ჭდე: ტორპედო

„ბაიანო“ – ქუთაისში ძნელად მოიძებნება ისეთი ფეხბურთის მოყვარული, რომელსაც ეს სახელი(გნებავთ – გვარი) არ ჰქონდეს გაგონილი. სინამდვილეში მას არც ჟუნიორი ჰქვია და არც ბრაზილიის მოქალაქეობა აქვს. როგორც იცით, ჩვენს ქალაქში დამკვიდრებული ეს თიკუნი „ტორპედოს“ ზეობის წლების ერთ-ერთ თანამონაწილეს დავით გამეზარდაშვილს შეარქვეს.

ერთ დროს, როცა იგი ოპტიმალურ ფორმაში იყო, „ტორპედოს“ „დაქოქვა“ „ბაიანოს“ გარეშე ისევე წარმოუდგენელი გახლდათ, როგორც ავტომანქანისა უძრავოდ. ის გულშემატკივრებში დიდი სიმპათიით სარგებლობდა. ამას, თავისი ახსნაც აქვს: შრომისმოყვარეობა, ლომივით უშიშრობა, უბადლო თამაში მაღალი ტრეაექტორიის ბურთებზე და თანაგუნდელებზე მკაცრი შეფუცხუნება. აი, ასეთი მუხტი მოდიოდა მისგან. სიმაღლეს(1.96 სმ) ძალიან კარგად იყენებდა და განსაკუთრებულ მოწონებას სწორედ მისი საჰაერო ორთაბრძოლები იმსახურებდა, რომელთა 95 პროცენტს მაინც იგებდა, ამიტომ „ტორპედოს“ ყოფილ კაპიტანს დღემდე საქართველოში ყველა დროის ერთ-ერთ(თუ ერთადერთ არა) საუკეთესო „მოიერიშედ“ აღიარებენ. ყველაფერს მოედანზე ამტკიცებდა. „ტორპედოს“ მეტოქის კარის მიმართულებით დანიშნულ თითქმის ყოველ სტანდარტულ მდგომარეობას გემახსოვრებათ რა შინაარსის სკანდირებაც მოჰყვებოდა – „ბაიანო გოლი! ბაიანო გოლი!..“.

ცენტრალურმა მცველმა თავით მოქმედების შემდეგ ბევრჯერ განაახლებინა მეტოქეს ცენტრიდან თამაში. თბილისის „დინამოს“ კარში გატანილი გადამწყვეტი გოლები კი წარუშლელ ემოციას გვახსენებს, საქართველოს ყველაზე ტიტულოვანი საფეხბურთო კლუბის წინააღმდეგ მან სამ შეხვედრაში გამოიჩინა თავი და სამივეჯერ ბოლო წუთებზე მოუტანა ქუთათურებს სამი ქულა.

„ბაიანოს“, თავისი წესიერებით, მთელი საქართველოს საფეხბურთო ნაწილი ღირსეული კაცის სახელით იცნობს. საფეხბურთი კლუბებში გატარებული პერიოდის ხანგრძლივობით, მისი კარიერის მეორე კლუბი ლატვიური „სკონტოა“. მას ბალტიისპირელებშიც არანაკლები ავტორიტეტი აქვს.

ალბათ, გაინტერესებთ როგორი იყო იგი გუნდის „შიგნით“. მოკლედ მოგახსენებთ: სრულიად გულწრფელი კაცი! განსხვავებით ქართულ ფეხბურთში მომუშავე ბევრი სუბიექტისაგან. ე.წ. ლიტონ სიტყვებს არ ამბობდა და არც ნიშნის მოგებით ულაპარაკია არასდროს. მან ზუსტად იცის, რას ნიშნავს ტორპედოელობა და ქუთაისური გულშემატკივრობა… თამაშის დროს, ხელებით ბევრჯერ მოუწოდებია ტრიბუნებზე მსხდომი ქომაგებისთვის გააქტიურება. იგი გულშემტკივრებს სათანადოდ აფასებდა და მათთან ურთიერთობაშიც არაფერი ეშლებოდა.

