ჭდე: Vincenzo Montella

უეფას ევროპის ლიგის ჯგუფური ეტაპის მე-4 ტურში ათენის აეკ-სა და “მილანს” შორის გამართული მატჩის (0:0) შემდეგ “როსონერის” მთავარ მწვრთნელ ვინჩენცო მონტელასა და გუნდის ფანს შორის მცირე ინციდენტი მოხდა.

გულშემატკივარმა “მილანის” თავკაცთან გუნდის ბოლოდროინდელ შედეგებზე დაიჩივლა. მან აღნიშნა, რომ “როსონერი” მოსაწყენ ფეხბურთს უჩვენებს, რაზეც მონტელამ უკმეხად უპასუხა.

“თუ მოსაწყენ ფეხბურთს ვუჩვენებთ, სტადიონზე აღარ მოხვიდეთ. ცუდად ვთამაშობთ? ჯგუფში პირველ ადგილზე ვართ, მეტი რა გავაკეთოთ?!”, – ასე ციტირებს “ლა რეპუბლიკა” მონტელას სიტყვებს.

“მილანი” ევროპის ლიგის D ჯგუფს ლიდერობს, იტალიის სერია A-ს სატურნირო ცხრილში კი მერვე პოზიცია უკავია და ლიდერს 15 ქულით ჩამორჩება.

“მილანმა” გუნდის მთავარ მწვრთნელ ვინჩენცო მონტელასთან კონტრაქტი გაახანგრძლივა. ახალი შრომითი ხელშეკრულება ძალაში 2019 წლის 30 ივნისამდე იქნება.

“როსონერიმ” მონტელას თავკაცობით იტალიის სერია А-ს გათამაშება მეექვსე პოზიციაზე დაასრულა და ევროპის ლიგაზე თამაშის უფლება მოიპოვა.

თავად მონტელამ 2016-2017 წლების სეზონში გუნდის შედეგი დადებითად შეაფასა.

“მილანის” მთავარმა მწვრთნელმა ვინჩენცო მონტელამ იტალიის სერია A-ს 26-ე ტურში “სასუოლოსთან” გამართული შეხვედრა შეაჯამა, რომელიც მისმა გუნდმა კარლოს ბაკას მიერ გატანილი პენალტის წყალობით გამარჯვებით დაასრულა (1:0).

“დღეს მსაჯმა ბევრი საკამათო გადაწყვეტილება მიიღო, მათ შორის ჩვენ სასარგებლოდაც. მე ამას იმიტომ ვამბობ, რომ ყველაფერი ჩვენ საწინააღმდეგოდ ვერ იქნება.

თამაშით კმაყოფილი არ ვარ, რადგან რთული და დაძაბული შეხვედრა გამოვიდა. მეტოქის მარცხზე ვწუხვარ, ვინაიდან “სასუოლოსთან” ოქტომბერში გამართულ მატჩშიც რაღაც მსგავსი მოხდა, მაგრამ მსაჯები ჩვენ სასარგებლოდ ერთეულ შეხვედრებში ცდებიან”, – ციტირებს მონტელას სიტყვებს “სქაი იტალია”.

შეგახსენებთ, რომ აღნიშნულ მატჩში კარლოს ბაკას პენალტის შესრულების მომენტში ფეხი დაუცდა და ბურთს ორჯერ შეეხო, რაც წესის დარღვევაა, მაგრამ მთავარმა არბიტრმა გოლი ჩათვალა.

იტალიის სერია A-ს მე-13 ტურის ცენტრალური მატჩი “ჯუზეპე მეაცაზე” გაიმართა, სადაც შეხვედრის ნომინალურმა მასპინძელმა “მილანმა” თანაქალაქელი “ინტერი” მიიღო. მატჩი ფრედ, ანგარიშით 2:2 დასრულდა. კომპენსირებულ დროში განიავებული გამარჯვების მიუხედავად, შეხვედრის შემდეგ “როსონერის” მთავარი მწვრთნელი ვინჩენცო მონტელა ოპტიმისტურ განწყობაზე იყო.

“სილვიო ბერლუსკონი მატჩის საბოლოო ანგარიშით ცოტა იმედგაცრუებული იყო, მაგრამ გუნდი ქებას იმსახურებს. ბიჭები მეც შემეცოდნენ, მაგრამ დიდებული თამაში და სულისკვეთება ვაჩვენეთ და ახლა ტკბილად დაძინების უფლებაც გვაქვს.

“ინტერმა” გოლი 95-ე წუთზე გაგვიტანა. თითქმის იდეალური საღამო გამოვიდა. ვცდილობ, რომ ჭიქა ნახევრად სავსე მდგომარეობაში წარმოვიდგინო.

მეორე ტაიმი კარგად დავიწყეთ და თამაში წავიყვანეთ, მაგრამ “ინტერმა” ორი შემთხვევითი მომენტი გამოიყენა. შესაძლოა, მეტოქე მარცხს არ იმსახურებდა, მაგრამ ჩვენი გამარჯვების შემთხვევაში, ვერავინ იტყოდა, რომ მოგება არ დავიმსახურეთ. “ინტერი” 95-ე წუთზე მოპოვებულ საყაიმო შედეგს გამარჯვებასავით აღნიშნავდა და ეს ჩვენ სიამაყის საბაბს გვაძლევს”, – ციტირებს მონტელას სიტყვებს Football Italia.

“მილანი” გუნდის მთავარი მწვრთნელის პოსტზე “ფიორენტინას” თავკაცის, ვინჩენცო მონტელას კანდიდატურით დაინტერესდა.

“ლა რეპუბლიკას” ცნობით, “როსონერის” ხელმძღვანელობა უკვე აქტიურად განიხილავს მონტელას კანდიდატურას, რომელმაც შესაძლოა, ზაფხულში ფილიპო ინძაგი ჩაანაცვლოს.

წყაროს თანახმად, “მილანი” მზად არის, ახალგაზრდა იტალიელ სპეციალისტს ხელფასის სახით წელიწადში ორი მილიონი ევრო შესთავაზოს.

რა გადაწყვეტილებას მიიღებს თავად მონტელა, ჯერჯერობით უცნობია. “ფიორენტინას” ხელმძღვანელობამ არაერთხელ აღნიშნა, რომ ამჟამინდელი თავკაცის შენარჩუნება სურს.