ჭდე: საქართველოს ნაკრები

საქართველოს ნაკრებმა პორტუგალიაში თავის არსებობის მანძილზე ერთ-ერთი ყველაზე დაძაბული მატჩი ჩაატარა. ის, რომ მატჩი დამატებით დროში გადავიდა, შეხვედრის დრამატულობაზე მიუთითებს. ამასთან, ქართველებმა პირველი ნახევარი 19 ქულით წააგეს, მეორე პერიოდის შუაწელში კი სულაც 23 ქულით ჩამორჩებოდნენ.

 ასე დიდი დეფიციტი ქართველებს არასდროს არ აღმოუფხვრიათ. პორტუგალიაში დიდი მობილიზების, ბრძოლისა და შეუპოვრობის ხარჯზე ქართველებმა თამაშის შემობრუნება მოახერხეს და დაატებით დროში მასპინძლები 1 ქულის სხვაობით – 91:90 დაამარცხეს. ეს მატჩი ალბათ დიდი ხანი ემახსოვრებათ ქართველ გულშემატკივრებს – მათ შორის პორტუგალიაში საქართველოს ელჩს, გიორგი გორგილაძეს, რომელიც ოვარში გამართულ შეხვედრას დაესწრო, ინერვიულა და  ბოლოს ქართველებს გამარჯვება მიულოცა.

gbf.ge

საქართველოს ეროვნული ნაკრები უწმინდესმა და უნეტარესმა, საქართველოს კათალიკოს-პატრიარქმა ილია მეორემ საპატრიარქოში მიიღო და მნიშვნელოვანი მატჩების წინ დალოცა.

საქართველოს კალათბურთის ეროვნული ფედერაციის პრეზიდენტი, გენერალური მდივანი, ვიცე-პრეზიდენტი და ნაკრების წევრები რეზიდენციას გუშინ, გუნდის საღამოს ვარჯიშის შემდეგ ესტუმრნენ და პატრიარქის მიერ ჩატარებულ ღამის ლოცვას დაესწრნენ. ლოცვის დასრულების შემდეგ ილია მეორემ სტუმრები დალოცა და მათ ხილით გაუმასპინძლდა.

დამკვიდრებული ტრადიციის თანახმად, ეროვნული გუნდის წევრები და ხელმძღვანელობა პატრიარქს მნიშვნელოვანი მატჩების წინ სტუმრობენ და დალოცვასთან ერთად ილია მეორესგან მნიშვნელოვან რჩევებს იღებენ.

gbf.ge

საქართველოს ეროვნულმა გუნდმა ლიტვაში, ადგილობრივ ნაკრებთან მეორე ამხანაგური მატჩი გამართა და ამით უცხოური შეკრება დაასრულა. იგორ კოკოშკოვის გაწვრთნილი ქართველები ამჯერად 27 ქულის სხვაობით დამარცხდნენ. მსოფლიოს ჩემპიონატის სამზადსში მყოფმა ლიტველებმა საკუთარ არენაზე არაფერი დაუთმეს ქართველებს და 81:54 დაამარცხეს.

ქართველებმა შედარებით კარგად ითამაშეს, ვიდრე პანევეჟისში გუშინწინდელ შეხვედრაში, რომელიც კოკოშკოვის გუნდმა 51:82 წააგო. მართალია, დღევანდელი წაგება უწინდელზე მხოლოდ 4 ქულით იყო ნაკლები, თუმცა ქართველებმა მრისხანე მეტოქესპირველი ტაიმი ტოლ-სწორად ეთამაშნენ და მესამე მეოთხედში ჩავარდნის გამო მატჩი დიდი სხვაობით დათმეს.

მოედანს დაუბრუნდა ვიქტორ სანიკძე, რომელმაც წინა 2 მატჩი ფეხის ტრავმის გამო გამოტოვა. კოკოშკოვმა სანიკიძე 31 წუთზე მეტ ხანს ათამაშა და საერთოდ, ქართველების მწვრთნელი ძირითადად სასტარტო კალათბურთელებს დაეყრდნო. მოედანზე არ გამოჩენილა განაცხადში მყოფი გიორგი შარაბიძე, ხოლო ბექა წივწივაძემ, ნიკა მეტრეველმა, დუდა სანაძემ და ოთარ ფხაკაძემ ჯამში 12 წუთი ითამაშეს.

ეს გასაგებიც იყო: კოკოშკოვმა წინა მატჩის წაგების შემდეგ განაცხადა, რომ მომავალ მატჩს ქართველები უკეთ ჩაატარებდნენ და ამისთვის მან ყველაფერი გააკეთა. საქმე ის გახლავთ, რომ უდიდესი რესურსის მქონე ლიტველებმა კვლავ შესანიშნავად ითამაშეს და ქართველები მესამე პერიოდში (29:15) გატეხეს.

