მადრიდის “რეალის” ნახევარმცველი გარეტ ბეილი მეოთხედ გახდა უელსის წლის საუკეთესო ფეხბურთელი.
ბეილი უელსური ფეხბურთის ისტორიაში პირველი მოთამაშეა, რომელიც წლის ფეხბურთელი სამზე მეტჯერ გახდა.
“ფანტასტური წელი იყო. “რეალში” ტიტულების მოსაგებად გადავედი. ამ წარმატებების მიღწევაში იღბალიც დამეხმარა”, – აღნიშნა ბეილმა.
მადრიდის “რეალის” ფეხბურთელი გარეტ ბეილი აცხადებს, რომ უელსის ნაკრებს ევროპის 2016 წლის ჩემპიონატზე მოხვედრა შეუძლია.
“ჩვენ კარგი გუნდი გვყავს და ვფიქრობ, ევროპის ჩემპიონატზე მოხვედრა შეგვიძლია. მშვენივრად ვემზადებით და ბევრს ვშრომობთ. ახლა, მთავარი ისაა, რომ მოედანზე ჩვენი შესაძლებლობები გამოვავლინოთ”, – ამბობს ბეილი.
შეგახსენებთ, რომ უელსელები 9 სექტემბერს ანდორის ნაკრებს დაუპირისპირდებიან.
13 ნოემბერს, საქართველოში, სტარტი ევროპის 19-წლამდელთა ჩემპიონატის საკვალიფიკაციო ეტაპის მატჩებმა აიღო. საქართველოს ნაკრებმა “მიხეილ მესხზე” უელსის ნაკრები მიიღო და მეტოქე ყველა კომპონენტში დაჯაბნა.
ქართველებმა თამაში აქტიურად დაიწყეს. მე-6 წუთზე, ნიკა ჭანტურიას პასის შემდეგ, დავით ჯიქიამ წინ გამოსულ მეკარეს ბურთი თავზე გადაუგდო, თუმცა საბოლოოდ, ცარიელ კართან მყოფმა გოლის გატანა ვერ შეძლო. იმავე ჯიქიამ, მე-10 წუთზე შორიდან ძლიერად დაარტყა, მაგრამ ბურთი კარს მცირედით აცდა.
მაისურაძის შეგირდებმა ანგარიში 22-ე წუთზე გახსნეს – გურეშიძის პასის შემდეგ, უელსელმა მცველებმა შეუთანხმებლად იმოქმედეს, ხოლო პაპუნაშვილმა მეკარეს ბურთი თავზე გადაუგდო და ის კარის ბადეში მოაქცია.
26-ე წუთზე, უელსის ნაკრების მცველმა საკუთარ მეკარეს ცუდი პასი გაუკეთა, კიპერმა ბურთი ვერ დაიმორჩილა, ხოლო იქვე მყოფმა ჯიქიამ საქართველოს უპირატესობა ორამდე გაზარდა.
28-ე წუთზე, უელსელთა კარის მიმართულებით, ოთარ კაკაბაძემ ძლიერად გაისროლა, თუმცა კარის დარაჯმა ბურთის მოგერიება მოახერხა. მალევე, საჯარიმოში მყოფმა ჯიქიამ მახვილი კუთხიდან დაარტყა, თუმცა სტუმრებს ამჯერად ძელმა უშველა.
43-ე წუთზე, ზარანდიას ჩაწოდებულ კუთხურს ალექსანდრე გურეშიძე თავით გამოეხმაურა – 3:0. ტაიმის ბოლოს, საჯარიმოში სწრაფად შესულ ზარანდიას მეტოქე გუნდის მცველმა გოლის გატანის საშუალება არ მისცა.
ქართველებმა მეორე ტაიმიც აქტიურად დაიწყეს. 49-ე წუთზე, ჯიქიამ მეტოქე გუნდის საჯარიმოში რამდენიმე მოთამაშე მოატყუა, თუმცა არაზუსტად დაარტყა. 55-ე წუთზე, უელსელთა საჯარიმოში მყოფმა ჯიქიამ მეტოქე ბრწყინვალედ ჩამოიტოვა და გოლი გაიტანა – 4:0.
