U17 – მეხუთე ადგილი მინსკში და საუკეთესო მეკარის პრიზი
საქართველოს 17-წლამდე ნაკრებმა მინსკის საერთაშორისო ტურნირი – „Development Cup“ – ი მეხუთე ადგილზე დაასრულა. ნაკრების გოლკიპერი –ოთო გოშაძე კი, ტურნირის საუკეთესო მეკარედ დასახელდა.
მეხუთე ადგილისთვის მატჩამდე, 25 იანვარს ნოდარ აკობიას გუნდი ჯერ ფინეთის ნაკრებს შეხვდა და ბექა მიქელთაძისა და გიორგი კიკნაძის გოლებით მეტოქე 2:0 დაამარცხა. 26 იანვარს კი, კიდევ ერთხელ ითამაშა ირანის ნაკრებთან და გურამ გოშთელიანის გოლის წყალობით 1:0 მოიგო. ტურნირის გამარჯვებული რუსეთის 17-წლამდე ნაკრები გახდა, რომელმაც ფინალში მასპინძელ ბელორუსებს დიდი ანგარიშით – 6:1 სძლია. მესამე ადგილზე უკრაინის ნაკრები გავიდა.
საბოლოო ჯამში, თუ არ ჩავთვლით ლიტვასთან წაგებულ პენალტების სერიას, საქართველოს ნაკრებმა მეტოქეთა კარში 16 ბურთი გაიტანა და სათამაშო სიტუაციაში არც ერთი არ გაუშვია. ოთო გოშაძის დამაჯერებელმა თამაშმა კი, ლოგიკური აღიარება მოიპოვა. გასულ წელს, როცა ტურნირში გიორგი დევდარიანის 1996 წელს დაბადებულთა ნაკრები მონაწილეობდა, ტურნირის საუკეთესო ფორვარდი ლუკა ზარანდია გახდა.
საქართველოს 17-წლამდე ნაკრები თბილისში დღეს საღამოს დაბრუნდება. ელიტრაუნდისთვის მზადებას გუნდი სამშობლოში გააგრძელებს. თებერვალში, თბილისში ყაზახეთის ასაკობრივი ნაკრები ჩამოვა, რომელთანაც ორი სპარინგ-მატჩია დაგეგმილი. მარტში 17-წლამდე ნაკრები ელიტრაუნდისწინა დასკვნით შეკრებაზე თურქეთში გაემგზავრება.
სფფ-ის პრესსამსახური