შესანიშნავად ითამაშა ზაზა ფაჩულიამ, რომელმაც 18 ქულა და 14 მოხსნა მიითვალა, თუმცა მისმა ოპონენტმა, ცნობილმა და უგამოცდილესმა დარიუს ლავრინოვიჩმა 14 წუთში 17 ქულა მიითვალა და მოედანზე აღარ გამოჩენილა. სხვათა შორის, ლავნინოვიჩმა ფაჩულიასთან უხეში თამაშისა და კინკლაობის გამო ტექნიკური ჯარიმა მიიღო. წინა მატჩში არ ყოფილა, თუმცა დღეს ითამაშა დარიუსის ძმა კჟიშტოფმა, რომელიც 6 ქულას დასჯერდა.

საქართველოს ეროვნული ნაკრები საქართველოში ხვალ დაბრუნდება და ზეგ დაისვენებს. 2 აგვისტოდან კი კოკოშკოვის გუნდი თბილისის მერიის თასზე კიდევ 3 საკონტროლო შეხვედრას გამართავს მოლდოვის (2 აგვისტო), დიდი ბრიტანეთისა (3 აგვისტო) და ბელარუსის (4 აგვისტო) ნაკრებებთან.

იგორ კოკოშკოვი: “როგორც დაგპირდით, ჩვენმა ნაკრებმა იბრძოლა და უკეთესად ითამაშა. ჩვენ მატჩის არცთუ მცირე ნაწილს ვაკონბტროლებდით და მასპინძლებს ტოლს არ ვუდებდით. ლიტვა გახლავთ ერთ-ერთი ყველაზე პერსპექტიული ნაკრები და ეს მასპინძლებმა დაამტკიცეს. ჩვენ მივიღეთ დიდი გამოცდილება. დიდი მადლობა ამ 2 მატისთვის. ჩვენი ნაკრები ოპტიმალური ფორმისგან ჯერაც შორსაა”.

gbf.ge

მინერალური წყალი „ბორჯომი“ უკვე მეოთხე წელია საქართველოს ეროვნული ნაკრების პარტნიორია. დღეს სპორტისა და ახალგაზრდობის სამინისტროში კალათბურთის ფედერაციის პრეზიდენტმა მიხეილ გაბრიჩიძემ და კომპანია „IDS ბორჯომი საქართველოს“ გენერალურმა დირექტორმა ზაზა კიკვაძემ ურთიერთთანამშრომლობის მემორანდუმს მოაწერეს ხელი. მემორანდუმის თანახმად, მსოფლიოში სახელგანთქმული „ბორჯომი“ 2014 წელს, წინა წლების მსგავსად, კვლავ საქართველოს ნაკრების პარტნიორი იქნება.

ზაზა კიკვაძე, კომპანია “IDS ბორჯომი საქართველოს” გენერალური დირექტორი:

„საქართველოს ეროვნული ნაკრები „ბორჯომის“ მხარდაჭერის გარეშე აღარ წარმომიდგენია, სწორედ ამიტომ უკვე მეოთხე წელია მხარს ვუჭერთ  ეროვნულ ნაკრებს. „ბორჯომი“ ქართული ბრენდია და გარკვეულწილადვალდებულებიც კი ვართ გვერდით დავუდგეთ გუნდს, რომელსაც ასეთი დიდი მისია აკისრია. მინდა წარმატება ვუსურვო ჩვენს კალათბურთელებს ჩემპიონატის შესარჩევ ეტაპზე, იმედი მაქვს მომავალ წელს ყველანი ერთად ვუგულშემატკივრებთ ჩვენს ნაკრებს უკვე ევროპის ჩემპიონატზე უკრაინაში“.

მიხეილ გაბრიჩიძე, საქართველოს კალათბურთის ეროვნული ფედერაციის პრეზიდენტი:

,,საერთაშორისო ასპარეზზე “ბორჯომის” მინერალური წყალი ყოველთვის საქართველოს სახელთან ასოცირდება, ამიტომ მოხარულნი ვართ, რომ ის კვლავ ჩვენი გენერალური პარტნიორი იქნება. იმედი გვაქვს კალათბურთის პოპულარიზაციის მიზნით მომავალშიც გაგრძელდება ჩვენი მჭიდრო თანამშრომლობა. ჩვენი ნაკრები ქართულ ბრენდთან ერთად კიდევ უფრო დიდ ყურადღებას მიიპყრობს მთელ ევროპაში”.

ევრობასკეტ 2015-ის შესარჩევი თამაშები 2014 წლის 10 – 27 აგვისტოს გაიმართება. უკვე ცნობილი არიან ტურნირში საქართველოს ეროვნული ნაკრების მეტოქეები. E ჯგუფში საქართველო ჩეხეთთან, პორტუგალიასთან და უნგრეთთან მოხვდა. ქართველები ევროშესარჩევ ტურნირს 10 აგვისტოს შინ, ჩეხეთთან მატჩით იწყებენ, რის შემდეგაც 3 გასვლითი თამაში აქვთ – 13 აგვისტოს უნგრეთში, 17 აგვისტოს – პორტუგალიაში და 20 აგვისტოს – ჩეხეთში. საქართველო შესარჩევ ტურნირს ორი საშინაო მატჩით დაასრულებს – 24 აგვისტოს უნგრეთს უმასპინძლებს, ხოლო 27-ში – პორტუგალიას.