57-ე წუთზე, ჯიქია კვლავ კარგ პოზიციაში აღმოჩნდა, ის საჯარიმოს გარეთ გამოსულ მეკარეს ბურთს თავზე უგდებდა, თუმცა ობრაიანმა ის ხელით მოიგერია, რისთვისაც მსაჯმა მოედნიდან გააძევა. დანიშნული ჯარიმა უნაკლოდ შეასრულა მათე ცინცაძემ – 5:0.
78-ე წუთზე, აბურჯანიამ შენგელია მეკარესთან ერთი-ერთზე დატოვა, თუმცა ამ უკანასკნელმა გოლის გატანა ვერ შეძლო.
საბოლოო შედეგი 84-ე წუთზე დაფიქსირდა, როცა უელსელთა ფეხბურთელმა, თომას ოსალივანმა ქართველთა კარი საჯარიმო დარტყმით აიღო.
ვასილ მაისურაძე: “კმაყოფილები ვართ. არ მეგონა, მეტოქეს ასე ადვილად თუ დავამარცხებდით. აქცენტს პირველ მატჩზე ვაკეთებდით და ყველაფერი კარგად დასრულდა. ადრეც ვთქვი, რომ უელსთან და მოლდოვასთან პირველ ნომრად თამაშს ვაპირებდით. ჩვენი საყრდენები ცოტათი დაღლილები იყვნენ, ამიტომ ისეთი პრესინგი არ გამოგვივიდა, როგორიც გვსურდა. შევეცდებით, მომდევნო შეხვედრისათვის ძალები მაქსიმალურად აღვიდგინოთ. რამდენიმე წლის წინ, მოლდოვის ნაკრებთან კი ვითამაშეთ, მაგრამ მას შემდეგ დიდი დრო გავიდა, თუმცა ვფიქრობ, რომ მათ კარგი გუნდი ჰყავთ.”
ალექსანდრე გურეშიძე: “ძალიან კმაყოფილები ვართ. მინდა, ბიჭებს მადლობა გადავუხადო. ასეთ მარტივ მოგებას არ ველოდით. უელსს პირველ ნახევარში ცუდი შთაბეჭდილება არ დაუტოვებია. ვაპირებთ, რომ კიდევ უფრო მოვუმატოთ.”
გერანტ უილიამსი: “მატჩი ჩვენთვის არასასიამოვნო შედეგით დასრულდა. საქართველოს ნაკრები ძალიან კარგი გუნდია. ქართველები ბურთს კარგად გრძნობენ და მოედანზე მშვენივრად მოძრაობენ, ჩვენ კი სწორედ ამიტომ დავმარცხდით.”
საქართველო – უელსი 5:1
“მიხეილ მესხი”
საქართველო: ქურდაძე, კაკაბაძე, გურეშიძე, ჭანტურია, ცინცაძე, აბურჯანია, პაპუნაშვილი (შენგელია 64′), ჯიქია (კერძევაძე 59′), კიკაბიძე, თევზაძე, ზარანდია (ახვლედიანი 75′).
მთავარი მწვრთნელი: ვასილ მაისურაძე.
უელსი: ობრაიანი, ვიკჰემი, ჯონი, რ. ევანსი, იორვერტი, დევისი, ჯ. ევანსი (ქროუვი 58′), შიჰანი (ვიკსი 72′), რეიდი (ჯოუნსი 72′), ოსალივანი, უილიამსი.
მთავარი მწვრთნელი: გერანტ უილიამსი.
გოლები: პაპუნაშვილი 22′, ჯიქია 26′ 55′ , გურეშიძე 43′, ცინცაძე 57′ – ოსალივანი 84′.
გაფრთხილებები: პაპუნაშვილი 18′, ახვლედიანი 82′ – ოსალივანი 78′, დევისი 80′.
გაძევება: ობრაიანი 57′.
