ვინ იყო საუკეთესო ფერგიუსონის შემდეგ?
ალექს სერ ფერგიუსონის დიდებული ეპოქის დასრულების შემდეგ “მანჩესტერ იუნაიტედი” დიდების დარბაზში კუთვნილი ადგილის დაბრუნებას კვლავ ვერ ახერხებს. “ოლდ ტრაფორდი” რამდენიმე დღის წინ კლუბის ლეგენდამ, ოლე გუნარ სულშერმა, არასახარბიელო შედეგების გამო დატოვა.
ESPN-მა ფერგიუსონის შემდეგ “ოლდ ტრაფორდელი” მწვრთნელების მუშაობა შეაფასა და დაადგინა, რომ მათ შორის ყველაზე წარმატებული ჟოზე მოურინიო იყო. პორტუგალიელი სპეციალისტი ამ დროისთვის “რომას” წვრთნის.
მოურინიო “მანჩესტერ იუნაიტედში” 2016 წლის მაისის თვიდან 2018 წლის დეკემბრამდე მუშაობდა. ფერგის წასვლის შემდეგ ყველაზე მეტი ტიტული სწორედ მან მოიგო (ლიგის თასი, ასოციაციის თასი, ევროპა ლიგა). ჩატარებული 144 მატჩიდან მოურინიოს “მანჩესტერმა” 84 მოიგო და 29 დათმო (მოგების პროცენტულობა: 58.33%). მისი მთავარი კოზირი ზლატან იბრაჰიმოვიჩი გახლდათ, 2017-18 წლების სეზონში მან პრემიერ ლიგა მეორე ადგილზე დაასრულა.
რეიტინგში მეორე ადგილზე სულშერი გახლავთ (2018 წლის დეკემბრიდან 2021 წლის ნოემბრამდე). მან ჩატარებული 168 მატჩიდან 92 მოიგო, 41 კი დათმო (54.76% მოგების პროცენტულობა).
მისი საუკეთესო შენაძენი ბრუნო ფერნანდეში და კრიშტიანუ რონალდუ არიან, ყველაზე ცუდი კი – დონი ვან დე ბეეკი. 2020/21 წლების სეზონი პრემიერ ლიგაში მეორე პოზიციაზე დაიკავა, 2018/19 წლების სეზონი – მეექვსეზე.
ლუი ვან გაალი სიაში მესამე ადგილზეა (2014 წლის ივლისიდან 2016 წლის მაისამდე). ნიდერლანდელმა 103 მატჩი ჩაატარა ინგლისურ გრანდში, მოიგო 54 და დამარცხდა 25 თამაშში (52.43%). მან ასოციაციის თასი მოიგო.
ფერგიუსონის წასვლის შემდეგ ყველაზე ცუდი შედეგი დევიდ მოიესს ჰქონდა (2013 წლის ივლისი – 2014 წლის აპრილი). ჩატარებული 51 მატჩიდან მოიესმა 26 მოიგო (50.98%) და 15 წააგო.
