ჭდე: ვიდეო

“მანჩესტერ იუნაიტედი” “ვესტ ბრომვიჩთან” მარცხს გადაურჩა

Posted on by ბექა დოგრაშვილი

ინგლისის პრემიერლიგის VIII ტურის დასკვნითი მატჩი “ჰოტორნსზე” გაიმართა, სადაც “ვესტ ბრომვიჩ ალბიონმა” “მანჩესტერ იუნაიტედს” უმასპინძლა. შეხვედრა ფრედ, ანგარიშით 2:2 დასრულდა.

მასპინძლები მატჩის დებიუტშივე დაწინაურდნენ: მე-8 წუთზე სტეფან სესენიონმა გაიტანა. შესვენების შემდეგ “წითელმა ეშმაკებმა” მარუან ფელაინის გოლის წყალობით ანგარიში გაათანაბრეს. სხვათა შორის, ბელგიელი ფეხბურთელისთვის ეს “მანჩესტერ იუნაიტედის” რიგებში გატანილი პირველი გოლია. 66-ე წუთზე საიდო ბერაჰინომ მასპინძლები კვლავ დააწინაურა. ლუი ვან გაალის გუნდი მარცხს დეილი ბლინდის მიერ 87-ე წუთზე გატანლი გოლის წყალობით გადაურჩა — 2:2.

“მანჩესტერ იუნაიტედმა” 12 ქულას მოუყარა თავი და სატურნირო ცხრლში მეექვსე პოზიციაზე გადანაცვლა. “ვესტ ბრომვიჩს” აქტივში 9 ქულა აქვს და მე-14 ადგილი უკავია.

სრული სატურნირო ცხრილის სანახავად გადადით ბმულზე: ცხრილები

ინგლისის პრემიერლიგა
“ვესტ ბრომვიჩი” — “მანჩესტერ იუნაიტედი” 2:2 (1:0)
გოლები: სესენიონი 8′, ბერაინო 66′ — ფელაინი 48′, ბლინდი 87′.

ხელით გატანილი გოლის წყალობით “ემპოლიმ” “ჯენოასთან” ქულა მოიპოვა

Posted on by ბექა დოგრაშვილი

იტალიის სერია A-ს VII ტურის დასკვნითი მატჩი გენუაში შედგა, სადაც ადგილობრივმა “ჯენოამ” “ემპოლი” მიიღო. ანგარიში მე-14 წუთზე მასპინძელთა შემტევმა ნახევარმცველმა ანდრეა ბერტოლაჩიმ ეფექტური დარტყმით გახსნა. სტუმრებმა გათანაბრება 77-ე წუთზე შეძლეს: მარცხენა ფრთიდან მოწოდებული კუთხურის შემდეგ გენუელებმა სიტუაციის განმუხტვა ვერ შეძლეს, ბურთი ხელზე მოხვდა “ემპოლის” მცველ ლორენსო ტონელის და კარში შეგორდა. არბიტრებმა ვერ შენიშნეს, რომ ტონელიმ ხელით ითამაშა და გოლი ჩაითვალა — 1:1.

“ემპოლის” ქართველი ლეგიონერი ლევან მჭედლიძე მოედანზე 84-ე წუთზე შევიდა და საკმაოდ აქტიურადაც ჩაერთო თამაშში, იბრძოდა ბურთისთვის, რამდენჯერმე შეტევაც გაამწვავა და საჭირო დროს დაცვასაც მიეხმარა.

იტალიის სერია A
“ჯენოა” — “ემპოლი” 1:1 (0:1)
გოლები: ბერტოლაჩი 14′ — ტონელი 77′.