მთავარი მსაჯი: მათიას გესტრანიუსი (ფინეთი).
დიტო ჭიჭინაძე
13 ნოემბრიდან, საქართველოში, ევროპის 19-წლამდელთა ჩემპიონატის საკვალიფიკაციო ეტაპის მატჩები ჩატარდება. ტურნირის შეხვედრები “მიხეილ მესხსა” და “დინამო არენაზე” გაიმართება. საქართველოს ნაკრების მოწინააღმდეგეები მოლდოვის, ჰოლანდიისა და უელსის ნაკრებები იქნებიან.
ტურნირის დაწყების წინ, 12 ნოემბერს, “მიხეილ მესხზე” ოთხივე გუნდის მწვრთნელმა პრესკონფერენცია გამართეს.
ვასილ მაისურაძე (საქართველოს ნაკრების მთავარი მწვრთნელი): “აქცენტს პირველ მატჩზე ვაკეთებთ. ამჟამად, მხოლოდ უელსის ნაკრებთან გასამართ შეხვედრაზე ვფიქრობთ. ტურნირის ფავორიტების დასახელებისგან თავს შევიკავებ. ოთო გოშაძე დაშავდა, მაგრამ სხვა ფეხბურთელები თავს კარგად გრძნობენ.”
ჯეფ ვუდი (უელსის ნაკრების მეკარეების მწვრთნელი): “პირველი შთაბეჭდილებები დადებითია. ჩვენი მეტოქეების მსგავსად, კარგი შემადგენლობა გვყავს. იმედი მაქვს, რომ კარგი ტურნირი გამოვა.”
ვიმ ვან ზვამი (ჰოლანდიის ნაკრების მთავარი მწვრთნელი): “მართალია, სექტემბერ-ოქტომბერში მატჩები ჩავატარეთ, მაგრამ ხვალ ყველაზე მნიშვნელოვანი თამაში გველის. ამ დროისთვის, მხოლოდ მოლდოვის ნაკრებზე ვფიქრობთ. ყველა მეტოქეს პატივს ვცემთ. ჩემი აზრით, ასეთ ტურნირებზე, შესაძელებელია, ყველაფერი მოხდეს.”
იური ოსპინენკო (მოლდოვის ნაკრების მთავარი მწვრთნელი): “მოლდოვასა და საქართველოს ერთმანეთთან ბევრი რამ აკავშირებს, ამიტომ აქ თავს ისე ვგრძნობთ, როგორც საკუთარ სახლში. გვინდა, ტურნირზე ღირსეულად გამოვიდეთ.”
შეგახსენებთ, რომ საქართველოს 19-წლამდელთა ნაკრები პირველ მატჩს ხვალ, უელსის ნაკრების წინააღმდეგ გამართავს. შეხვედრა “მიხეილ მესხზე”, 14:00 საათზე დაიწყება.
დიტო ჭიჭინაძე
პიტ ედვარდსი უელსის ნაკრების ნახევარმცველ ჰარი უილსონის ბაბუაა, რომელმაც 13 წლის წინათ გაკეთებული ფსონით გუშინწინ 125 000 ფუნტი მოიგო. საქმე იმაში გახლავთ, რომ 2000 წელს, როცა უილსონი მხოლოდ 2 წლის იყო, ედვარდსი ფსონს ჩამოვიდა, ჩემი შვილიშვილი ერთ დღესაც უელსის ეროვნული ნაკრების ფორმას მოირგებსო და ასე აგიხდეთ ყველაფერი კარგი. ბრიტანულმა საბუკმეიკერო კანტორებმა ფსონი 2 500 კოეფიციენტით შეაფასეს, ედვარდსი 50 ფუნტს ჩამოვიდა და გვარიან ხეირსაც გამოჰკრა ხელი.
