ვენგერი: “რონალდუ “არსენალში” უნდა გადმოსულიყო”

ლონდონის “არსენალის” ლეგენდა, არსენ ვენგერი, კრიშტიანუ რონალდუს “მანჩესტერ იუნაიტედში” დაბრუნებას გამოეხმაურა. ფრანგი სპეციალისტის თქმით ის რონალდუს ტრანსფერთან ახლოს იყო.

“ამ შემთხვევაში ემოციურმა მიზეზებმაც დიდი როლი ითამაშეს. არ ვთვლი, რომ ეს გადაწყვეტილება 100 პროცენტით რაციონალურია. გუნდში ბალანსის პოვნა დიდი პრობლემაა.

ვფიქრობ, ტრანსფერის განხორციელებაში ალექს ფერგიუსონმა დიდი როლი ითამაშა. რონალდუ თავის დროზე “არსენალში” უნდა გადმოსულიყო. ფერგიუსონმა კი ის წამართვა. ახლა კი იგივე გაუკეთა “მანჩესტერ სიტის”.

რონალდუ ჩვენ სავარჯიშო ბაზაზე იყო, “არსენალის” მაისურიც ეცვა. მაგრამ სერ ალექსის ასისტენტმა ის ტრანსფერში დაარწმუნა. ჩვენ ოთხ მილიონს ვიხდიდით, მათ კი 12 გადაიხადეს,” – განაცხადა ვენგერმა.