ზესტაფონი vs დინამო – მატჩამდე
დინამო თბილისი საქართველოს XXVI ეროვნული ჩემპიონატის მესამე ტურის შეხვედრას ზესტაფონში, ზესტაფონის საფეხბურთო კლუბის წინააღმდეგ გამართავს. 23 აგვისტოს დაპირისპირებას დავით აბაშიძის სახელობის სტადიონი უმასპინძლებს. მატჩი 18:00 საათზე დაიწყება. შეხვედრის პირდაპირ ტელერეპორტაჟს საზოგადოებრივი მაუწყებლის პირველი არხი უზრუნველყოფს.
ჩვენი მეტოქე
ზესტაფონის საფეხბურთო კლუბი 2004 წლის 18 ივნისს შეიქმნა, ამავე წელს საქართველოს XIV ეროვნულ ჩემპიონატში ჩაერთო და მას შემდეგ უმაღლესი ლიგა არ დაუტოვებია. ზესტაფონი საშინაო მატჩებს დავით აბაშიძის სახელობის სტადიონზე მართავს, რომელიც 4 600 მაყურებელს იტევს. კლუბის სიმბოლიკა ძირითადად ლურჯ და თეთრ ფერებშია გადაწყვეტილი. თავისი პირველი ტიტული ზესტაფონმა 2007/2008 წლების სეზონში მოიპოვა – იმერელმა ფეხბურთელებმა ბორის პაიჭაძის სახელობის დინამო არენაზე გამართულ ფინალურ მატჩში თბილისის ამერი ანგარიშით – 2:1 დაამარცხეს და დავით ყიფიანის სახელობის თასის მფლობელები გახდნენ. 2010/2011 წლების სეზონში ზესტაფონმა საქართველოს ჩემპიონის ტიტული მოიპოვა, ამავე სეზონში მარგველმა ფეხბურთელებმა საქართველოს სუპერთასის მოგებაც მოახერხეს. ზესტაფონმა ჩემპიონობა უკანასკნელად 2011/2012 წლების სეზონში იზეიმა, გუნდმა ზედიზედ მეორედ მოახერხა ოქროს მედლების მოპოვება. 2013/2014 სეზონი სკ ზესტაფონმა ვიცე ჩემპიონის ტიტულით დაასრულა.
მწვრთნელი და ზესტაფონი
ზესტაფონის საფეხბურთო კლუბის მთავარ მწვრთნელად ნოემბრიდან კვლავ გია გეგუჩაძე მუშაობს, რომელთან ერთადაც ზესტაფონმა არაერთი წარმატებული სეზონი ჩაატარა. გუნდმა მისი ხელმძღვანელობთ დასრულებული პირველობა მეორე ადგილზე დაამთავრა.
დინამომდე…
ზესტაფონმა დასრულებულ ჩემპიონატში მეორე ადგილი დაიკავა და შესაბამისად ევროპა ლიგის გათამაშებაში მონაწილეობის უფლება მიიღო. მეორე საკვალიფიკაციო ეტაპზე ზესტაფონელები სპარტაკ ტრნავას დაუპირისპირდნენ. პირველი მატჩი იმერეთში ფრედ 0:0 დასრულდა. საპასუხო შეხვედრაში მასპინძლებმა 3:0 აჯობეს ჩვენს მომავალ მეტოქეს. საქართველოს ჩემპიონატის პირველ ტურში ზესტაფონელებმა 6:0 მოუგეს გურიას. მეორე ტურში კი ჩიხურამ დაამარცხა გია გეგუჩაძის გუნდი ანგარიშით- 2:1.
დინამო VS ზესტაფონი
დღემდე დინამო თბილისი და ზესტაფონი ეროვნულ ასპარეზზე ერთმანეთს 33– ჯერ შეხვედრიან. დედაქალაქელმა ფეხბურთელებმა მეტოქე 18 შემთხვევაში დაამარცხეს, 6 მატჩი ფრედ დასრულდა, 9 შეხვედრაში კი ყვირილისპირებემა იმარჯვეს. გატანილი და გაშვებული ბურთების შეფარდება ჩვენი გუნდის სასარგებლოდ– 48/31 არის.