2014 წლის მსოფლიოს ჩემპიონატის შესარჩევი ეტაპის უკანასკნელ მატჩში, რომელიც უელსის ნაკრებმა ბელგიის წინააღმდეგ გამართა (1:1), უილსონი მოედანზე 87-ე წუთზე შევიდა და ბაბუას ფსონი მოაგებინა. ყველაფერთან ერთად, უილსონმა ნაკრებში ყველაზე ადრეული დებიუტით გარეტ ბეილის რეკორდიც დაამხო – 16 წელი და 207 დღე (ბეილი სანაკრებო დებიუტისას 16 წლისა და 315 დღის გახლდათ , – ავტ.).
ცნობისთვის, ჰარი უილსონი „ლივერპულის“ აკადემიაში ირიცხება.
ბექა დოგრაშვილი
“ლივერპულის” 16 წლის ფეხბურთელი, ჰარი უილსონი უელსის ეროვნულ ნაკრებში გამოიძახეს. ის გუნდს მსოფლიოს 2014 წლის ჩემპიონატის შესარჩევ მატჩებში დაეხმარება. ჰარის, უელსის 17-წლამდელთა ნაკრებში, უნგრეთის, შოტლანდიისა და სლოვენიის ნაკრებების წინააღმდეგ უთამაშია”, – ვკითხულობთ უელსის ფეხბურთის მმართველი ორგანიზაციის ოფიციალურ განცხადებაში.
იმ შემთხვევაში, თუ ჰარი უილსონი პარასკევს, მაკედონიის ნაკრების წინააღმდეგ გასამართ მატჩში მონაწილეობას მიიღებს, ის თანემემამულე გარეტ ბეილის რეკორდს დაამხობს.
საინტერესოა, რომ 16 წლის ნახევარმცველს “ლივერპულის” გულშემატკივართა მხოლოდ მცირე ნაწილი იცნობს. მის შესახებ ცნობილი მას შემდეგ გახდა, რაც ის უელსეთა თავკაცმა ნაკრებში გამოიძახა.
ჰარი უილსონს “ახალ გარეტ ბეილს” უწოდებენ, რადგან ის მადრიდის “რეალის” ახალწვეულს თამაშის სტილით მიაგავს.
ზაფხულის სატრანსფერო ფანჯარაზე „ტოტენჰემ ჰოთსპურიდან“ მადრიდის „რეალში“ გარეტ ბეილის ტრანსფერის განხორციელებამ ახალი რეკორდი მოხსნა. მოგეხსენებათ, აღნიშნულ ტრანსფერამდე ყველაზე ძვირადღირებულ გადაბარგებად კრიშტიანუ რონალდუს ტრანსფერი ითვლებოდა.
ბეილის „რეალში“ გადასვლამ დიდი გამოხმაურება ჰპოვა და ბევრი აალაპარაკა, მათ შორის 82 წლის ქვრივი კაცი ბილ ტაუტი. ეს უცნობი ადამიანი გარეტ ბეილის კარის მეზობელია, რომლის თქმითაც, ბავშვობაში ბეილი ფეხბურთს ხშირად თამაშობდა და დღე არ გავიდოდა, ბურთი მოხუცი კაცის ბაღში არ გადავარდნილიყო. ბილ ტაუტი ახლა იმითი იწონებს თავს, რომ, გაბრაზების მიუხედავად, მის ბაღში გადავარდნილ ბურთს ბეილს ყოველთვის უკან უბრუნებდა.
„დღე არ გავიდოდა, რომ ბეილს ჩემს სახლთან ფეხბურთი არ ეთამაშა და ბურთი ჩემს ბაღში არ გადმოეგდო. ერთ ღამეს ბურთი 14-ჯერ გადმოუვარდა, თუმცა 14-ჯერვე უკან დავუბრუნე და მისთვის თამაში არ შემიწყვეტინებია“.
