ცნობილია რამდენი გადაუხადეს კლუბებმა კოუტინიოსა და აზარს ლაზარეთში ყოფნისას
გავლენიანი ესპანური გამოცემა Marca ძალიან საინტერესო ინფორმაციას გვთავაზობს გასულ სეზონში ტრავმირებული ფეხბურთელებისთვის გადახდილი ხელფასების შესახებ.
როგორც ცნობილი ხდება, ედენ აზარი მადრიდულ გრანდში კვირაში ხელფასის სახით 475 ათას ევროს იღებს. ტრავმის გამო მან მიმდინარე სეზონში 252 დღე გაატარა ლაზარეთში, რაც იმას ნიშნავს, რომ “ბლანკოსის” ბიუჯეტიდან 17 მილიონი ევრო ბელგიელი ვარსკვლავის ანგარიშზე გადაირიცხა მაშინ, როდესაც მას მოედანზე გასვლაც არ შეეძლო.
რეიტინგში მეორე პოზიციას “ბარსელონას” შემტევი ფილიპე კოუტინიო იკავებს. ბრაზილიელი კვირაში 474 ათას ევროს გამოიმუშავებს. ამ უკანასკნელმა ტრავმიანობის გამო 233 დღე გამოტოვა და ამ პერიოდში 16 მილიონი იშოვა.
რეიტინგში მესამე პოზიციას “პარი სენ-ჟერმენის” სუპერვარსკვლავი ნეიმარ ჟუნიორი იკავებს. ის კვირაში დაახლოებით მილიონ ევროს გამოიმუშავებს და ბოლო სეზონში 95 დღე გაუცდა. შესაბამისად ლაზარეთში ყოფნისას მან 13.6 მილიონი ევრო მიიღო.