დინამო – ზესტაფონის დაპირისპირებაში ყველაზე პოპულარული ანგარიში 1–0 არის, რომელიც 11 შეხვედრაში დაფიქსირდა. დიდი ანგარიშით ოთხი შეხვედრა დასრულდა. 2012/2013 სეზონის ბოლო ტურის მატჩში 18 მაისს, დინამომ მეტოქე ხუთბურთიანი სხვაობით– 6:1 დაამარცხა. 2009 წლის 10 აპრილს ჩვენმა გუნდმა გასვლით შეხვედრაში ზესტაფონს ოთხი უპასუხო გოლი გაუტანა. ამავე წლის 29 აგვისტოს თბილისელები ზესტაფონში მარგველ ფეხბურთელებთან 1:4 დამარცხდნენ. 2012 წლის 14 დეკემბერს კი დინამომ სტუმრად– 1:5 წააგო.
დინამოს ზესტაფონური გუნდებიდან, ასევე მარგვეთთან და მეტალურგთან უთამაშია. ამ შეხვედრებში თბილისელებს კოლოსალური უპირატესობა ჰქონდათ. 21 ჩატარებულ მატჩში ზესტაფონელებმა მხოლოდ 2–ჯერ იმარჯვეს, 3 შეხვედრა ფრედ დასრულდა, ხოლო 16 შემთხვევაში თბილისელებმა იზეიმეს გამარჯვება. ბურთების შეფარდება 82/15 დინამოს სასარგებლოდ. ყველაზე დიდი ანგარიშით დინამომ 1994 წლის 15 ოქტომბერს- 10:1 იმარჯვა. 1996 წლის 17 ნოემბერს დინამომ 8 უპასუხო ბურთი გაუტანა მარგვეთს. ანგარიშებით 6:0 და 6:1 კი, დინამომ სამ–სამჯერ იმარჯვა.
უკანასკნელი შეხვედრა დინამოსა და ზესტაფონს შორის 3 მაისს ზესტაფონში, დავით აბაშიძის სახელობის სტადიონზე გაიმართა. საკმაოდ საინტერესო და დაძაბული დაპირისპირება მასპინძელი გუნდის გამარჯვებით – 3:2 დასრულდა. ზესტაფონელთა კარში გოლები ჩისკომ და ოთარ მარცვალაძემ გაიტანეს.
დისკვალიფიცირებული ფეხბურთელები
ხვალინდელ შეხვედრას დისკვალიფიკაციის გამო ფეხბურთელები არ დააკლდება.
ზესტაფონი VS დინამო – მსაჯი
საქართველოს ჩემპიონატის მესამე ტურის შეხვედრას, რომელსაც ჩვენი გუნდი 23 აგვისტოს ზესტაფონში, დავით აბაშიძის სახელობის სტადიონზე სკ ზესტაფონის წინააღმდეგ გამართავს– გიორგი ვადაჭკორია განსჯის. მას ასისტენტობას ბ. ჭიჭინაძე და ი. უკლება გაუწევენ. დამატებითი ასისტენტები იქნებიან ხ. გაგნიძე და ა. კრიჭაშვილი. სათადარიგო მსაჯის ფუნქციებს კი ი. კვირიკაშვილი შეასრულებს.
ჩვენი გუნდის მონაწილეობით გიორგი ვადაჭკორიამ ბოლოს 11 მაისს საქართველოს ჩემპიონატის ბოლოსწინა შეხვედრაში იმსაჯა. დინამო თბილისმა ბოლნისის სიონი 3:0 დაამარცხა. აღნიშნულ მატჩში გიორგი ვადაჭკორიამ ექვსჯერ გააფრთხილა ფეხბურთელები.
უკანასკნელი შეხვედრა, რომელიც გიორგი ვადაჭკორიამ იმსაჯა, 20 აგვისტოს ბაქოში გამართული ამხანაგური მატჩი- აზერბაიჯანი 0:0 უზბეკეთი გახლდათ. აღნიშნულ მატჩში გიორგი ვადაჭკორიამ ფეხბურთელები ორჯერ გააფრთხილა.
ზესტაფონის სავარაუდო შემადგენლობა
ჩვენი ვარაუდით, ხვალინდელ მატჩში ზესტაფონელთა სასტარტო შემადგენლობა ასეთი იქნება:
პავლოვიჩი – რენე ფერეირა, თო. გრიგალაშვილი, თე. გრიგალაშვილი, გვალია – შარიქაძე, ჭანკოტაძე, სარდალიშვილი, კაპანაძე – დვალი, ჭანტურიშვილი
FCDinamo.GE