სატურნირო ცხრილის სანახავად გადადით ბმულზე: ცხრილები

განრისხებულმა თერიმმა პიჯაკი გაიხადა და სამწვრთნელო შტაბისკენ მოისროლა

Posted on by ბექა დოგრაშვილი

ევროპის 2016 წლის ჩემპიონატის საკვალიფიკაცო ეტაპზე ლატვიისა და თურქეთის ნაკრებებს შორის გამართული შეხვედრა ფრედ, ანგარიშით 1:1 დასრულდა. მატჩის მიმდინარეობის დროს თურქთა მთავარი მწვრთნელი ფათიჰ თერიმი იმდენად განრისხდა, რომ პიჯაკი გაიხადა და სამწვრთნელო შტაბისკენ მოისროლა.

ულამაზესი გოლი, რომლის შექმნაში ორივე გუნდის ფეხბურთელებმა მიიღეს მონაწილეობა

Posted on by ბექა დოგრაშვილი

ტაილანდისა და ჩინეთის 23 წლამდე ნაკრებებს შორს გამართულ მატჩში (2:0) ორივე გუნდის ფეხბურთელების მიერ შექმნლი ლამაზი კომბინაცია ეფექტური გოლით დაგვირგვინდა.

დიახ, გოლის ეპიზოდში ორივე ნაკრებს მოთამაშეებმა მიიღეს მონაწილეობა: ერთ-ერთი შეტევის დროს ტაილანდელმა ფეხბურთელმა მეტოქის საჯარიმოში ბურთი ქუსლით დააბრუნა, შემდეგ ჩინელმა მცველმა უხეიროდ ითამაშა და ასევე ქუსლით ბურთი კიდევ უფრო მიაახლოვა საკუთარ საჯარიმოს, საბოლოო ჯამში კი – ტაილანდელმა თავდამსხმელმა ადისაკ კრაისორნმა აკრობატულ ნახტომში ლამაზი გოლი გაიტანა.

გთავაზობთ ამ გოლის ამსახველ ვდეომასალას.

შორტზე 19, მაისურზე 20 ნომერი

Posted on by ბექა დოგრაშვილი

საქართველოს უმაღლესი ლიგის V ტურში “ზესტაფონისა” “სამტრედიას” შორის გამართული მატჩის მიმდინარეობისას უჩვეულო რამ მოხდა. სტუმართა გუნდის კაპიტან გიორგი მელქაძეს მაისურზე სათამაშო ნომერი აღარ ეტყობოდა, რის გამოც მას მთავარმა არბიტრმა ფორმის გამოცვლა მოსთხოვა. მელქაძეს 19-ის ნაცვლად 20-ნომრიანი მაისური ჩააცვეს, შორტზე 19 ნომერი ეწერა, მაისურზე კი – 20.

მატჩი “სამტრედიას” გამარჯვებით, ანგარიშით 1:0 დასრულდა.

გთავაზობთ ამ უჩვეულო ფაქტის ამსახველ ვიდეოს.

მათე ვაწაძემ მორიგი გოლი გაიტანა

Posted on by ბექა დოგრაშვილი

დანიის I დივიზიონის მე-8 ტურში ჩემპიონატის ერთპიროვნულ ლიდერ “ვენდსისელსა” და მადევარ “ორჰუსს” შორის გამართულ მატჩში სტუმართა გუნდის ქართველმა ლეგიონერმა მათე ვაწაძემ მორიგი გოლი გაიტანა. ჩვენებურმა შეხვედრის 21-ე წუთზე გახსნა ანგარიში. 72-ე წუთზე კიმ აბეჩმა “ორჰუსის” უპირატესობა ორ ბურთამდე გაზარდა. მატჩის კომპენსირებულ დროში კი, მედს გრევიმ საკუთარ კარში ჩაჭრა ბურთი — 0:3.

აღნიშნულ შეხვედრაში ქართველთაგან მხოლოდ ვაწაძემ ითამაშა, რომელმაც მატჩი სრულად ჩაამთავრა.

მათე ვაწაძისთვის ეს ჩემპიონატში გატანილი მეშვიდე გოლი გახლავთ. ქართველი თავდამსხმელი ბომბარდირთა სიას დამაჯერებლად ლიდერობს.

