თორნიკე ოქრიაშვილი – გვერდი 5 – Fanebi.Com – ფეხბურთი, კალათბურთი, რაგბი, სხვა

ოქრიაშვილი 10 ათას ევროს გადაიხდის

Posted on აგვისტო 22, 2014 by Levan

ბელგიური “გენკის” ფეხბურთელები თორნიკე ოქრიაშვილი და ნგკონგკა ანელე ჩხუბის გამო დაისაჯნენ. კლუბის გადაწყვეტილებით ორივე ფეხბურთელს 10 ათასი ევროს გადახდა მოუწევთ. “გენკის” ხელმძღვანელობამ განაცხადა, რომ ამით სანქციები ამოიწურა და მოთამაშეები გუნდიდან არ მოიკვეთებიან.

შეგახსენებთ, არაფხიზელ მდგომარეობაში მყოფმა ფეხბურთელებმა ერთმანეთში იჩხუბეს. შემდეგ კი, ოქრიაშვილი ბელგიურმა პოლიციამ ავტომობილის ნასვამ მდგომარეობაში მართვის გამო დააკავა.

გუშინ საღამოს ოქრიაშილმა და ანელებ მომხდარის გამო ბოდიში მოიხადეს.

ოქრიაშვილმა და ანელემ ბოდიში მოიხადეს

Posted on აგვისტო 21, 2014აგვისტო 21, 2014 by Levan

“გენკის” ფეხბურთელებმა თორნიკე ოქრიაშვილმა და ნგკონგკა ანელემ გულშემტაკივრებისა და კლუბის წინაშე ბოდიში მოიხადეს.

ფეხბურთელებმა განაცხადეს, რომ ინციდენტი ამოწურულია და მომავალში ასეთი რამ აღარ განმეორდება.

ოქრიაშვილმა თანაგუნდელს ცხვირი გაუტეხა

Posted on აგვისტო 21, 2014 by Levan

უკვე გეცოდინებათ, რომ თორნიკე ოქრიაშვილი ბელგიაში სკანდალში გაეხვა. საქართველოს ნაკრების და “გენკის” ფეხბურთელი ბელგიის პოლიციამ ავტომობილის ნასვამ მდგომრეობაში მართვისთვის დააკავა.

როგორც ირკვევა აღნიშნულ ინციდენტამდე ოქრიაშვილს თანაგუნდელებთან დაულევია, შემდეგ კი უჩხუბია. ფიზიკური დაპირისპირება ოქრიაშვილსა და ნგკონგკა ანელეს შორის მომხდარა. ბელგიური მედიის ცნობით ქართველმა ფეხბურთელმა ანელეს ცხვირი გაუტეხა.

აღნიშნულ ინციდენტს “გენკის” ოფიციალურად გამოეხმაურა. კლუბის წარმომადგენლის განცხადებით ორივე ფეხბურთელი მკაცრად, მაგრამ სამართლიანად დაისაჯა და ინციდენტიც ამოიწურა.

ბელგიაში თორნიკე ოქრიაშვილი დააკავეს

Posted on აგვისტო 21, 2014აგვისტო 21, 2014 by -

საქართველოს ეროვნული ნაკრების ფეხბურთელი თორნიკე ოქრიაშვილი შაბათს ბელგიის პოლიციამ დააკავა. როგორც ბელგიური ჟურნალი “სპორტი” იტყობინება, “გენკის” ფეხბურთელი ავტომობილს ნასვამ მდგომარეობაში მართავდა.

როგორც ირკვევა, ინციდენტი 16 აგვისტოს, “კორტრეიკსა” და “გენკს” შორის გამართული მატჩის (1:1) შემდეგ მოხდა.

ჟურნალის ცნობით, “გენკის” ფეხბურთელები ავტობუსით ლიმბურგში ბრუნდებოდნენ, მგზავრობისას კი რამდენიმე მათგანმა ალკოჰოლური სასმელი დალია. შინ მისვლის შემდეგ, ოქრიაშვილმა საცხოვრებელი ტერიტორია დატოვა და მანქანის მართვა დაიწყო.

დიდი ალბათობით, ოქრიაშვილი კლუბმა უკვე დააჯარიმა, სხვა სანქციების შესახებ კი ცნობილი ჯერ არ არის.

ოქრიაშვილი სიმბოლურ ნაკრებში მოხვდა

Posted on აგვისტო 4, 2014აგვისტო 5, 2014 by Levan

“გენკში” გადასული თორნიკე ოქრიაშვილი სადებიუტო მატჩის შემდეგ ბელგიის ჩემპიონატის სიმბოლურ ნაკრებში მოხვდა.

