ვენგერმა მოურინიოს უპასუხა: “მასთან ერთად თავს საბავშვო ბაღში ვგრძნობ”

ლონდონის “არსენალის” ყოფილმა მენეჯერმა არსენ ვენგერმა “ტოტენჰემ ჰოთსპურის” მთავარ მწვრთნელ ჟოზე მოურინიოს უპასუხა. შეგახსენებთ, რომ პორტუგალიელმა სპეციალისტმა ვენგერის ავტობიოგრაფიული წიგნი გააკრიტიკა. გამოცემაში მოურინიო არც ერთხელ არ არის ნახსენები, რაც პორტუგალიელმა იმით ახსნა, რომ ვენგერს მისთვის არასდროს მოუგია.

“არ მადარდებს, რას ამბობს მოურინიო. ის მუდმივად პროვოკატორობს. მასთან ერთად თავს საბავშვო ბაღში ვგრძნობ. ასეთი ხასიათი აქვს. ყველაფერთან ერთად, ის არასწორია, ვინაიდან ჩვენ მისი გუნდი ორჯერ დავამარცხეთ და ბევრჯერ ფრედაც ვითამაშეთ.

შენ კი არ იმარჯვებ, შენ მონაწილეობ გამარჯვების მიღწევაში. ვიგებთ “ჩვენ”. მწვრთნელი იმისთვის არის საჭირო, რომ გუნდის შესაძლებლობები მაქსიმალურად გამოიყენოს”, – ციტირებს ვენგერის სიტყვებს Goal-ი.