თბილისის “საბურთალომ” თურქულ შეკრებაზე მეოთხე შეხვედრაც ფრედ ითამაშა
დედაქალაქურმა “საბურთალომ” თურქეთში, სადაც მეორე შეკრებაზე იმყოფება, მორიგი ამხანაგური მატჩი პოლონეთის პირველი ლიგის მესამე ადგილოსან “ვრაკუვთან” გამართა და მატჩი ფრედ, 1:1 დასრულდა. პირველი ნახევარი გატანილი გოლების გარეშე მორჩა, თუმცა დაწინაურება ორივე გუნდს შეეძლო.
მეორე ტაიმის საწყის წუთებში პოლონელებმა გაიტანეს. 72-ე წუთზე კი ანგარიში შეტევაში ჩართულმა ნიკოლოზ მალიმ გაათანაბრა, რომელმაც გეგა დიასამიძისგან გენიალური გადაცემა მიიღო და ახლო მანძილიდან მეკარეს აუღებელი დაურტყა. “საბურთალოელებს” მეორე ნახევარში გოლის გატანის რამდენიმე შესაძლებლობა ჰქონდათ. ერთ-ერთ ეპიზოდში ხარაიშვილის დარტყმულს მცველები გადაეღობნენ, ბოლო წუთებზე კი ნადარაიას ფლანგური ჩაწოდების შემდეგ, თავით გოშთელიანი ურტყამდა, მაგრამ ბურთი ხარიხას მოხვდა.
დღევანდელ შეხვედრაში მთავარმა მწვრთნელმა გიორგი ჭიაბრიშვილმა შემდეგი ფეხბურთელები ათამაშა:
ქურდაძე, იაშვილი, მარგველაშვილი, რეხვიაშვილი, ჩაბრაძე, მამუჩაშვილი, გვარაძე, ალთუნაშვილი, ვოლკოვი, ვაგნერი, ტატანაშვილი.
მეორე ტაიმი:
კუპატაძე, მალი, ცნობილაძე, გრიგალაშვილი, ნადარაია, თარხნიშვილი, ელვინ ტერა, ხარაიშვილი, დიასამიძე, გორგიაშვილი, გოშთელიანი.
