ვიდალი: “მე და კლაუდიო ბრავო მეგობრები ვეღარასოდეს ვიქნებით”
“ბარსელონასა” და ჩილეს ნაკრების ნახევარმცველმა, არტურო ვიდალმა განაცხადა, რომ ის და კლაუდიო ბრავო ერთმანეთის მეგობრები ვეღარასოდეს იქნებიან, მაგრამ ერთად ეროვნული ნაკრებისათვის მაქსიმუმს გაიღებენ.
ვიდალსა და ბრავოს შორის ურთიერთობა პირველად 2017 წელს დაიძაბა, როცა ჩილეს ნაკრები ბრაზილიასთან 0:3 დამარცხდა და მსოფლიოს 2018 წლის ჩემპიონატზე ვერ გავიდა. ამ მატჩის შემდეგ, ბრავოს მეუღლემ სოციალურ ქსელში პოსტი გამოაქვეყნა და რამდენიმე ჩილელი მოთამაშე ზედმეტი გართობის გამო გააკრიტიკა.
“ჩემ კოლეგებს პატივს ვცემ. სამწუხაორდ, როცა ტრიუმფია, ყველა მეგობრები ვართ, მაგრამ როცა მარცხია, ერთგულება იკარგება. მე ეს არ მომწონს. მე და კლაუდიო მეგობრები ვეღარასოდეს ვიქნებით, მაგრამ ერთად ეროვნული ნაკრების ღირსებას ვიცავთ. მეც და ისიც გუნდისათვის მაქსიმუმს გავაკეთებთ. ფეხბურთში ყველა ერთმანეთის მეგობარი არ არის”, – ციტირებს ვიდალის სიტყვებს Goal.Com.
