უმაღლესი ლიგის მეშვიდე ტურის შედეგები
დღეს გაიმართა საქართველოს XXV ეროვნული საფეხბურთო ჩემპიონატის მეშვიდე ტურის შეხვედრები.
დრამატული მატჩი გამოვიდა ბოლნისში, სადაც ადგილობრივმა “სიონმა” საჩხერის “ჩიხურა” მიიღო. ანგარიში სტუმართა ფორვარდმა დიმიტრი ტატანაშვილმა 46-ე წუთზე გახსნა. ირაკლი სამხარაძემ 47-ე წუთზე გაათანაბრა, 84-ე წუთზე კი აკაკი მიკუჩაძემ “სიონი” სულაც წინ გაიყვანა. თითქოს მატჩი ბოლნისელთა გამარჯვებით უნდა დასრულებულიყო, თუმცა შეხვედრის ბოლო წუთზე ლაშა ჭელიძემ გადამწყვეტი გოლი გაიტანა და “ჩიხურას” ქულა მოუტანა.
რუსთავის “მეტალურგსა” და “ზუგდიდს” შორის გამართული მატჩის ბედი 75-ე წუთზე გატანილმა ერთადერთმა გოლმა გადაწყვიტა. გოგი ფიფიას შედეგიანი დარტყმის შედეგად, “მეტალურგმა” აქტივში 3 ქულა ჩაიწერა.
შიდა ქართლის დერბი შედგა გორში, სადაც “დილამ” ცხინვალის “სპარტაკს” უმასპინძლა და მეტოქე 3:1 დაამარცხა. ანგარიში მიხეილ გორელიშვილმა შეხვედრის 45-ე წუთზე გახსნა, 57-ე წუთზე ირაკლი მოდებაძემ გორელთა უპირატესობა გაზარდა, მანვე 63-ე წუთზე დუბლი გაიფორმა. 87-ე წუთზე პრესტიჟის გოლი უჩა ბურჯანაძემ გაიტანა.
“ზესტაფონსა” და ლანჩხუთის “გურიას” შორის გამართულ მატჩში ერთი გოლი გავიდა. თითქოს შეხვედრა უგოლოდ უნდა დასრულებულიყო, თუმცა მასპინძელთა თავდამსხმელმა ირაკლი ქობალიამ 87-ე წუთზე მაინც შეძლო გატანა და იმერლებმაც საჭირო 3 ქულა მოიპოვეს.
“დინამო არენაზე” “დინამო თბილისმა” მარტვილის “მერანი” მიიღო. ბევრისთვის მოულოდნელად მატჩში ანგარიში სტუმრებმა გახსნეს. მე-3 წუთზე ეფექტური დარტყმით გიორგი ლორიას კარის ბადე ბექა ციკოლიამ შეარხია. მე-18 წუთზე დავით კვირკველიამ გაათანაბრა, 51-ე წუთზე კი მანვე დუბლი შეასრულა და თბილისური გუნდი წინ გაიყვანა. ზუსტად ორ წუთში “დინამომ” უპირატესობა გაზარდა, თავი ირაკლი ძარიამ გამოიჩინა. “მერანი” რთულ სიტუაციაში აღმოჩნდა, თუმცა სტუმრებმა ერთი ბურთი მალევე გაქვითეს და ინტრიგა დააბრუნეს: 62-ე წუთზე აკაკი შულიამ ანგარიში 3:2 გახადა. 82-ე წუთზე შეცვლაზე შემოსულმა პატრიკ ვუომ მატჩის საბოლოო წერტილი დააფიქსირა – 4:2. აღსანიშნავია, რომ მატჩს ლატვიელ მსაჯთა ბრიგადა მოემსახურა.
უმაღლესი ლიგის მეშვიდე ტური ორშაბათს დასრულდება: სვალ, 17:00 საათზე ქუთაისის “ტორპედოსა” და “ვიტ ჯორჯიას” შორის მატჩი აიღებს სტარტს.
სატურნირო ცხრილის ხილვა ჩვენი პორტალის საქართველოს განყოფილების გვერდზე შეგიძლიათ.
ბექა დოგრაშვილი
