ვან გაალი: “მოურინიო განსაკუთრებულია”
ინგლისის პრემიერლიგის IX ტურის ცენტალური მატჩი “ოლდ ტრაფორდზე” გაიმართება, სადაც “მანჩესტერ იუნაიტედი” გათამაშების ერთპიროვნულ ლიდერ ლონდონის “ჩელსის” მიიღებს.
“წითელი ეშმაკების” მთავარი მწვრთნელ ლუი ვან გაალი მოუთმენლად ელოდება “ჩელსის” თავკაც ჟოზე მოურინიოსთან შეხვედრას.
პორტუგალიელმა სპეციალისტმა თავისი პირველი სამწვრთნელო ნაბიჯები ვან გაალის თანაშემწედ მუშაობის პერიოდში გადადგა. სწორედ ჰოლანდიელმა სპეციალისტმა შენიშნა მანამდე ყველასთვის უცნობი მოურინიო, რომელიც იმხანად “ბარსელონას” თავკაც ბობი რობსონის თარჯიმნად მუშაობდა. რობსონის შემდეგ კატალონიური გუნდი ვან გაალმა ჩაიბარა, რომელმაც თანაშემწის პოზიციაზე პორტუგალიელი აიყვანა.
“მოურინიო ძალზედ მოკრძალებული და ემოციური ადამიანია და მე მომწონს ეს. განა ამაში რამე გასაკვირია?!
გასაკვირი ის გახლავთ, რომ ჟოზე დღესდღეობით მსოფლიოს ერთ-ერთი საუკეთესო მწვრთნელია. ადამიანი წინასწარ ვერ განსაზღვრავს, რა მოხდება მომავალში და ეს იწვევს გაკვირვებას. ხალხს ვერ წარმოუდგენია, რაოდენ მოკრძალებული და ემოციური ადამიანია მოურინიო.
ის ჩემთვის განსაკუთრებულია, რადგან ერთად ვმუშაობდთ და ურთიერთობას დღემდე ვინარჩუნებთ. ასეთ რამ ფეხბურთში ხშირად არ ხდება”, – ციტირებს ვან გაალის სიტყვებს “ექსპრესი”.
ცნობისათვის, მატჩი “მანჩესტერ იუნაიტედსა” და “ჩელსის” შორის კვირას, თბილისის დროით 20:00 საათზე დაიწყება.
