თემურ ქეცბაია „ანორთოსისის“ მატჩს დაესწრო

საქართველოს ეროვნული ნაკრების მთავარი მწვრთნელი თემურ ქეცბაია კვიპროსში ყოფილი გუნდის – ფამაგუსტას „ანორთოსისის“ მატჩს დაესწრო.

კვიპროსული მედიის ცნობით, ქეცბაიამ 10 ევროდ ღირებული ჩვეულებრივი ბილეთი იყიდა და შეხვედრას კლუბის ქომაგებთან ერთად მიადევნა თვალყური. მას გვერდს ქალიშვილი და მეუღლე უმშვენედნენ.

„ერმისსა“ და „ანორთოსის“ შორის გამართული მატჩი უგოლოდ დასრულდა. შეხვედრაში მონაწილეობა ორმა ქართველმა ფეხბურთელმაც მიიღო: „ერმისის“ რიგებიდან მატჩი სრულად ჩაატარა 36 წლის ნახევარმცველმა ლევან მაღრაძემ. „ანორთოსისის“ მხრიდან 66-ე წუთამდე ითამაშა შოთა გრიგალაშვილმა.

ბექა დოგრაშვილი