ჩინელი ფილოსოფოსის, კონფუცის სიტყვებია – უბრალოება ადამიანის საუკეთესო თვისებააო. სწორედ ეს თვისება არის წინა პლანზე „ბაიანოში“. ქედმაღლობით თუ მედიდურობით სპორტსმენს(თუნდაც ნებისმიერ ადამიანს) როდის მიუღია რაიმე სარგებელი?! მიუხედავად იმისა, რომ ფეხბურთელობის ბოლო პერიოდში იგი ძველ „სიმაღლეებზე“ ვეღარ ადიოდა და ამან მცირე უსიამოვნებებიც წარმოშვა, მისი რეპუტაცია არასდროს შეიცვლება…

ზემოთა სტრიქონებზე თვალის გადავლების შემდეგ ერთი ლოგიკური შეკითხვა გაგიჩნდებათ – სად არის ახლა „ბაიანო“?

– უკვე წელიწადნახევარია, რაც 31 წლისამ ბუცები ლურსმნებზე ჩამოკიდა და ლატვიაში იმყოფება ოჯახთან ერთად. იქ მუშაობას აგრძელებს, ოღონდ პროფესია შეიცვალა და სხვა სამსახურიც მოძებნა…

ჩვენ, დიდი მადლიერებით ვაცილებთ მას ფეხბურთიდან!

ბოლოს კი, გთავაზობთ იმ თამაშის ვიდეორგოლს, რომელშიც „ბაიანომ“ ქუთაისელი გულშემატკივრების მოწოდებას ჩვეულ სტილში უპასუხა.

FCTorpedo.GE

მოგეხსენებათ, ქუთაისის „ტორპედოს“ მთავარი მწვრთნელის პოსტი რევაზ ძოძუაშვილმა უკვე დატოვა. ჩვენი კლუბი მადლობას უხდის მას გაწეული სამსახურისთვის და წარმატებებს უსურვებს მომავალში.

დღეს საბოლოოდ გადაწყდა, რომ „ტორპედოს“ ახალი თავკაცი – 46 წლის გიორგი დარასელია იქნება. მისი, როგორც ფეხბურთელის, კარიერა სწორედ მშობლიური ქალაქის კლუბში დაიწყო, სადაც ამპლუით თავდამსხმელმა საბჭოთა კავშირისა და საქართველოს ეროვნულ ჩემპიონატებში ქუთაისელთა ღირსება 155 მატჩში დაიცვა და 41 გოლიც გაიტანა. 9 თამაში ჩაატარა ქვეყნის პირველ გუნდშიც და 2-ჯერ აიღო მეტოქეთა კარი. რაც შეეხება სამწვრთნელო კარიერას, 2004 წლიდან დღემდე დარასელიას სულ 7 კლუბში აქვს ნამუშევარი. თავიდან 3 წელი თანაშემწედ იყო ისრაელის კფარ-საბას „ჰაპოელში“, შემდეგ ამავე ქვეყნის წარმომადგენელ სახნინის „ბნეიში“ მოღვაწეობდა, საიდანაც გადავიდა ხაიფას „მაკაბში“ და ორჯერ გახდა ისრაელის ჩემპიონი. 2012 წელს იგი საქართველოში დაბრუნდა გორის „დილას“ ჩაუდგა სათავეში, რომელმაც ჩემპიონატში მეორე ადგილი დაიკავა. აქედან წავიდა რუსულ „სკა-ენერგიაში“, ბოლოს კი „ზუგდიდს“ წვრთნიდა.

ცნობილია დარასელიას თანაშემწის ვინაობაც, ეს პოსტი „ტორპედოს“ ყველა დროის ერთ-ერთმა საუკეთესო ბომბარდირმა 36 წლის გიორგი მეგრელაძემ დაიკავა, რომელმაც სამწვრთნელო კარიერა მიმდინარე წელს „ტორპედოს“ დუბლშემადგენლობაში დაიწყო.

იმის გამო, რომ ჩვენი ქალაქის მერი, ბატონი შოთა მურღულია ამჟამად ქვეყანაში არ იმყოფება, ახალი მთავარი მწვრთნელის წარდგენის თარიღი მოგვიანებით დაზუსტდება.

