ვილიავერდე: „ჩელსის“ ბარიერის ძლევის და ფინალში გასვლის იმედი გვაქვს“

როგორც მოგეხსენებათ, უეფას ჩემპიონთა ლიგის მიმდინარე გათამაშების ნახევარფინალურ ეტაპზე მადრიდის „ატლეტიკოს“ მეტოქედ ლონდონის „ჩელსი“ ერგო. ესპანურმა გუნდმა ბოლო 40 წელიწადში პირველად გააღწია ევროპის ყველაზე პრესტიჟული საკლუბო ტურნირის ამ სტადიამდე. „ატლეტიკოს“ შანსები კლუბის დირექტორმა კლემენტე ვილიავერდემ შეაფასა.

„ჩელსი“ ძალიან ძლიერი გუნდია. ლონდონელები კარგად თამაშობენ. მძიმე ბრძოლა მოგვიწევს. ფინალში გაღწევა ძალიან რთული იქნება, თუმცა მოხარულნი ვართ იმით, რომ ასეთი ცნობილი კლუბის წინააღმდეგ თამაშის შესაძლებლობა მოგვეცა“, განუცხადა ვილიავერდემ „ევროსპორტს“.

„ვიცით, რომ რთული იქნება, თუმცა „ატლეტიკოს“ „ჩელსისთვის“ მოუგია. ფინალში გასვლის იმედი გვაქვს. ისევე უნდა ვიმუშაოთ, როგორც წინა მატჩებში. გულშემატკივრებისთვის ყველაფერი უნდა გავაკეთოთ“, – დაამატა მადრიდული კლუბის დირექტორმა.

წყვილის პირველი მატჩი 22 აპრილს გაიმართება, განმეორებითი კი – 30 აპრილს.

ბექა დოგრაშვილი