რაც შეეხება სატურნირო ცხრილს, “ვენდსისელი” 16 ქულით პირველ ადგილზე დარჩა, მადევარ “ორჰუსს” კი 14 ქულა და ერთი მატჩით ნაკლები აქვს ჩატარებული. მესამე ადგილზე “ვიბორგი” გახლავთ, რომელიც ჩემპიონატის მერვე შეხვედრას დღეს, “აკადემისკის” წინააღმდეგ გამართავს.

რონალდინიოს გუნდის წინააღმდეგ სათამაშოდ უცნაური მეთოდით ემზადებიან

Posted on by ბექა დოგრაშვილი

მექსიკურმა “პუებლამ” უჩვეულო ვარჯიში ჩაატრა. გუნდის ფეხბურთელებს საწვრთნელი პროცესის დროს სახეზე ძაღლის ნიღბები ჰქონდათ მორგებული.

“პუებლას” მთავარი მწვრთნელი ხოსე სოლა ამბობს, რომ ამ მეთოდით გუნდს მატჩის მიმდინარეობისას უფრო აქტიური მუშაობისკენ მოუწოდებს.

“როდესაც ბურთის ართმევაზე თამაშობთ, საკუთარი თავი ძაღლებად უნდა წარმოიდგინოთ: ბურთისთვის უნდა იბრძოლო, მოიპოვო და გაუფრთხილდე მას”, – ციტირებს სოლას სიტყვებს Metro.

“პუებლა” დამდეგ შეხვედრას “კერეტაროს” წინააღმდეგ ჩაატარებს, რომელსაც რამდენიმე დღის წინათ სახელგანთქმული ბრაზილიელი ფეხბურთელი რონალდინიო შეუერთდა. მატჩი 13 სექტემბერს გაიმართება.

ბალოტელი მორიგ სკანდალში

Posted on by ბექა დოგრაშვილი

“ლივერპულის” თავდამსხმელი მარიო ბალოტელი მორიგ სკანდალში გაეხვა.

“ვულვერჰემპტონის” წინააღმდეგ დახურულ მოედანზე გამართულ ამხანაგურ მატჩში (1:0) იტალიელი მოთამაშე მთავარ მსაჯ კრის ფოის დაუპირისპირდა.

ბალოტელი არბიტრთან მის წინააღმდეგ მეტოქე გუნდის ფეხბურთელის უხეშ თამაშს აპროტესტებდა, რასაც მსაჯმა ყურადღება არ მიაქცია. როგორც თვითმხილველები აცხადებენ, “ლივერპულის” ახალწვეულმა მოწინააღმდეგეს თავშიც წამოარტყა. სერიოზული კონფლიქტის თავიდან არიდების მიზნით იტალიელი ფორვარდი პირველივე ტაიმში შეცვალეს.

რონალდუმ გაიტანა, მაგრამ “რეალმა” წააგო

Posted on by ბექა დოგრაშვილი

ფლორენციის “ფიორენტინასა” და მადრიდის “რეალს” შორის პოლონეთის დედაქალაქ ვარშავაში გამართული ამხანაგური მატჩი იტალიური გუნდის გამარჯვებით, ანგარიშით 2:1 დასრულდა.

ანგარიში კრიშტიანუ რონალდუმ მე-4 წუთზე გახსნა. 27-ე წუთზე მარიო გომესმა გაათანაბრა, 69-ე წუთზე კი მარკოს ალონსომ “რეალის” კარში მეორე ბურთი გაიტანა და საბოლოო შედეგი 2:1 დაფიქსირდა.