ოქრიაშვილმა “სერკლ ბრიუგესთან” 89 წუთი ითამაშა და მოედანზე ერთ-ერთი ყველაზე აქტიური იყო. თორნიკემ “გენკის” ფანების დიდი მოწონება დაიმსახურა. ჰოლანდიურმა პრესამ კი ქართველი ფეხბურტელი ტურის სიმბოლურ ნაკრებში შეიყვანა.

“გენკსა” და “სერკლ ბრიუგეს” შორის გამართული მატჩი ფრედ, 1:1 დასრულდა.

ოქრიაშვილი: “გულშემატკივრებმა თავი საკუთარ სახლში მაგრძნობინეს”

Posted on აგვისტო 3, 2014 by -

ბელგიური “გენკის” მოთამაშემ თორნიკე ოქრიაშვილმა “სერკლ ბრიუგესთან” გამართული შეხვედრის შემდეგ კლუბის ოფიციალურ ვებ-გვერდს კომენტარი გაუკეთა.

“კლუბსა და მწვრთნელს ნდობისათვის მადლობას ვუხდი. ჩემი თამაშით მოხარული ვარ. ვფიქრობ, უპირატესობა ჩვენ გვქონდა, მაგრამ მეტი გოლის გატანა ვერ მოვახერხეთ. მომდევნო დღეებში აუცილებლად მოვუმატებთ და სხვა მატჩებს უკეთესად ჩავატარებთ. ილომბე მბოიო ძალიან კარგი ფეხბურთელია”, – ამბობს ოქრიაშვილი.

საქართველოს ნაკრების შემტევი 89-ე წუთზე შეცვალეს. როგორც თავად ამბობს, მისი მოედნიდან გასვლა მცირე ტრავმამ გამოიწვია. აღსანიშნავია, რომ როდესაც ოქრიაშვილი სათადარიგოთა სკამისკენ მიდიოდა, “გენკის” გულშემატკივრებმა ის ტაშით გააცილეს.

“დაღლა ნამდვილად არ მიგვრძნია. მცირე ტკივილი მაწუხებდა და ამიტომ მოძრაობა მიჭირდა, მწვრთნელმა კი შემცვალა.

გულშემატკივრები ტაშს მიკრავდნენ და ჩემს სახელს სკანდირებდნენ. ამან ძალიან გამახარა და თავი ისე ვიგრძენი, როგორც სახლში. გულშემატკივრებს მადლობას ვუხდი. ძალიან მინდა, ისინი მალე გავახარო”, – დაასრულა 22 წლის ფეხბურთელმა.

თორნიკე ოქრიაშვილი გენკში წარადგინეს

Posted on ივლისი 28, 2014ივლისი 28, 2014 by Levan

საქართველოს ნაკრების ნახევარმცველი თორნიკე ოქრიაშვილი კარიერას ბელგიურ “გენკში” გააგრძელებს.

გასული სეზონის მეორე ნახევარი 22 წლის ოქრიაშვილმა ოდესის “ჩერნომორეცში” გაატარა, სადაც დონეცკის “შახტარიდან” იჯარის წესით ასპარეზობდა. “გენკთან” კონტრაქტი ქართველმა ფეხბურთელმა 3+2 სისტემით გააფორმა.

“გენკში” ოქრიაშვილთან ერთად კიდევ ერთი ქართველი, ლუკა ზარანდია ითამაშებს.

თორნიკე ოქრიაშვილი „გენკს“ უახლოვდება

Posted on ივლისი 27, 2014 by Alix

„Het Nieuwsblad“-ს თუ დავუჯერებთ, საქართველოს ნაკრების 22 წლის ნახევარმცველი თორნიკე ოქრიაშვილი უახლოეს დროში ბელგიური „გენკის“ ფეხბურთელი გახდება. სავარაუდოდ, ქართველი ფეხბურთელი „გენკში“ სამედიცინო შემოწმებას ორშაბათს გაივლის.

თორნიკე ბელგიურ კლუბში ფაბიენ კამიუს შემცვლელად მოიაზრება, რომელიც „ევიანში“ გადაბარგდა. აღნიშნული ტრანსფერის შესახებ ჯერჯერობით სხვა ინფორმაცია არ არის.

