ცქიტიშვილის ფანტასტიკური შედეგი: 50 წუთი, 52 ქულა და 22 მოხსნა 138:130 მოგებულ მატჩში
ნიკოლოზ ცქიტიშვილის ფანტასტიკური შედეგი ლიბანის ჩემპიონატში. „ჩემპვილის“ ქართველმა ფორვარდმა, რომელმაც 1 თვის წინ 41 ქულა დააგროვა, ეს შედეგი მთელი 11 ქულით გააუმჯობესა. მისი გუნდი ლიბანის ჩემპიონატის მე-8 ტურის გამოტოვებულ მატჩში გათამაშების ლიდერ „საგესს“ შეხვდა და 2-ოვერტაიმიად, უდაძაბულეს მატჩში 138:130 დაამარცხა. ჩემპვილელთა ქართველმა ლეგიონერმა შეუცვლელად – 50 წუთი ითამაშა და 52 ქულა, 22 მოხსნა, 3 პასი, 3 ჩაჭრა და 1 დაფარება მიითვალა.
ცქიტიშვილის მარგი ქმედების კოეფიციენტიც ფანტასტიკური იყო და 73 ერთეული შეადგინა. ესეთი შედეგი არათუ მიმდინარე სეზონში, წლებია, ლიბანის ჩემპიონატში არ დაფიქსირებულა. 52 ქულა ცქიტიშვილმა შემდეგნაირად მოაგროვა: 19-დან 18 ორქულიანი(!), 10-დან 4 სამიანი და 7-დან 4 საჯარიმო ჩააგდო.
ცქიტიშვილზე მეტი – 74 ქულა ჩააგდო „საგესის“ ამერიკელმა ლეგიონერმა ტერელ სტოგლინმა, თუმცა მარგი ქმედების კოეფიციენტით ქართველს ვერ აჯობა. სტოგლინის გამაერთიანებელმა შედეგმა 67 ერთეული შეადგინა, რადგან მას სხვა სტატისტიკური მაჩვენებლები არ ჰქონდა ცქიტიშვილის დარად ბევრი და ჩაგდებული სროლებიც პროცენტულობაც გაცილებით დაბალი ჰქონდა.
4 მოგებით და ამდენივე მარცხით „ჩემპვილი“ მე-4 ადგილზე ავიდა, ხოლო „საგესი“ 7 მოგებითა და 2 წაგებით მეორე ადგილზე დაქვეითდა. ცქიტიშვილის გუნდი მორიგ მატჩს 7 თებერვალს, სტუმრად „ჰომენემთან“ გამართავს.
gbf.ge