FCTorpedo.GE

ჭაბუკთა ლიგის ორივე ასაკობრივ ტურნირზე პირველი წრის ბოლო ტურის მატჩები გაიმართა. ტორპედოელები ბოლნისის თამაზ სტეფანიას სახელობის სტადიონზე ადგილობრივ ს.კ. „სიონის“ თანატოლებს შეხვდნენ.

დღევანდელ შეხვედრებში მონაწილე გუნდებს უმძიმეს მდგომარეობაში მყოფ მოედანზე მოუწიათ ორთაბრძოლების ჩატარება. როგორც წესი, ჯერ 16-წლამდე გუნდებმა გაუწიეს მეტოქეობა ერთმანეთს, სადაც ქუთაისელებმა ანგარიშით 4:0 სძლიეს მასპინძლებს და ზედიზედ მოგებული თამაშების რაოდენობა 10-მდე დაამრგვალეს. ტორპედოელ მეგოლეებს რაც შეეხება, ორ-ორჯერ თავი სერგი კუხიანიძემ და გეგი ბაქრაძემგამოიჩინეს. ამ წარმატებული სერიის შემდეგ რევაზ კვერნაძის შეგირდები ახალ წელს სატურნირო ცხრილის მე-3 ადგილზე შეხვდებიან. აქვე მოგახსენებთ, რომ ქვეყნის 16-წლამდე ნაკრებში ამ გუნდიდან შემდეგი ტორპედოელები გამოიძახეს: ლაშა სალუქვაძე, თემურ წულაია და ჯემიკო ზარნაძე.

„ტორპედო U-16”: კიკნაძე(მუკბანიანი 50), ჯინჭარაძე(ხურციძე 45), თავაძე, სალუქვაძე, გულბიანი, დავითულიანი(ბზიკაძე 50), ზარნაძე(გოგიაშვილი 37), მაღლაკელიძე(აბულაძე 45), წულაია(კალანდია 50), ბაქრაძე(შარვაშიძე 42), კუხიანიძე.

სატურნირო ცხრილი

დაძაბული გამოდგა  მეორე მატჩი, რაც მის საბოლოო ანგარიშზეც აისახა 2:2. სტუმრები ორჯერ აღმოჩნდნენ მდევრის რანგში, თუმცა გაბრიელ საღრიშვილისა(პენალტით) და გიორგი გორდაძისგოლებით(75-ე და 92-ე წუთებზე) გუნდები თითო-თითო ქულას დასჯერდნენ. აკაკი კვერნაძისთაოსნობით 18-წლამდე ტორპედოელებმა „უმცროსების“ მსგავსად ეს წელი მე-3 ადგილზე დაასრულეს.

„ტორპედო U-18”: გეგუჩაძე, წიქარიშვილი(გიორგაძე 80), ნიშნიანიძე, ქუთათელაძე(შეყრილაძე 50), ბურჯანაძე, მარდალეიშვილი(გორდაძე 81), ა. ჭიჭინაძე(ღარწკია 82), იონანიძე(გაბუნია 80), საღრიშვილი, ო. ჭიჭინაძე(ჯავახაძე 65), ჩიხლაძე.

სატურნირო ცხრილი

FCTorpedo.GE

30 ნოემბერს, საქართველოს 26-ეროვნული ჩემპიონატის უმაღლესი ლიგის მე-14 ტურის მატჩები გაიმართა. ქუთაისის „ტორპედო“ სტუმრად „ჩელე არენაზე“ ქობულეთის „შუქურას“ დაუპირისპირდა.