შეგახსენებთ, რომ განვლილი სეზონის მეორე ნახევარი ოქრიაშვილმა იჯარით „ჩერნომორეცში“ ჩაატარა, თუმცა რამდენიმე დღის წინ ოდესურმა კლუბმა თანამშრომლობის შეწყვეტა გადაწყვიტა და თორნიკეს დონეცკის „შახტარში“ დაბრუნება მოუწია.

ოქრიაშვილი შახტარში ბრუნდება

Posted on ივლისი 25, 2014 by Levan

ოდესის “ჩერნომორეცის” ოფიციალური ვებ-გვერდის ცნობით თორნიკე ოქრიაშვილს ზღვისპირულ კლუბთან საიჯარო ხელშეკრულება დაუმთავრდა.

22 წლის ქართველი ფეხბურთელის სატრანსფერო უფლებები დონეცკის “შახტარს” ეკუთვნის. დიდი ალბათობით ოქრიაშვილი სწორედ “შახტარში” გააგრძელებს კარიერას.

გასულ სეზონში თორნიკე “ჩერნომორეცის” და “ილიჩივეცის” ღირსებას იცავდა და უკრაინული პრემიერლიგის 20 მატჩში 3 გოლის გატანა მოახერხა.

ოქრიაშვილით იტალიური კლუბები ინტერესდებიან

Posted on მაისი 28, 2014მაისი 28, 2014 by Levan

საქართველოს ნაკრების და ოდესის “ჩერნომორეცის” ფეხბურთელს თორნიკე ოქრიაშვილს სერია A-ში სურს კარიერის გაგრძელება. უკრაინული პრესისთვის მიცემულ ინტერვიუში თორნიკემ იტალიური კლუბების ინტერესზეც თქვა.

“სერია A-დან რამდენიმე ვარიანტი ადრეც იყო და აგენტების თქმით ახლაც არის. პირდაპირ გეტყვით, იტალიაში სათამაშოდ სიამოვნებით წავიდოდი.

ჩემს მომავალზე ჯერ ვერაფერს გეტყვით. ოდესაში თავს კარგად ვგრძნობ.თუმცა, ერთი რამ ზუსტად ვიცი, ჩემს თავს “შახტარში” ვერ ვხედავ. იქ მოსახვედრად ბრაზილიელივით უნდა ითამაშო. მე კი ბრაზილიელი არ ვარ, მე ქართველი ვარ” – განაცხადა ოქრიაშვილმა.

გასულ სეზონში “ილიჩივეცის” და “ჩერნომორეცის” შემადგენლობაში ოქრიაშვილმა 20 შეხვედრაში მიიღო მონაწილეობა და სამი გოლი გაიტანა.

ოქრიაშვილმა დონეცკელებს გაუტანა (ვიდეო)

Posted on აპრილი 16, 2014 by Levan

უკრაინის პრემიერლიგის მორიგ ტურში ოდესის “ჩერნომორეცი” დონეცკის “მეტალურგს” ესტუმრა და 3:2 დამარცხდა.

სტუმრები 2:0-ს აგებდნენ, როდესაც ოქრიაშვილმა ეფექტური გოლი გაიტანა და სხვაობა მინიმუმამდე შეამცირა. აღსანიშნავია, რომ მეორე გოლი “ჩერნომორეცმა” თორნიკეს წინააღდმეგ უხეშობისთვის დანიშნული 11-მეტრიანიდან გაიტანეს, თუმცა მიუხედავად ამისა მაინც დამარცხდნენ.

ოქრიაშვილმა “ჩერნომორეცში” სადებიუტო გოლი გაიტანა

Posted on მარტი 31, 2014 by -

30 მარტს, უკრაინის ჩემპიონატში, “ილიჩევეცმა” საკუთარ მოედანზე “ჩერნომორეცი” მიიღო და მეტოქე ანგარიშით 3:1 დაამარცხა.

აღსანიშნავია, რომ სტუმართა მხრიდან ერთადერთი გოლი ქართველმა ფეხბურთელმა თორნიკე ოქრიაშვილმა გაიტანა. 22 წლის შემტევმა ყოფილი გუნდი 87-ე წუთზე დაამწუხრა, ეს გოლი კი მისთვის “ჩერნომორეცის” რიგებში სადებიუტო იყო.

მატჩის დასრულების შემდეგ, ჟურნალისტებმა “ჩერნომორეცის” მთავარ მწვრთნელ რომან გრიგორჩუკს ოქრიაშვილის შესახებ ჰკითხეს, მან კი თქვა: “ოქრიაშვილმა გოლის გატანა მოახერხა. როცა თავდამსხმელს გოლი გააქვს, ეს ნამდვილად კარგია.”