უეფა იმსჯელებს, სად და როგორ ჩატარდება ევრო-2020
უეფა უახლოეს პერიოდში მიიღებს გადაწყვეტილებას, სად და როგორი ფორმატით ჩატარდება ევროპის ჩემპიონატი. ამის შესახებ მიუნხენის “ბაიერნის” დირექტორთა საბჭოს თავმდჯომარემ კარლ-ჰაინც რუმენიგემ განაცხადა.
“არ უნდა დაგვავიწყდეს, რომ ტურნირის ამ ფორმატით ჩატარების იდეა მაშინ გაჩნდა, როდესაც კორონავირუსის შესახებ არავინ არაფერი იცოდა. ამ ინიციატივის საფუძველი ის იყო, რომ ჩემპიონატს მთელი ევროპა მოეცვა. ვიცი, უეფას პრეზიდენტი ალექსანდერ ჩეფერინი კორონავირუსული პანდემიის მიმართ დიდ სიფრთხილეს იჩენს და ფიქრობს, რამდენად გონივრული იქნება ტურნირის მხოლოდ ერთ ქვეყანაში ჩატარება, რა თქმა უნდა, შესაბამისი სამედიცინო პროტოკოლების დაცვით.
უახლოეს რამდენიმე კვირაში უეფას გადაწყვეტს, სად და როგორ ჩატარდება ევროპის ჩემპიონატი. რთული საკითხია, მაგრამ ვიცი, რომ ჩეფერინი დიდი სიფრთხილითა და განსჯით სწორ გადაწყვეტილებას მიიღებს”, – ციტირებს რუმენიგეს სიტყვებს Munchner Merkur-ი.
ტურნირი ევრო-2020-ის სახელწოდებას ინარჩუნებს და ის დღევანდელი განრიგით, 11 ივნისიდან 11 ივლისამდე, ევროპის 12 ქალაქში უნდა ჩატარდეს.
