ზურაბ ხიზანიშვილი: „ავხსნი, თუ რატომ არ ავედი ავტობუსში“

საქართველოსა და ფინეთის ნაკრებთა შორის გამართული მატჩის (0:1) განაცხადში ზურაბ ხიზანიშვილი შეყვანილი არ იყო, რაზეც „ჯვაროსანთა“ მთავარმა მწვრთნელმა თემურ ქეცბაიამ შემდეგი კომენტარი გააკეთა:

„ხიზანიშვილი ავტობუსში არ ამოვიდა. ძირითადში არ იყო და ალბათ, ეწყინა და ავტობუსში არ ამოვიდა“.

აღნიშნულ ფაქტზე ზურაბ ხიზანიშვილმა პირველი კომენტარი უკვე გააკეთა. გუნდის გამოცდილი ფეხბურთელი მომხდარ ინციდენტზე ვრცელ განცხადებას, სავარაუდოდ, რამდენიმე დღეში გაავრცელებს.

„წაგებული მატჩი ჩემზეც გადმოდის. როგორც ბიჭები დარჩნენ გულნატკენი, ასევე ვგრძნობ მეც და ცხელ გულზე კომენტარის გაკეთება არცერთი მხრიდან არ იქნება სასურველი. თურქეთში ჩასვლიდან რამდენიმე დღეში, როცა დავლაგდები და დავწყნარდები, სოციალური ქსელის მეშვეობით გავაკეთებ განცხადებას და ავხსნი, თუ რატომ არ ავედი ავტობუსში“, – აღნიშნა ხიზანიშვილმა.