The Independent: “ბორუსია” მხითარიანს “ლივერპულში” უშვებს

სომეხი შემტევი ნახევარმცველი ნისლიან ალბიონზე გადაბარგებასთან ახლოსაა.

როგორც ბრიტანული გაზეთი The Independent იტყობინება, დორტმუნდის “ბორუსიას” ხელმძღვანელობამ “ლივერპულისგან” ჰენრიხ მხითარიანის ტრანსფერის თაობაზე ოფიციალური, 15 მილიონ გირვანქიანი შეთავაზება მიიღო, რასაც დაეთანხმა.

ახლა კი ტრანსფერის განხორციელება დამოკიდებულია იმაზე, თუ როგორ პირად კონტრაქტს შესთავაზებს მერსესაიდული კლუბის ხელმძღვანელობა სომხეთის ეროვნული ნაკრების მოთამაშეს.

მოგეხსენებათ, გასულ ზამთარს მხითარიანის აგენტმა განაცხადა, რომ მის კლიენტს ახალი სეზონის დაწყებამდე სიტუაციის შეცვლის სურვილი აქვს. სულ მალე, შეიძლება, ეს მართლაც მოხდეს.

წყაროს თანახმად, მხითარიანის შეძენით ტურინის “იუვენტუსი” კვლავ არის დაინტერესებული, მაგრამ როგორც ჩანს, იტალიის მოქმედმა ჩემპიონებმა ეს ბრძოლა წააგეს.