ზლატანი: „ზოგიერთი მცველი „ბოშას“ ძახილით ცდილობდა ჩემს გაღიზიანებას“

„პარი სენ-ჟერმენის“ თავდამსხმელმა ზლატან იბრაჰიმოვიჩმა მასსა და მეტოქე გუნდების მცველებს შორის ურთიერთდამოკიდებულების შესახებ ისაუბრა. როგორც შვედი ფეხბურთელი ამბობს, განვლილი კარიერის განმავლობაში ზოგიერთი დამცველი მატჩის მიმდინარეობისას მის გაღიზიანებას ცდილობდა.

„ზოგიერთი მცველი ფიზიკურ და სიტყვიერ შეურაცხყოფას მაყენებდა. ჩემი ოჯახიდან გამომდინარე, ზოგიერთი „ბოშას“ მეძახდა, თუმცა უნდა აღვნიშნო, რომ დედა ხორვატი მყავს, მამა – ბოსნიელი, მე შვედეთში დავიბადე და საკუთარ თავს ასი პროცენტით შვედად ვთვლი. ჩემი საიდუმლო იმაში მდგომარეობს, რომ ყურადღებას არ ვაქცევ, თუ რას მეუბნებიან მატჩის მიმდინარეობისას, მთლიანად თამაშზე ვარ კონცენტრირებული.

გარდა ამისა, ზოგიერთი მცველი ჩემს წინააღმდეგ ბინძურ ხრკებს იყენებდა. ხელს მკრავდნენ, უსინდისოდ მირტყამდნენ, თუმცა ამას მხოლოდ იმიტომ აკეთებდნენ, რომ ისინი სუსტი ფეხბურთელები იყვნენ. უმაღლესი დონის მცველი ასეთ რამეს არასდროს არ აკეთებს, სუფთად თამაშობს. ამიტომ, დიდად ვაფასებ პაოლო მალდინისა და ალესანდრო ნესტას, რომლებიც წესებს სრულად იცავდნენ და ძლიერ მეტოქეებადაც ითვლებოდნენ“, – იბრაჰიმოვიჩის სიტყვები Four Four Two-მ გამოაქვეყნა.

ბექა დოგრაშვილი