ტრავმების გამო „შუქურასთან“ მატჩს ტრიბუნიდან ადევნეს თვალი ტორპედოელებმა ვაჟა ტაბატაძემ და ბექა ტუღუშმა. სიახლე იყო „ტორპედოს“ ძირითად შემადგენლობაში 20 წლის მეკარის, საბა ცაბუტაშვილის გამოჩენა, რომელსაც დღეს უმაღლეს ლიგაში დებიუტი ჰქონდა. თამაშის დასაწყისმა მასპინძელთა უპირატესობით ჩაიარა და უკვე დებიუტშივე მათ ორი რეალური საგოლე მომენტი გაანიავეს, უფრო კონკრეტულად ჩაფიძემ, რომელმაც ორივეჯერ ფეხით ვერ მოახვედრა მიზანში. მე-8 წუთზე, მეტრეველს დაუმორჩილა ბურთი ცაბუტაშვილმა. მე-11 წუთზე, ფიფიამ დაარტყა ძლიერად შორი მანძილიდან, ამჯერად თამაშში მეკარე კაკალაძე ჩაერთო და ბურთი ლამაზ ნახტომში მოიგერია კუთხურზე. მე-13 წუთზე, კვერნაძემ განახორციელა დრიბლინგი და ძალზედ მახვილი კუთხიდან დაარტყა კარში, მეკარეს ბურთის აღება არ გასჭირვებია. მე-17 წუთზე, კვერნაძეს თავითაც ჰქონდა კარის აღების მცდელობა, მაგრამ თოდუას ჩაწოდებით მან სანტიმეტრებით ააცილა კარს. „ტორპედოს“ პირველ ტაიმში მეტი გამოსარჩევი აღარაფერი შეუქმნია. „შუქურამ“ კი არაერთხელ შეაწუხა ტორპედოელი მეკარე, ყველაზე მეტჯერ ეს ჩაფიძემ გააკეთა(ამ უკანასკნელთან ერთად დღეს აქტიურები იყვნენ ექსტორპედოელები: გურული და კუხიანიძე), რომელმაც ერთხელ ძელსაც მოარტყა, თუმცა როგორც მან, ისე მისმა თანაგუნდელებმა ტაიმებს შორის შესვენებამდე გოლის გატანა ვერ მოახერხეს – 0:0.

მეორე ტაიმში სახიფათო მომენტებმა იკლო. მიუხედავად ამისა გოლები სწორედ დასკვნით მეორედში გავიდა. 52-ე წუთზე, „შუქურამ“ სტანდარტული მდგომარეობიდან შეძლო ანგარიშის გახსნა, საჯარიმოში ჩაწოდების შემდეგ ბურთი დავით ხოჭოლავამ ერთშეხებაში გადაგზავნა კარში – 1:0. მდევრი რანგში ჩავარდნილი „ტორპედო“ ოდნავ გამოფხიზლდა და ანგარიშიც გაათანაბრა: 65-ე წუთზე, ჩიკვილაძემ მარცხენა ფლანგიდან ჩაჰკიდა ბურთი საჯარიმოში, სადაც გოგი ფიფიამ შეასრულა ლამაზი თავური დარტყმა და ქუთაისელთა მაისურით ჩემპიონატში მისი პირველი გოლი გაიტანა – 1:1. თამაში თანაბარ ორთაბრძოლებში გაგრძელდა, თუმცა გადამწყვეტი აღმოჩნდა 82-ე წუთი, როცა სტუმართა დაცვის შეცდომით მეკარესთან პირისპირ შუქურელი ზაზა ტუღუში გავიდა და მისი შედეგიანი დარტყმით საბოლოო ანგარიშიც დაფიქსირდა – 2:1. „ტორპედომ“ ჩემპიონატში ზედიზედ მე-8 მატჩი ვერ მოიგო, ამ წაგებით კი გათამაშების ცხრილში დაღმასვლა განიცადა და მე-12 ადგილზე ჩამოქვეითდა.

FCTorpedo.GE

22 ნოემბერს, ქუთაისის ცენტრალური სტადიონი მორიგ საჩემპიონატო იმერულ დერბის უმასპინძლებს. ადგილობრივ ს.კ. „ტორპედოსა“ და ს.კ. „ზესტაფონს“ შორის შეხვედრაზე, რომელიც 14:00 საათზე დაიწყება,დასწრება უფასოა.

