ვინ ითამაშებს დევიდ ბექჰემის ახალდაარსებულ გუნდში?
MLS-ის თითქმის ყველა კლუბში მოიძებნება ერთი-ორი ვარსკვლავი, თუმცა დევიდ ბექჰემის მიერ ახალდაარსებულ “ინტერ მაიამის” რიგებში ასეთი გამორჩეული ფეხბურთელი ჯერ არ არის. გუნდი გათამაშებაში ასპარეზობას მომავალი წლის მარტში დაიწყებს, ჩვენ კი ჩამოგითვლით იმ მოთამაშეებს, რომლებმაც შესაძლოა, “ინტერ მაიამის” შემადგენლობაში ეს ვარსკვლავური პოზიცია დაიკავონ.
ედინსონ კავანი
ასაკი: 32 წლის
ამპლუა: თავდამსხმელი
კლუბი: “პსჟ, საფრანგეთი
სატრანსფერო ღირებულება: 40 მლნ ევრო (transfermarkt)
ერთი თვის წინ ურუგვაელმა ფორვარდმა თქვა, რომ “პარი სენ-ჟერმენთან” კონტრაქტს არ გაახანგრძლივებს და ზაფხულში პარიზულ გუნდს დატოვებს. თებერვალში მას 33 წელი შეუსრულდება და ზამთარში ფრანგები მას შესაძლოა, რამდენიმე მილიონი ევროს სანაცვლოდ შეელიონ.
დავიდ სილვა
ასაკი: 33 წლის
ამპლუა: შემტევი ნახევარმცველი
კლუბი: “მანჩესტერ სიტი”, ინგლისი
სატრანსფერო ღირებულება: 20 მლნ ევრო
მიმდინარე სეზონის დასაწყისში დავიდ სილვამ განაცხადა, რომ ზაფხულში “მანჩესტერ სიტის” დატოვებს. ესპანელი ფეხბურთელი ზამთარში 34 წლის გახდება და სრულიად შესაძლებელია, რომ მან კარიერის დასკვნითი ეტაპი ოკეანისპირა მაიამიში მოიწყოს.
ლუის სუარესი
ასაკი: 32 წლის
ამპლუა: თავდამსხმელი
კლუბი: “ბარსელონა”, ესპანეთი
სატრანსფერო ღირებულება: 50 მლნ ევრო
ლუის სუარესი “ბარსელონას”ერთ-ერთი ლიდერია, თუმცა კატალონიური გუნდი ნელნელა ემზადება მასთან განშორებისთვის. მხარეებს შორის გაფორმებულ კონტრაქტს ვადა 2021 წლის ზაფხულამდე აქვს, ამ დროს ურუგვაელი ფეხბურთელი უკვე 34 წლის იქნება და შესაძლოა, კარიერის მიწურულს მანაც ამერიკის შეერთებული შტატების ლამაზ ქალაქ მაიამის მიაშუროს.
ლუკა მოდრიჩი
ასაკი: 34 წლის
ამპლუა: ნახევარმცველი
კლუბი: “რეალი”, ესპანეთი
სატრანსფერო ღირებულება: 20 მლნ ევრო
ლუკა მოდრიჩს 2018 წლის მსოფლიოს ჩემპიონატის შემდეგ კარიერული დაღმასვლა აქვს. ის უკვე 34 წლისაა და მადრიდის “რეალში” მის ადგილს ახალგაზრდა ვალვერდე იკავებს. მხარეებს შორის არსებულ კონტრაქტს ძალა ზაფხულში გასდის და “სამეფო კლუბმა” ხორვატი ფეხბურთელი მაიამიში გარკვეული თანხის სანაცვლოდ შესაძლოა, ამ ზამთარშივე გაუშვას.
კრიშტიანუ რონალდუ
ასაკი: 34 წლის
ამპლუა: თავდამსხმელი
კლუბი: “იუვენტუსი”, იტალია
სატრანსფერო ღირებულება: 90 მლნ ევრო
კრიშტიანუ რონალდუ იანვარში 35 წლის გახდება, “იუვენტუსთან” კონტრაქტის ამოწურვის დროს კი მისი ასაკი 37 წელი იქნება.
“აშშ მშვენიერი ქვეყნაა. თუ შემეძლება, რომ შტატებში ფეხბურთი კიდევ უფრო პოპულარული გავხადო, დასახმარებლად მზად ვიქნები. იმედი მაქვს, ერთ მშვენიერ დღეს MLS-ში თამაშს დავიწყებ”, – ნათქვამი აქვს რონალდუს.
ლიონელ მესი
ასაკი: 32 წლის
ამპლუა: თავდამსხმელი
კლუბი: “ბარსელონა”, ესპანეთი
სატრანსფერო ღირებულება: 150 მლნ ევრო
არც მესი გახლავთ პატარა ბიჭი. სხვათა შორის, არგენტინელმა ფეხბურთელმა სპეციალური ვიდეომიმართვის მეშვეობით დევიდ ბექჰემს ახალი კლუბის დაარსება მიულოცა კიდეც, რაც მათ შორის არსებულ თბილ ურთიერთობაზე მიუთითებს.
ანტუან გრიზმანი
ასაკი: 28 წლის
ამპლუა: თავდამსხმელი
კლუბი: “ბარსელონა”, ესპანეთი
სატრანსფერო ღირებულება: 130 მლნ ევრო
მიუხედავად იმისა, რომ ანტუან გრიზმანს ჯერ კარიერის შუა პერიოდი აქვს, ფრანგს აშშ უყვარს და NBA-ს მატჩებს ხშირად ესწრება.
“ამერიკული მენტალიტეტი და შოუ-ბიზნესის იქაური სტილი მომწონს”, – აღნიშნა გრიზმანმა.
