ვან ბასტენი თამაშგარის წესის გაუქმების ინიციატივით გამოდის

მარკო ვან ბასტენმა პრესის წარმომადგენლებთან საუბრისას თამაშგარის წესის გაუქმების იდეა წამოაყენა. ნიდერლანდელი ლეგენდა მიიჩნევს, რომ ფეხბურთმა ჰოკეისგან უნდა აიღოს მაგალითი.

“ძალიან მაღიზიანებს თამაშგარე მდგომარეობის წესი, ნამდვილად ცუდი რამ არის. მინდა იმის დამტკიცების შანსი მაინც გვქონდეს, რომ ფეხბურთის თამაში თამაშგარის წესის გარეშეც შეიძლება. მეტიც, ვთვლი, რომ ფეხბურთი ამ წესის გარეშე უკეთსი იქნება.

ფეხბურთი ფანტასტიკური თამაშია, მაგრამ მაინც მგონია, რომ ძალიან ბევრი რამ არის გასაუმჯობესებელი. შესაძლოა, სპორტის ეს სახეობა უფრო საინტერესო და სასიამოვნო სანახავი გახდეს. ამაზე უნდა ვიმუშავოთ.

თუ დააკვირდებით, შეამჩნევთ, როგორ იხარჯება დრო ტყუილად. რამე უნდა შევცვალოთ. ხალხს აქტიურობის ხილვა სურს,” – განაცხადა ვან ბასტენმა.