ამხანაგური მატჩი
“ფიორენტინა” — “რეალი” 2:1 (1:1)

“ფიორენტინა“: ნეტო, როდრიგესი (ჰეგაზი 86′), ტომოვიჩი (პიჩინი 85′), სავიჩი, მარკოს ალონსო (პასკუალი 85′), პიზარო (ვოლსკი 77′), აკვილანი (ბრილანტე 69′), ბორხა ვალერო (ჯილი 90′), ვარგასი (ლაძარი 85′), გომესი (ილიჩიჩი 68′), ბაბაკარი (ბერნარდეში 77′).
მთავარი მწვრთნელი: ვინჩენცო მონტელა.

“რეალი“: ნავასი, არბელოა (ლუკას ვასკესი 76′), მარსელო (ფაბიო კოენტრაუ 46′), ნაჩო, ვარანი (სერხიო რამოსი 74′), ჩაბი ალონსო (კროოსი 46′), ხედირა (მედრანი 75′), ილიარამენდი (ბურგუი 75′), დი მარია, ხამეს როდრიგესი (კარვახალი 46′), რონალდუ (ბენზემა 46′).
მთავარი მწვრთნელი: კარლო ანჩელოტი.

გოლები: გომესი 27′, მარკოს ალონსო 69′ — რონალდუ 4′.

ლიბერტადორესის თასი “სან ლორენსომ” მოიგო

Posted on by ბექა დოგრაშვილი

ლიბერტადორესის თასის ფინალის განმეორებით მატჩში არგენტინულმა “სან ლორენსომ” პარაგვაული “ნასიონალი” დაამარცხა. პირველი შეხვედრა ფრედ, ანგარიშით 1:1 დასრულდა, განმეორებით მატჩში კი არგენტინელებმა 1:0 იმარჯვეს. ერთადერთი გოლი 36-ე წუთზე თერთმეტმეტრიანი დარტყმით ნესტორ ორტიგოსამ გაიტანა.

ამრიგად, ორი მატჩის ჯამში “წმინდანებმა” 2:1 გაიმარჯვეს და არსებობის ისტორიაში პირველად სამხრეთ ამერიკის საუკეთესო კლუბის სტატუსი მოიპოვეს.

“სან ლორენსო” (არგენტინა) — “ნასიონალი” (პარაგვაი) 1:0 (1:0)
გოლი: ორტიგოსა 35′ (პენ).

პირველი მატჩი: 1:1

 

სად ხურდებოდა მარიო გიოტცე “ბორუსიასთან” მატჩში

Posted on by ბექა დოგრაშვილი

მიუნხენის “ბაიერნის” ნახევარმცველი მარიო გიოტცე გერმანიის სუპერთასზე დორტმუნდის “ბორუსიას” წინააღმდეგ გამართული მატჩის (0:2) მიმდინარეობისას ტრიბუნქვეშა გვირაბში ხურდებოდა, რათა ყოფილი გუნდის ქომაგების მხრიდან ზედმეტი ყურადღება არ მიეპყრო.

გთავაზობთ ფაქტის ამსახველ ვიდეომასალას.

მარადონამ ჟურნალისტს სახეში ხელი გაარტყა (ვიდეო)

Posted on by ბექა დოგრაშვილი

არგენტინის ნაკრების ყოფილმა თავდამსხმელმა და მთავარმა მწვრთნელმა დიეგო არმანდო მარადონამ ჟურნალისტს სახეში ხელი გაარტყა.

ინციდენტი მაშინ მოხდა, როდესაც მარადონა შვილ დიეგო ფერნანდოსთან და ბავშვის დედა ვერონიკა ოხედასთან ერთად თეატრში მიდიოდა.

მარადონას ავტომობილის გარშემო ჟურნალისტების მთელმა ჯგუფმა მოიყარა თავი, თუმცა ლეგენდარულმა არგენტინელმა ფეხბურთელმა ინტერვიუს მიცემა არ ისურვა. მედიის წარმომადგენლები მარადონას არ მოეშვნენ, რის შემდეგაც დიეგო მანქანიდან გადმოვიდა და ერთ-ერთ კორესპონდენტს სახეში ხელი გაარტყა.