ვირჯილ ვან დაიკი: “დრო მოვიდა, რომ მცველმაც მოიგოს ოქროს ბურთი”
“ლივერპულისა” და ჰოლანდიის საფეხბურთო ნაკრების დაცვის ბურჯი, ვირჯილ ვან დაიკი, მიიჩნევს, რომ დროა ოქროს ბურთი კვლავ მცველს გადაეცეს. ბოლოს მსგავსი რამ 2006 წელს მოხდა, როდესაც აღნიშნული პრიზი ფაბიო კანავაროს გადაეცა.
“PFA წლის საუკეთესო ფეხბურთელის ჯილდოს მოპოვება უდიდესი პატივია ჩემთვის. ეს ყველაზე დიდი რამ არის, რადგანაც პრიზს შენივე კოლეგების შეფასების ხარჯზე იღებ.
ძალიან სასიამოვნოა, თუ ხალხს სურს, რომ ოქროს ბურთი მოვიგო. თუმცა მე რა შემიძლია? ვერაფერს გავაწყობ.
ნამდვილად ვერ უარვყოფ, რომ გასული სეზონი მაღალ დონეზე ჩავატარე. ისღა დამრჩენია კონცენტრირებული ვიყო მომავალ სეზონზე, მწყობრში ჩავდგე და კიდევ უფრო კარგი სეზონი ჩავატარო.
მესმის, რომ ჩვეულებისამებრ ოქროს ბურთს თავდამსხმელებს, “ათიანებს”, გადასცემენ ხოლმე, რადგანაც მათი თამაშისთვის თვალის დევნება უფრო სასიამოვნაო. მაგრამ, ვთვლი, რომ დრო მოვიდა, რომ პრიზი მცველმაც მოიგოს,” – აცხადებს ჰოლანდიელი მცველი.