სანამ „ზესტაფონს“ ვუმასპინძლებდეთ, ტრადიციულად, ჩვენს მომდევნო მეტოქესა და მასთან არსებულ სტატისტიკას წარმოგიდგენთ. 2-გზის ჩემპიონ ზემოიმერელთა(2011-12 წლებში) შემადგენლობა ევროპის ლიგის მეორე საკვალიფიკაციო ეტაპზე სლოვაკურ „ტრნავასთან“(0:0, 0:3) მარცხის შემდეგ მნიშვნელოვნად შეიცვალა. მიმდინარე პირველობაზე გასული 12 ტურის შედეგად დაგროვილი 17 ქულით ისინი მე-7 ადგილზე იმყოფებიან. გია გეგუჩაძის შეგირდებს ჩემპიონატში ბოლო 8 თამაშია არ წაუგიათ, თუმცა აქედან მათ მხოლოდ 3 მოიგეს – „სიონთან“, „ვიტ ჯორჯიასთან“, „სპარტაკთან“ და ზედიზედ 5 ფრე ითამაშეს – „შუქურასთან“, „მეტალურგთან“, „კოლხეთთან“, „დილასთან“ და „მერანთან“. 3 დღის წინ კი „ზესტაფონმა“ ზედიზედ მე-9 წაუგებელი მატჩიც ჩაატარა, ოღონდ ქვეყნის თასის გათამაშების მერვედფინალში სტუმრად „ჩიხურასთან“(0:0).

დისკვალიფიკაციის გამო დამდეგ იმერულ დერბის მხოლოდ „ტორპედოდან“ ეყოლება დანაკლისი – ვალერი აბრამიძის სახით.

რაც შეეხება სტატისტიკას, ეროვნული ჩემპიონატების ჩატარების დღიდან ქუთაისის „ტორპედო“(საწყის სამ ჩემპიონატში „ქუთაისის“ სახელით გამოდიოდა) სამ სხვადასხვა ზესტაფონურ გუნდსაა შენახვედრი: „მარგვეთს“, „მეტალურგსა“ და „ზესტაფონს“. სულ ქუთაისურ და ზესტაფონურ გუნდებს შორის უმაღლეს ლიგაში 40 მატჩია(კიდევ ერთ შეხვედრაში „მეტალურგი“ არ გამოცხადდა) ნათამაშები. 18 რიონისპირელებმა მოიგეს, 13 ყვირილასპირელებმა, 8 ფრედ დასრულდა, ბურთების შეფარდება 58:40 ქუთაისელთა სასარგებლოდაა. 5 მატჩი შედგა ეროვნული თასის გათამაშებებზე – 1 მოგება ქუთაისელთა მხარესაა, 2 მატჩი ფრედ დასრულდა, 2-ჯერ კი ზესტაფონელებმა იმარჯვეს(ბურთების უკეთესი ბალანსი ზესტაფონელთა მხარესაა – 5:3).

ყველაზე დიდი სხვაობით ქუთაისელებს სხვადასხვა ჩემპიონატში 3-ჯერ, ანგარიშით 4:0 დაუმარცხებიათ ზესტაფონური გუნდები. საპირისპიროდ კი, უდიდესი ანგარიშით 1996 წელს, „მარგვეთთან“ ანგარიშით 3:5 გვაქვს წაგებული.

ბოლოს კი, გთავაზობთ ზესტაფონელთა წინააღმდეგ “ტორპედოს“ მიერ გატანილი გოლების ავტორებს, შესაბამისი მაჩვენებლებით.

6 გოლი – გიორგი მეგრელაძე

5 გოლი – მამუკა ხუნდაძე

4 გოლი – ზაზა ვაჩიბერაძე

3 გოლი – კახა კვეტენაძე, მიხეილ აშვეთია

2 გოლი – გიორგი დარასელია, მირზა მაღლაკელიძე, ანდრეი პოროშინი, გიორგი შენგელია, გივი დიდავა, დავით ჯანაშია, დავით გამეზარდაშვილი, დავით ნოზაძე, გიორგი კუხიანიძე, ნიკა საბანაძე

1 გოლი – არჩილ ჩხაბერიძე, გელა კიკალეიშვილი, ლევან ქებაძე, შალვა ხუჯაძე, დიმიტრი პარამონოვი, ზვიად ქუთათელაძე, მალხაზ ასათიანი, ზურაბ იონანიძე, შოთა ბაბუნაშვილი, გაგა ჩხეტიანი, დავით ბოლქვაძე, რევაზ ჯიქია, არმაზ დოღონაძე, თენგიზ ჩიკვილაძე, მერაბ გიგაური, დავით დიღმელაშვილი, რევაზ გოცირიძე, ნიკა ფირცხალავა, გიორგი დათუნაიშვილი, თორნიკე კაპანაძე.

FCTorpedo.GE