ ფავორიტს 34-10 ვძლიეთ. იყო ბრწყინვალე პირველი ტაიმი. ყველა კომპონენტში რაც კი არსებობს რაგბიში აჯობეს ჩვენმა ბიჭებმა მოწინააღმდეგეს. შესანიშნავი დაცვა იყო, შეტევაც ძალიან კარგი იყო, აუტები მოვიგეთ. ხაზმა და ნახევარდაცვამაც კარგად ითამაშა. ერთი სიტყვით, რომ ვთქვათ გუნდა მაღალი კლასი გამოავლინა.

„მეორე ტაიმში მართალია ცოტა მოდუნდნენ ბიჭები. გარკვეული პერიოდი დაცვაშიც მოგვიწია თამაში და ლელოც მივიღეთ, მაგრამ გამოვასწორეთ და უპირატესობა კვავ დავიბრუნეთ. ამაზე ტონგელებმა ბინძური თამაშით გვეპასუხეს. საერთოდ მთელი მატჩის განმავლობაში უხეშობდნენ ტონგელები. ორი მოთამაშე კბენაზეც კი გაუგდეს. მეორე ტაიმში როდესაც ნახეს, რომ ყველაფერში ჯობნიდნენ ჩვენი ბიჭები, უკვე პროვოკაციებზე წამოვიდნენ, მაგრამ ბიჭები ამ პროვოკაციებს არ აჰყოლიან.

„მატჩის ბოლოს, დაღლისგან ალბათ უფრო, ცოტათი მოდუნდნენ ბიჭები და იმდენი ლელოს დადება ვეღარ მოვახერხეთ რამხელა უპირატესობაც გვქონდა. სტადიონზე შეკრებილი მაყურებლისათვის 80 წუთის განმავლობაში ნათელი იყო თუ ვინ იყო უკეთესი გუნდი.

„მომავალ მოწინააღმდეგეს რაც შეეხება, ამერიკელ 20 წლამდელებს ეტყობათ, რომ კარგი და დისციპლინირებული გუნდია. ეხლა მთავარია ბიჭებმა დაივიწყონ ტონგასთან მოგება, დაისვენონ, გაიაზრონ დაშვებული შეცდომები და შემდეგ უკვე აშშ-სთან თავიანთი გასაკეთებელი გავაკეთონ.“