ვენგერმა ვან პერსიზე საუბარი არ ისურვა

ინგლისის პრემიერლიგის 26-ე ტურის ცენტრალური შეხვედრა „ემირეითსზე“ შედგება, სადაც ლონდონის „არსენალი“ „მანჩესტერ იუნაიტედს“ მიიღებს. მატჩისწინა პრესკონფერენციაზე „მეთოფეთა“ მთავარმა მწვრთნელმა არსენ ვენგერმა კლუბში რობინ ვან პერსის შესაძლო დაბრუნებაზე საუბარი არ ისურვა. შეგახსენებთ, რომ ჰოლანდიელი თავდამსხმელი „არსენალის“ ღირსებას 2004-დან 2012 წლამდე იცავდა.

„არა მგონია, დღევანდელ პრესკონფერენციაზე ვან პერსი განსახილველად საუკეთესო თემა იყოს. ჩემი აზრით, უკეთესი იქნება, თუ სხვა საკითხებზე ვისაუბრებთ“, – ციტირებს ვენგერის სიტყვებს ბრიტანული „მირორი“.

მატჩი „არსენალსა“ და „მანჩესტერ იუნაიტედს“ შორის 12 თებერვალს, თბილისის დროით 23:45 საათზე დაიწყება.

ბექა დოგრაშვილი