წარსულში მხატვარმა და დეკორატორმა, ბილმა ის ორ მეტრამდე ღობე გვაჩვენა, რომელიც მას ბეილის ოჯახისაგან ჰყოფს და თქვა: „ეს ყველაფერი აქ დაიწყო…“
„მაგრამ მილიონი წელი ვერ წარმოვიდგენდი, რომ ბეილი ამ წარმატებას მიაღწევდა და 85 მილიონ ფუნტად გაიყიდებოდა. ის ბავშვობაში როგორც კი სკოლიდან დაბრუნდებოდა, ეზოში მაშინვე ბურთით გამოდიოდა და დაღამებამდე თამაშობდა, მათ შორის ზამთარშიც, როცა ძალიან ყინავდა. მაშინ, როცა ბურთი ჩემს ბაღში აღმოჩნდებოდა, მე ადგილზე ფლეშივით (კომიქსის სუპერგმირი – ავტ.) ვჩნდებოდი, რათა მისთვის განაჩენი გამომეტანა. ბეილი ბავშვობაშიც ძალიან სწრაფი იყო, რადგან ბურთის გადმოვარდნის შემდეგ ის სახლში უმალ შევარდებოდა, მე რომ არ დამენახა“.
„17 წლის ასაკში, როდესაც ის „საუთჰემპტონში“ ჩარიცხვასთან ახლოს იყო, ეზოში, როგორი ამინდიც არ უნდა ყოფილიყო, ბურთის ჰაერში გაჩერებას ცდილობდა“, – ამბობს ტაუტი.
შეგახსენებთ, რომ უელსელი ფეხბურთელის ტრანსფერი ოფიციალურად კვირას, ღამე განხორციელდა, მას შემდეგ, რაც ბეილი კვირაში 300 ათას ფუნტსა და 6-წლიან ხელშეკრულებას დათანხმდა.
ბილ ტაუტის მოპირდაპირე მხარეს გარეტ ბეილის მშობლები – ფრენკი და დები – კვლავაც ცხოვრობენ – უითჩარჩში, კარდიფში.
ბილ ტაუტის თქმით, ბეილი ჯერ კიდევ ოთხი წლისა იყო, როცა ბურთს ჰაერში კარგად ფლობდა.
„მახსოვს, ერთხელ ბურთზე კონტროლი დაკარგა, ღობეს გადაცილა და ღია კარში შემოაგდო. ბურთი, საბედნიეროდ, არა – მე, არამედ სკამს მოხვდა, რომელზეც ვიჯექი“.
„ბეილის გამო ბევრჯერ გავღიზიანებულვარ, მაგრამ მის მშობლებთან მეგობრული ურთიერთობა არასდროს დამიკარგავს. მერე მივხვდი, რომ ეს უბრალოდ პატარა, ცელქი ბიჭი იყო“.
ბილი მთელი ცხოვრებაა ამ სახლში ცხოვრობს, ხოლო ბეილის ოჯახი – 30 წელია.
„გარეტის მშობლები სასიამოვნო ხალხია. ისინი თავიანთი შვილით ამაყობენ. უნდა გამოგიტყდეთ და გითხრათ, რომ არ მეგონა ბეილი ამხელა წარმატენას თუ მიაღწევდა. ვფიქრობდი, რომ მისთვის „ნიუპორტ ქანთრის“ მსგავს გუნდში მოხვედრაც კი საკმარისი იქნებოდა. როცა ვფიქრობ, რომ ის ყველაზე ძვირადღირებული ფეხბურთელია, ჩემს განცვიფრებას საზღვარი არ აქვს. ახლა მიხარია, რომ ჩემს ბაღში გადმოგდებულ ბურთს ყოველთვის უკან ვუბრუნებდი და მისი განვითარებისთვის ხელი არ შემიშლია“.
„ბეილი ყოველთვის მორცხვი ბიჭი იყო, მაგრამ – საყვარელი, მშვენიერი ოჯახიდან. ის რაც ფრენკმა და დებიმ მისთვის გააკეთეს, მსხვერპლშეწირვის ტოლფასი იყო. ყველა, ვინც აქ ცხოვრობს, ბეილის წარმატებით ამაყობს და მადრიდის „რეალში“ მის პირველ თამაშს მოუთმენლად ელოდება“, – დასძინა ბილ ტაუტმა.
გიორგი დოგრაშვილი
